ለውጡና … ሕዝብ

መስፍን ወልደ ማርያም

ሚያዝያ 2011

አንዳንድ ሰዎች ለውጥ የለም ሲሉ አንዳንዶቹ ደግሞ ስር-ነቀል ለውጥ ተደርጓል ይላሉ፤ ለእኔ ግን ከደርግ የመጀመሪያ ዓመት የሚመሳሰል እንዲያውም ከፍ ያለ ለውጥ አይቼበታለሁ፤ ሆኖም እዚህ አጉል ክርክር ውስጥ አልገባም፤ነገር ግን የተከታተልሁትን ያህል እንደገባኝ እኔ ለውጥ የምለውን ልናገር፤ በዘር ፖሊቲካ የተለያዩ ወንጀሎች እየተለጠፉባቸው ከዕድሜ ልክ እሰከሞት በአሻንጉሊት ዳኞች እያስፈረዱ እስርቤቶቹን ሞልተው እንደነበረ እናውቃለን፤ ዛሬ እነዚህ ሰዎች ሁሉ በነጻ በየቤታቸው ናቸው፤ ይህ ለብዙ ቤተሰቦች ለውጥ ነው፤ ከሁሉም በላይ ሀሳብን የመግለጽ ነጻነት ጋዜጦች፣ ራዲዮኖችና፣ ቴሌቪዥኖች እንደልባቸው እንዲጨፍሩ አድርገዋል፤ ይህም በሚልዮን ለሚቆጠሩ ሰዎች ለውጥ ነው፤ የፖሊቲካ ቡድኖች ሁሉ እንደልባቸው በነጻነት እየተሰበሰቡ ፐሮግራማቸውን መግለጽና መዘዋወር ችለዋል፤ እንዲውም አንዳንድ የፖሊቲካ ቡድኖች ለውጡ ያመጣውን ነጻነት ወደስድነት ለውጠውት ብዙ ጥፋትን ሠርተዋል፤ ስለዚህ የአገዛዙ ኃይል በለውጡ ምክንያት ሲላላ እኩይ ኃይሎች ይበረታሉ፤ እስከዛሬም ቢሆን እኩይ ኃይሎች እንደተጠናከሩ በመሆናቸው ብዙ ሰዎች መንግሥት መኖሩን ይጠራጠራሉ፡፡

የማስታወስ ችሎታችን ያነሰ በመሆኑና አዲስ ትውልድ በመፍላቱ አናስታውስ ይሆናል እንጂ ደርግ ሥልጣን ሲይዝ ከአንድ ዓመት ያህል በላይ መንግሥት አልነበረም ይባል ነበር፤ ጸሐፌ ትእዛዝ አከሊሉ በኢትዮጵያ ታሪክ ለመጀመሪያ ጊዜ ከጠቅላይ ሚኒስትርነት በፈቃዳቸው ሲሰናበቱ ወንበሩ ለብዙ ወራት ብዙዎችን እያጓጓ ባዶውን ተቀምጦ ነበር፤ ለጥቂት ወራት በጭንቀት የጠቅላይ ሚኒስትሩን ቢሮ በተከታታይ የያዙት ልጅ እንዳልካቸው መኮንንና ልጅ ሚካኤል እምሩ ነበሩ፤ጃንሆይ ከዙፋናቸው የወረዱት ጸሐፌ ትእዛዝ አከሊሉ ከጠቅላይ ሚኒስትርነት ከተሰናበቱ ከዘጠኝ ወራት በኋላ ነው፤ በመሀከሉ የልጅ እንዳልካቸውና የልጅ ሚካኤል ጠቅላይ ሚኒስትርነት እንደነበረ አልረሳሁም፤ ነገር ግን በልጅነት የተቀጩ በመሆናቸውና ፋይዳም ስላልነበራቸው ችላ ብያቸው ነው፡፡

ደርግ ሥልጣን ሲይዝ መንግሥት አልነበረም ቢባልም ሥርዓት አልባነትን የመቆጣጠሪያ ጉልበትና ቁርጠኛነት ነበረው፤ አሁን ግን የተፈለገው ከጉልበት ይልቅ ሕጋዊነት. ከዚያም አልፎ ፍቅር፣ ይቅር ባይነትና ሰላም በመሆኑ ለማኅበረ እኩያን ሁኔታዎችን ያመቻቸ ይመስላል፤ ስለዚህም በኢትዮጵያ ያለው ሥርዓት አልባነት ቢያንስ ለጥቂት ወራት የሚቀጥል ይመስለኛል፤ ይህንን የሥርዓት አልባነት ዘመን ለማሳጠር በሥልጣን ላይ ያሉት ከያዙት የክርስቲያን መንገድ የማይቃረን ዘዴ በቶሎ ቢፈልጉ ከብዙ ጥፋት እንድናለን፡፡     

    1. ባለሥልጠኖችና ለውጡ

ዛሬ በሥልጣን ላይ ያሉት ሰዎች የኢሕአዴግ አባላት ናቸው፤ ሁለቱም ዓቢይና ለማ የኦሕዴድ አባላት ናቸው፤ እንግዲህ ለውጥ አድራጊዎቹ ሁለቱም የኦሕዴድ አባሎች ናቸው፤ የብአዴን ሰዎች ጎልተው አልታዩም፤ እነዚህ ሁለት የኦሕዴድ ባለሥልጣኖች በአንድ በኩል ራሳቸውን ከአደጋ ለመከላከል በጣም ከባድ ጥረት ያደርጋሉ፤ በሌላ በኩል ለውጡን ወደፊት ለመምራት ይለፋሉ፤

የለውጡ ባለሥልጣኖች በሦስት ኃይሎች ተወጥረዋል።  በአንድ በኩል ሥልጣኑን የተቀማውና ያኮረፈው ቡድን ምቹ አጋጣሚ እየጠበቀ ሰላምን ያደፈርሳል፤ በየደረጃው በሥልጣን ላይ ያሉት ደግሞ እንዳይነጠቁ በየፊናቸው እንቅፋቶችን ይፈጥራሉ፤ በተጨማሪ ደግሞ ለውጡ ቀሰስተኛ ሆነብን እያሉ የሚጮሁ አሉ፤ ቆም ብሎ በማሰብ ፖሊሶችን፣ ዓቃብያነ ሕጎችን፣ ዳኞችን በሙሉ አስወጥቶ እንደሀገር መቀጠል እንደማይቻል መገንዘብ አያስቸግርም፤ በሌሎች የተለያዩ ሥራዎችም በወደቁት ባለሥልጠኖች የተሾሙት ሁሉ ስርስሩን መርዝ እየነሰነሱ የሚያደናቅፉ ናቸው፤  ትልቁ የለውጡ መሪዎች ፈተና በጎሠኞች መሀከል የተፈጠረው ፉክክርና ግጭት ነው፡፡

የለውጡ መሪዎች በአላቸው ችሎታ ሁሉ በሰላማዊ መንገድ ሕዝቡን መምራት ይፈልጋሉ፡፡

2. ምሁራንና-ለዉጡ

ምሁራን ማለትን በትክክል ያሳወቀን የለም፤ ስለዚህ እኔ ሆዱ ሰፊ የሆነና ስምንተኛ ክፍል ጨርሶ በፌስቡክ ላይ የሚጽፍ ሁሉ ምሁር ነው ብዬ እነሣለሁ፤ ከዚያ በላይ በአሥራ ሁለተኛ ክፍል በኩልም ይሁን በሌላ በአቋራጭ መንገድ የሚገኙትን የትምህርት መጠሪያ ጌጦች ሁሉ ከነዝባዝንኬያቸው የታቀፉ ሁሉ ምሁራን ናቸው፤ ቄንጠኛ ባርሜጣ ያደረጉና ጥቁር መነጽር የሚያደርጉትንም እጨምራቸዋለሁ፤ የሚሽሎከሎኩም ይኖሩ ይሆናል፡፡

አብዛኛዎቹ ምሁራን ለለውጡ ገለልተኞች አይደሉም፤ እንዲያውም አብዛኛዎቹ ምሁራን ለውጡ የመጣባቸው ናቸው፤ እነዚህ የአንጀራ ምሁራን በእንጀራቸው ለሚመጣ ነገር ዕድሜያቸውም ሆነ ምኞታቸው ለገለልተኛነት አያበቃቸውም፤ በአጠቃላይ ነባር ምሁራን ነባር ሁኔታው የተኙበት ነውና ለውጥን አይደግፉም፤ የእነሱን እንጀራ ለማያወፍር ለውጥ  ተቃዋሚ እንጂ ደጋፊ ሊሆኑ አይችሉም፤ በመሠረቱም የእንጀራ ምሁራን ከለውጥ ጋር የሚሰለፉት የተሻለ ወፍራም እንጀራ የሚያቀርብላቸው ሲሆን ብቻ ነው፡፡

አንዳንዶቹ በአማካሪነት፣ በሎሌነት፣ ወይም በአጨብጫቢነት ከመሪዎቹ አጠገብ ለመጠጋት ይፈልጉ ይሆናል፤ አንዳንዶቹ ሥራቸውን፣ ችሎታቸውን በደህና ዋጋ ለመሸጥ ይጥራሉ፤ አንዳንዶቹ ደግሞ መንጠላጠያ ጨብጠው ወደሌላ ዓለም ተምዠግዥጎ ለመብረር ይመኛሉ፤ በአገራቸው ተተክለው የሚቀሩ በጣም ጥቂቶች ናቸው፡፡

ለምሁራን ራሳቸውን ከፍ ለማድረግ የለውጡን መሪዎች ዝቅ አድርጎ መገመት መነሻቸው ይመስለኛል፤ ጥንት በአጼ ዘመን ካሣ ወልደ ማርያም የኃይለ ሥላሴ ዩኒቨርሲቲ ፕሬዚደንት እንዲሆን ሲሾም እኔ የኢትዮጵያ ዩኒቨርሲቲ መምህራን ማኅበር ፕሬዚደንት ነበርሁ፤ በዚህም የተነሣ ለካሣ የምሥራች ደብዳቤ እንጻፍለት ብዬ ሀሳብ አቀረብሁ፤ በዚያን ጊዜ የሰማሁት ተቃውሞ ዛሬ በነዓቢይ ላይ ከሚሰነዘሩት የተለየ አልነበረም፤ ‹‹እኛ የምናውቀውን እነሱ አያውቁም፤ እኛ የምናየውን እነሱ አያዩም፤ እኛ የምንሰማውን እነሱ  አይሰሙም፤›› ለድንገተኛ አዲስ ነገር በደመ ነፍስ እንዲህ ዓይነቱን አስተያየት ስንሰጥ እጅግም አያስደንቅም ይሆናል፤ ነገር ግን ሲውል ሲያድር አስተያየታችን ካልተሻሻለ ለውጡን ወደፊት ከመግፋት ይልቅ ወደኋላና ወደጠብ አጫሪነት የሚወስድ ይሆናል፤ የለውጡ መሪዎች ምሁራን ከሚባሉት ያላነሰ እውቀት እንዳላቸው ለመቀበል ትንሽ መመራመርና እውነቱን ማወቅ አስተያየታችንን ያቃናልን ነበር፤ እንዲያውም እንደዓቢይ አህመድ ያለ በብዙ መስኮች በቃሉ የማውረድ ችሎታ ያለው አላውቅም፤ ሊቅ የሚባሉት እንትና እንዲህ አለ፤ እንትና እንዲህ አለ በማለት የሠለጠኑ ናቸው፡፡

3. ሕዝብ

በአጠቃላይ በሕዝቡ በኩል ስለለውጡ ያለው ስሜት እኔ እንደምገምተው በቀል ነው፤ በተለያዩ ሁኔታዎች በድለውናል የሚሏቸውን ባለሥልጣኖች ከሥልጣን ማውረድ ዋናው ፍላጎት ይመስለኛል፤ ይህ ስሜት ወደወጣቶቹ ዘንድ ሲደርስ ኃይልና እልህ ጨምሮ ለግጭት ሊያደርስ ይችላል፤ የማይፈለጉት ባለሥልጣኖች ሁሉ በአንድ ጊዜ ከሥልጣናቸው ቢነሡ የሚከተለውን ትርምስ መገመት አያስቸግርም፡፡

ሕዝቡ እየተረገጠና እየተጠቃ ለዘመናት ይኖራል፤ በደሉንና ቂሙን ድብቅ አርጎ ይዞ ኖሮ የአገዛዝ ለውጥ ሲመጣ የትእግስት ቋቱ ከጫፍ ጫፍ ይተረተራል፤ ፍቅር፣ ውለታና ጉርብትና መቃብር ተቆፍሮላቸው ይገባሉ፤ የኢትዮጵያ ሕዝብ ቂሙን አይረሳም፤ ቂሙን ደብቆ በምሥጢር ይይዝና ለዘመናት ቆይቶ አጥቂ የነበረው ኃይል ጥቃት ሲደርስበት የኢትዮጵያ ሕዝብ እየፎከረና እልል እያለ በቀሉን ለመወጣት ይጥራል፤ በሰዎች ላይም ሆነ በንብረት ላይ የሚያደርሰው ጥፋት ከፍተኛ ነው፤ በእንደዚህ ያለው ጊዜ የኢትዮጵያ ሕዝብ ለበቀልና ለዘረፋ እየፎከረ ይወጣል፤ የሕዝቡ አትኩሮት ባለፈው በደሉና በበቀል ናፍቆቱ ላይ ነው፤ ወደኋላው እንጂ ወደፊት አያይም፤ የወደቀውን አገዛዝ በተሻለ ለውጦ የወደፊት ኑሮውን ለማሻሻል እንዲያስብ መወያየት ያልተለመደ ነው፡፡

ሦስቱም ሃይማኖቶች በነገሡባት አገር፣ ኢትዮጵያ፣   በታሪክ ጸሐፊዎች ሁሉ የክርሰቲያን ደሴት ትባል ነበር፤ ታሪኩን የጠቀስኩት ዓቢይን ለማስገባት ነው፤ ዓቢይ አህመድ በዓቢይ ስሙ ላይ አህመድን ጨምሮ ብቅ ሲል ያልተደነቁት ወሎዬዎች ብቻ ይመስሉኛል፤ ኢትዮጵያ የተደነቀችው ዓቢይ አህመድ ፍቅር፣ ይቅር ባይነት፣ ሰላም … እያለ ብርቅ የሆነበትን ክርስትና መስበክ ሲጀምር ነው! የእናቱ ወሎዬነት አደናቅፎበት አልፎት ይሆናል እንጂ ክርስትና በኢትዮጵያ ከተሰበከ ከሁለት ሺህ አምስት መቶ ዓመታት በላይ ሆኖታል፤ አበሻ ክርስትናን ያሸነፈው በሆዱ ነው፤ አበሻ ለሆዱ ያለውን ፍቅር ዓቢይ መማር ያስፈልገዋል፡፡           

ከተለያዩ የውጭ ኃይሎች ጋር የተቃቀፉ ኢትዮጵያውያን ስለኢትዮጵያ የወደፊት ሁኔታ እያጠቆሩና እያመረሩ ያወራሉ፤ ገና ካልደረሰችበት አፋፍ እያንከባለሉ ሊያወርዷትም ይዳክራሉ፤ ሲአይኤ ከሠላሳ ዓመታት በፊት የጠነሰሰውን የኢትዮጵያ ውድቀት ትንበያ ገና አሁን ያነበቡት ምሁሮች ያለማቋረጥ ዛሬ ያነበንቡታል፤ ኢትዮጵያን ትተው ሄደው አሁንም የዳቦ መብያቸው ኢትዮጵያ ነች፤ የፈረንጆችን ዓላማ ለማሳካት ኢትዮጵያን መደፍጠጥ ዳቦ የሚያበላ ሥራ አድርገውታል፤ ለውጡን ለመምራት፣ አቅጣጫውን ለማስለውጥ፣ ፍጥነቱን ለመቀነስ፣ አካሄዱን ለማደናቀፍ የሚጥሩ ክፍሎች በውጭ እርዳታ እንደልባቸው ይንቀሳቀሳሉ፤ ልናውቃቸው ይገባል፡፡

ኢትዮጵያ አጆቿን ወደእግዚአብሔር ትዘረጋለች፤ ይዞ ይደግፋታል!



Advertisements
Posted in አዲስ ጽሑፎች

የለማ መገርሳ ቁጣ

መስፍን ወልደ ማርያም
መጋቢት/2011

የለማ መገርሳን ቁጣ አንዳንድ ሰዎች እንደፖሊቲከኛ ትርኢት አይተውታል፤ ያለቀሱም አጋጥመውኛል፤ እኔ እንባዬ ጠብ አላለም አንጂ በዓይኔ ላይ አቅርሮ ነበር፤ ይህ ሁኔታ እጅግም አያስደንቅም፤ ኢትዮጵያውያን ስሜታውያን ነን፤ የኔም እንባ ተንጠልጥሎ የቀረበት ምክንያት አእምሮዬ ጥያቄዎችን አጎረፈልኝ፡፡
በተደጋጋሚ የሰማኋቸውን ልግለጽ፡
• ለማ መገርሳ ብዙ ሺህ ኦሮሞዎችን በአዲስ አበባ አስፍሯል፤
• በብዙ ሺህ የሚቆጠሩ ኦሮሞዎች የአዲስ አበባ መታወቂያ እየተሰቸጣው ነው፤
• ኦሮሞዎች እየተመረጡ ኮንዶሚኒየም (ቤት) ተሰጣቸው፤
እንድንግባባ በትክክል ሦስቱም ድርጊቶች መሆን ወይም አለመሆናቸው አንድ ነገር ነው፤ በኢትዮጵያ ዜጋዎች መሀከል በጎሣ ልዩነት የተነሣ አድልዎ መፈጸሙ ሌላ ነገር ነው፤ ሰዎችን ከቦታ ወደቦታ ማዘዋወሩ ብቻውን ወንጀል ሊሆን አይችልም፤ በተለያዩ ምክንያቶች በአጼ ኃይለ ሥላሴ ዘመንም፣ በደርግ ዘመንም ተደርጓል፤ አሁን ተደረገ ለተባለው ምክንያቱ ሌላ ሳይሆን በጎሠኛነት ላይ ለተመሠረተ ምርጫ መዘጋጀት ነው፤እንዲህ ከሆነ የኢትዮጵያን ፖሊቲካ ብቻ ሳይሆን ጨዋነታችንንም የሚያራቁት ድርጊት ነው፤ ግን ድርጊቱ መፈጸሙን ወይም አለመፈጸሙን በትክክል አናውቅም፤ ድርጊቱ ቢፈጸምም እውነተኛውን ምክንያት አናውቅም፤ በዚህ ምክንያት ነው ለማ መገርሳን ማስተባበል አስቸጋሪ የሚሆነው፤ ለማስተባበል የሞከሩ ብዙ ሰዎች አሉ፤ ነገር ግን በእኔ አስተያየት ከአሉባልታ የወጡ አይመስለኝም፡፡
አንድ ሰው በተለይ ዙሪያውን የተከበበበትን ጋሬጣ ሁሉ በጣጥሶ፣ የወያኔን ጭካኔ ተጋፍጦ፣ በአደባባይ በስብሰባ ላይ ለወያኔ ባለሥልጣኖች ልካቸውን የነገራቸውና የሀያ ሰባት ዓመቱን አፈና የደረመሰው ሰው እንደዚህ ምርር ብሎት ሲናገር ያሳዝናል፤ በጣም ያሳዝናል፤ የወያኔ ባለሥልጣኖችን ልብ አፍርሶ፣ ሐሞታቸውን አፍስሶ ፊታቸውን ጥቀርሻ ያለበሰው ሰው ሲያዝን ያሳዝናል፤ በስብሰባው ላይ ሲናገር ያስደሰተኝ በኢትዮጵያዊነቱ ነው እንጂ በኦሮሞነቱ አልነበረም፤ ሲያዝንም ያሳዘነኝ በኢትዮጵያዊነቱ ነው፤ በወያኔ ስብሰባ ላይ ሲናገርም ሆነ አሁን አዝኖ ሲናገር እሱንና እኔን ያያዘን ትልቁ የኢትዮጵያዊነት ገመድ ነው፤ ሁለቱንም ጊዜ የተሰማኝ ኢትዮጵያዊነቱ ነው፤ ከተሳሰርንበት ገመድ ወጥቼ ከምጠራጠረው ገመዱ ውስጥ ሆኜ አምኜው ብሳሳት ይሻለኛል፡፡
አጼ ኃይለ ሥላሴን ከዙፋናቸው ያወረዳቸው ማነው? የራሳቸው ሎሌዎች ናቸው፤ ሎሌዎቹ ራሳቸውን ነጻ አወጡና ጌቶች ሆኑ! ዓቢይና ለማም የወያኔ ሎሌዎች ነበሩ፤ ዛሬ ጌቶች ሆነዋል? አዝማሚያው የለም አልልም! የኢትዮጵያ ሕዝብ በሆነውና ባልሆነው እልል እያለና እያጨበጨበ ባለሥልጣኖችን ያባልጋል፤ ዓቢይ በእስክንድር ላይ የወረወረው ዛቻ ይህንን የሚያመለክት ነው፤ የእስክንድር ስሕተት እንዳለ ሆኖ፤ መሣሪያ የያዘ ሰው መሣሪያ በሌለው ላይ ጉልበተኛነቱን ሲያውጅ ዴሞክራሲ ዘሩ ይጠፋል፤ ዓቢይ ያየውን አደጋ እኔም አይቼዋለሁ፤ ጉልበት ያለው የተሻለ ዘዴ ለመፈለግ ጊዜውም ዝንባሌውም የለውም፤ ሕግ፣ ማንንም የማይምር ሕግና ልብ ብሎ የሚታዘብ ሕዝብ ሲኖር ጉልበት ዋጋ አይኖረውም::
ዓቢይና ለማ በአማርኛ ሲናገሩ የምንሰማው ጠንካራ ኢትዮጵያዊነት በኦሮምኛ ሲናገሩ በእኔው ድንቁርና ምክንያት አልሰማምና አስተያየት መስጠት አልችልም፤ ነገር ግን ስገምተው የሚወክሉትን ሰብአ ኦሮምያ ለማስደሰት ሲሞክሩ ኢትዮጵያዊነትና ኦሮሞነት ቢደባለቁ አያስገርምም፤

Posted in አዲስ ጽሑፎች

አንዲት የአሜሪካ ሴት ልጇን አንድ ሰካራም መኪና እየነዳ ሲሄድ ገጭቶ ገደለባት፤ እርር! ድብን! ብላ አዘነች፤ አልበቃትም፤ የአንድ ሰው ትግል ጀመረች፤ አሜሪካን አዳረሰችው፤ እናቶች ሁሉ ተሰባሰቡላት፤ ከዚያ ቀስ እያለ ሌሎችም ሁሉ እየገቡበት ትልቅ አገር-አቀፍ ንቅናቄ ሆኖ እየጠጡ መንዳት በሕግ እንዲከለከል አደረገች፤ በዚች በአንድ ሰው ብርታት አሜሪካ የተሻለ አገር ሆነ፤ በኢትዮጵያችን በየቀኑ ቤት እየፈረሰ ሰዎች እንደአበሻ አገር ቆሻሻ በየመንገዱ ላይ እየተጣሉ ሲያለቅሱ እናያለን፤ መንግሥት አለ? ማንም ምንም አያደርግም፤ መንግሥት አለ? ባለሥልጣኖቹም የማፍረስ ትእዛዛቸውን ያስተላልፋሉ፤ አፍራሾቹም ሥራቸው አድርገውት ያፈርሳሉ፤ መንግሥት አለ? እንዲያውም ለምዶባቸው ቅርስ የተባለውን የደጃዝማቹን ቤት አፈረሱት! መንግሥት ማለት አፍራሽ ግብረ ኃይሉን የሚቆጣጠረው ነው መሰለኝ!
ልፋ ያለው በሕልሙ ዳውላ ይሸከማል እንደሚባለው ሆኖ እስክንድር ነጋ የሚያለቅሱትን ሰዎች አስተባብራለሁ ብሎ ተነሣ፤ ጠጠር አንወረውርም እያለ! የፍቅር፣ የመደመር፣ የይቅር ባይነት ዲስኩር ትዝ ብሎት፣ የክርስቶስን ትምህርት አስታውሶ ለተገፉትና ተስፋ ለቆረጡት ተናገረ፤ በሕግ ተማመኑ ብሎ፤ ይለይልህ ብለው ራሱን አስፈራሩት! እኔ ሳውቅ እስክንድር ነጋ ሲታሰር ሲፈታ ሠላሳ ዓመታት የሆነው ይመስለኛል፤ አሳሪዎቹም ጉልበታቸውን ከጭንቅላታቸው አላወጡም! ታሳሪውም አልሰለቸውም! እኛም አልተለወጥንም!

Posted in አዲስ ጽሑፎች

ዓቢይ ቅድምና አሁን

ዓቢይ ቅድምና አሁ
መስፍን ወልደ ማርያም
መጋቢት 2011

ያልተረጋጋው የለውጥ አስተዳደር በሚጫወተው ጅዋጅዌ እኛንም እያወዛወዘን ነው፤ እኔን ያለጥርጥር አወዛውዞኛል፤ ጅዋጅዌ አልወድም፤ ሃይማኖትን፣ እምነትን፣ መለዋወጥ የብስለት ምልክት አይደለም፤ ዛሬ አንድ መልክ፣ ነገ አንድ መልክ፣ ተነገ ወዲያ ደግሞ የማያስተመምን መሆን እንኳን ለአገርና ለሕዝብ ለቤተሰብም አይጠቅምም፤ ይህንን በመገንዘብ የኢትዮጵያን ሕዝብ የጊዜውን ሁኔታ በጥልቀት አሰብሁበት፤ ከጅዋጅዌው ጨዋታም ለመውጣትና ራሴን ችዬ ለመቆም ወሰንሁ፤ ይህ ጽሑፍ የዚህ ውሳኔ መግለጫ ነው፤ ምናልባት እንደኔ ጅዋጅዌው ጥርጣሬና ስጋት ውስጥ የከተታቸውን ሰዎች እንደኔ ይቀሰቅሳቸው ይሆናል የሚል ተስፋ አለኝ፡፡
እንዘጭ!-እምቦጭ! የኢትዮጵያ ጉዞ በሚለው መጽሐፌ የሚከተለውን ብዬ ነበር፤

የማድፈጥ ጉዳት
ማድፈጥ አንድ ክፉ ነገርን ያስከትላል፤ማድፈጥ የሚያተኩረው ቂም ላይ ነው፤ ማድፈጥ የሚያተኩረው በበቀል ላይ ነው፤ ማድፈጥ የሚያተኩረው ባለፈው ላይ ነው፤ ወደኋላ እያዩ ወደፊት መሄድ አይቻልም፤ስለዚህም አንድ የግፈኛ ሥርዓትን ጥሎ ለሌላ የግፈኛ ሥርዓት ሁኔታውን አመቻችቶ መተው የወደፊቱንም ያለፈው አምሳያ ማድረግ ይሆናል፤ የግፈኛውን ሥርዓት ቁንጮ ማውረድና ሥራቱን ማውረድ አንድ አይደለም፤ ዛሬም የፖሊቲካ ፓርቲዎች የተባሉትን ዘመናዊ ቅርጽ የያዙ ድርጅቶችን ብንመለከት ለግፈኛነት የሚፎካከሩ ናቸው፤ ቢያንስ ደርግን አይተናል፤ ኢሕአፓንና መኢሶንን አይተናል፤ ሻቢያን አይተናል፤ ወያኔን አይተናል፤ እስከዛሬ ድረስ በኢትዮጵያ ውስጥ ምንም ዓይነት የሥርዓት ለውጥ አልተደረገም፡፡ …
… ማድፈጥ መንቀልን እንጂ መትከልን አያውቅም፤ ቀኑ ደርሶ አምባው ከፈረሰ በኋላ በዋናው ግፈኛ መውደቅ ሁሉም አንጀቱ ይርሳል፤ ዋናው ዓላማ በቀል ስለሆነ የግፈኛው መውደቅ ለአብዛኛው ሕዝብ ዓላማውን አሳክቶለታል፤ ስለዚህም ሰላማዊው ሰው በደስታ ወደቤቱ ይመለሳል፤ ጉልበተኞች ከሎሌዎቻቸው ጋር ሆነው ይፋለሙና አዲስ ግፈኛ ይሰየማል፤ ግፉም ይቀጥላል፤ ማድፈጥም ይቀጥላል፡፡

መናገር የምንወደደውን ያህል ማንበብን እንጠላለን፤ ስንት ምሁራን አንብበውታል? ስንት ምሁራን በሀሳቡ ተወያይተውበታል? (በቅርቡ አንዳርጋቸው በጉዳዩ ያሰበበት የሚመስል ነገር ሰምቻለሁ፤) ተማርንም አልተማርንም፣ በየፈረንጅ አገሩ በአሽከርነት ኖርንም፣ መሬት እየቆፈርን በገጠር መንደር ውስጥ ኖርንም ሳናስብ መናገር፣ ፊደል ካወቅንም ሳናስብ መጻፍ ይቀናናል፤ ዱሮ የወንዜ ልጅ ስንባባል የነበርነው ዛሬ አቆልቁለን የጎሣዬ ልጅ መበባልና መቆራቆዝ ጀምረናል፤ ቁልቁል መውረድ እንጂ ወደላይ መውጣት የተከለከልን ይመስላል፡፡
ካለንበት ማጥ በጊዜ ለመውጣት የምንሻ ከሆነ ያለን አማራጭ አንድ ብቻ ነው፤ ዓቢይን ከነግሳንግሱ ደግፈን ሀሳቡን ማንገሥ ይበጃል፤ ዓቢይን ማዳከም አዳዲሶቹን ጉልበተኞች ማጠናከር ነው፤ እዚህ ላይ አንድ አውነት ነጥለን ማየት ያስፈልጋል፤ ዓቢይ ከአዲሶቹ ጉልበተኞች ጋር ተቃቅፎም ባይሆን እጅ-ለእጅ ተያይዞ የቆመ ይመስላል፤ ዓቢይን ከአዲሶቹ ጉልበተኞች መለየት እንዴት ለይተን እንወቀው? እንዴት የዓቢይን ጓደኞች አዳክመን እሱን እናጠንክረው? የፖሊቲካ ቡድኖች ያስቡበት!
ዓቢይ በጣም ጠንክሮ እንዲወጣ ካልተደረገ ሌላው አማራጭ እውን ካልሆነ ጉልበተኞች ተደባድበው አሸናፊው የሥልጣን ወንበሩን ይይዛል፤ ሁለት አደጋዎች ፊትለፊት ገጥመውናል፤ አንዱ አደጋ በጉልበተኞቹ መሀከል የሚደረገው ውጊያ በብዙ ሰላማዊ ዜጎች ሕይወትና ንብረት ላይ ጉዳት ያደርሳል፤ ሁለተኛው አደጋ አሸናፊው ጉልበተኛ መንበረ ሥልጣኑን ከያዘ በኋላ ሌላ የመከራ ዘመን ውስጥ እንገባለን፤ ከዚያ ይሰውረን!

Posted in አዲስ ጽሑፎች

ዜግነትና ጎሠኛነት

 

 

 

መስፍን ወልደ ማርያም

የካቲት 2011

 

በማኅበራዊ ሳይንስ የኅብረተሰብ እድገት መሠረታዊ ትምህርት ነው፤ በዚህ ትምህርት ውስጥ የማናቸውም ኅብረተሰብ ታሪክ ከዝቅተኛ ደረጃ ወደከፍተኛ ደረጃ የሚሸጋገር እድገትን ያሳያል፤ በሃማኖትም ሆነ በኑሮ (ኢኮኖሚ)፣ በአስተዳደርም ሆነ በሥልጣን ከዘመን ወደዘመን እድገትን ያመለክታል፤ ይህ እድገት በፍጥነትም ሆነ በዓይነት ተመሳሳይና አንድ ዓይነት መልክ የያዘ አይደለም፤ አንዳንዱ ቆሞ የሚቀር ነው፤ አንዳንዱ ከመጀመሪያው አንሥቶ እየዳኸ የሚንቀሳቀስ ነው፤ አንዳንዱ እየበረረ አትድረሱብኝ ይላል፤ አሁን የምንነጋገርበት ርእስ፣ ዜግነትና ጎሣ፣ ይህንን የኅብረተሰብ እድገት የሚያመለክት ነው፡፡

በዝቅተኛ ደረጃ የሚንከባለሉ ሰዎች የሚኖሩበት ሥርዓት ጎሣ ነው፤ ማየት፣ መስማትና ማወቅ ለፈለገ ሰው ማስረጃው በዙሪያችን አለ፤ በሶማልያ፣ በጂቡቲ፣ በሱዳንና በየመን እያየነው ነው፤ በኢትዮጵያም እየታገለ ነው፤ በቀላሉ ልንረዳው የምንችለው ጎሣ ገና ያልተረጋጋ የቤተሰብ ስብስብ ነው፤ የሰዎች የዝምድና ዝንባሌ ያለው በቤተሰቦች ላይ ነው፤ በዚህም ምክንያት የጎሣ ሥርዓት የተረጋጋና ቅርጽ ያለው አይደለም፤ ልል ስለሆነ ለትርምስ የተጋለጠ ነው፤ በአካባቢያችን የሚገኙት ሶማልያ፣ ሱዳንና የመን ምስክሮች ናቸው፤ በኢትዮጵያ ውስጥም በኦሮምያ በማቆጥቆጥ ላይ የሚታየው ይኸው ጎሣ የምንለው ልል የቤተሰቦች ስብስብ ነው፤ በአለፉት ሀያ አምስት ዓመታት ውስጥ የልልነቱንና የዝቅተኛነቱን ልክ አይተናል፤ አንድ ብቻ ለመጥቀስ እኔ ምስክርነት ልሰጥበት የምችለው ሌንጮ ለታን ነው፤ ከግለሰብ ጋር አያይዘን አንመልከተው፤ ግለሰቡ መገለጫው ነው፡፡

በአለንበት ዘመን ዜግነት ከፍተኛውን የኅብረተሰብ የእድገት ደረጃ የሚያመለክት ይመስለኛል፤ ዜግነት የሚመሠረተው በእያንዳንዱ ግለሰብ ሉዓላዊነት ላይ ነው፤ ዜግነት የሚመሠረተው በሕዝብ ፈቃድ ላይ ነው፤ ዜግነት የሚመሠረተው በሕግ ላይ ነው፤ ዜግነት በከፍተኛ ደረጃ ላይ ያለና የሠለጠነ ሕዝብ ማንነት ነው፡፡

በጎሣ ውስጥ የግለሰብ ሉዓላዊነት የሚባል የለም፤ ሉዓላዊነት ቢኖርም የጎሣው ነው፤ የጎሠኛነት የኋላቀርነቱ መሠረት የግለሰብ ሉዓላዊነት አለመኖሩ ነው፤ ጎሠኛነት ግለሰብነትን አይፈቅድም፤ ግለሰብነትን እንደጠላት አድርጎ ይቆጥረዋል፤ ያለግለሰብ ሉዓላዊነት ዴሞክራሲ የሚባል ነገር አይታሰብም፤ ከሩስያ ጀምሮ ወደምሥራቅ ያሉ አገሮች ሞክረውት ሳይሳካላቸው ቀርቶ ያፈረሱትና እያፈረሱት ያለ ማታለያ ነበር (መልከ-ጥፉን በስም ይደግፉ እንደሚባለው PEOPLE’S DEMOCRATIC REPUBLIC ሦስቱን የእንግሊዝኛ ቀላት ለመተርጎም ቀላል ነው፤ የሕዝብ፣ የሕዝብ፣ የሕዝብ! ሕዝብ ተንጠልጥሎ ቀረ! የቸገረው እርጉዝ ያገባል!)፡፡

በዜግነት ላይ የሚመጣ ዴሞክራሲ ወይም መንግሥተ ሕዝብ የእያንዳንዱን ግለሰብ ሉዓላዊነት በይፋ ያወጣዋል፤ በዚህም ምክንያት የግለሰቦች ችሎታ በሙሉ ነጻነትና በሙሉ ኃይሉ እየተጠናከረ ይወጣል፤ ዴሞክራሲያዊ ምርጫ ትርጉም የሚኖረው የግለሰብ ሉዓላዊነት በታወጀበት ብቻ ነው፤ የጎሣ ሥርዓት በዜግነት ሥርዓት ውስጥ የሚታየው እድገትና ልምላሜ ያስጎመጀዋል፤ ይመኘዋል፤ ስለዚህም በጎሣ ላይ ዴሞክራሲን ለመለጠፍ ይጥራል፤ ይህ አንዱ የጎሣ ሥርዓትን ዝቅተኛ ደረጃ የሚያስረዳ ነው፤ የግለሰብ ሉዓላዊነት በሌለበት የግለሰብን ምርጫ የሚያሳይ ዴሚክራሲ ከየት ይመጣል? የግለሰብ ነጻነት በሌለበት የግለሰብ ችሎታ ከየት ይመጣል? ግለሰብነት፣ ነጻነት፣ እድገትና ዜግነት የተያያዙ ናቸው፤ ጎሠኛነት የሦስቱም ተቃራኒ ነው፤ የአንድ ሰው ግለሰብነት የሚወጣበት መንገድ ብዙ ነው፤ ለመለዋወጥ ያለውም ችሎታ ብዙ ነው፤ በጋብቻ ብቻ አይደለም፤ በሃይማኖትም፣ በቋንቋም፣ በመኖሪያ ሰፈርም፣ በሥራም …፡፡ ዜግነት በሚንቀሳቀሰው ላይ፣ ወደፊት በሚመጣውና ባልታወቀው ላይ የተመሠረተ ነው፤ ወደፊት ለመራመድ ሁሌም ከአለፈው ጋር መታገል አለበት፡፡

ጎሣ እግዚአብሔር እንደፈጠረው የሚቆይ ነው፤ ይበታተናል እንጂ አይሰባሰብም፤  ያንሣል እንጂ አያድግም፤ይፎካከራል እንጂ አይተባበርም፤ ሚኔሶታ የአንድ ሉባ አገር አይደለም፤ አይሆንምም፤ ጎሠኛነት በማይንቀሳቀሰው፣ በአለፈውና በደረቀው ላይ የተተከለ ነው፤ ወደኋላ እንጂ ወደፊት አያይም፤ ወደኋላ ለመቅረት ሁሌም ከአዲሱና ከሚመጣው ጋር መታገል አለበት፡፡

ብሔራዊ ማንነት ትልቅ ስብስብ ነው፤ ጎሠኛ ማንነት የመንደር ስብስብ ነው፤ ብሔራዊ ማንነት የእድገት መንገድ ነው፤ ጎሠኛ ማንነት የቁልቁለት መንገድ ነው፤ ሰው የመሆን መሠረታዊው ምርጫ ይኸው ነው፡፡

አለባብሰው ቢያርሱ

ባረም ይመለሱ!

Posted in አዲስ ጽሑፎች

ይድረስ ለሰብአ ትግራይ

መስፍን ወልደ ማርያም
ታኅሣሥ 2011

1. በመጀመሪያ ራሴን ላስተዋውቅ፡ የተወለድሁት አዲስ አበባ ስድስት ኪሎ አካባቢ ነው፤ ዘመኑም 1922 ዓ. ም. ነው፤ የአገዛዝ የመንግሥት ለውጥ የተደረገበት ዘመን ነበር፤ አባቴ አቶ ወልደ ማርያም እንዳለ (ከአንኮበር፣ ሸዋ፤) ፣ እናቴ ወይዘሮ ይመኙሻል ዘውዴ (ከየጁ፣ ወሎ፤) ናቸው፤ ሚስቴ የነበረችው በአባትዋ ሸዋ (መርሐቤቴ) በእናትዋ ትግራይ (አድዋ፣ እንትጮ፤) ነች፡፡
በሥራዬ አብዛኛው ዕድሜዬ ያለፈው በአስተማሪነት ነው፤ መጀመሪያ በእቴጌ መነን ትምህርት ቤት፣ በኋላ በዩኒቨርሲቲ ኮሌጅ፣ ከዚያ በቀዳማዊ ኃይለ ሥላሴ ዩኒቨርሲቲ ሳስተምር ነበር፤ በአጼ ኃይለ ሥላሴ አገዛዝ በፓርላማ ተመርጬ ለአንድ ዓመት ያህል በመርማሪ ኮሚስዮን ሠርቻለሁ፤ ጡረታ ከወጣሁ በኋላ የኢትዮጵያ ሰብአዊ መብቶች ጉባኤን አቋቁሜ ለኢትዮጵያ ሕዝብ ስለሰብአዊ መብቶች ለማስተማር ሞክሬአለሁ፤ የመጨረሻ ሥራ የምለው በቅንጅት የፖሊቲካ ፓርቲ አባልነት ነው፤ ከዚያ በኋላ በመጻፍና በማሳተም ቆይቻለሁ፤

2 ከትግራይ ጋር የተዋወቅሁት በ1951 ነው፤ ክፉ ዘመን ነበረ፤ ገና ዕድሜዬ ሠላሳ ሳይሞላ በትግራይ የተመለከትሁት ስቃይና መከራ ልቤን ሰንጥቆ የገባ ነበር፤ በአገሬ በኢትዮጵያ፣ በወገኖቼ በኢተትዮጵያውያን ላይ የተጫነውን አገዛዝና ግፈኛነነቱን የተረዳሁበትና ከማናቸውም አገዛዛ ጋር በተቃውሞ ለመቆም የወሰንሁበት ዓመት ነበር፤ ያን ሁኔታ አይቼ ለኢትዮጵያ ሕዝብ ያለቀስሁበት ዓመት ነበር፤ በችጋር ለተጠቃው ሰብአ ትግራይ መፍትሔ ልዑል ራስ ሥዩም ለትግራይ አውራጃዎች በሙሉ በየቀኑ ጸሎት እንዲደረግ አዝዘው ነበር፤ አገዛዙ ከጊዜው የዓለም ሁኔታ ጋር መራራቁን የተገነዘብሁበት ዓመት ነበር፤ ሁለት የትምህርት ቤት ጓደኞቼን (ነፍሱን ይማረውና) መንገሻ ገብረ ሕይወትንና ኃይለ ሥላሴ በላይን አግኝቻቸው ያየሁትን አ.ይተዋል፤ በዚያን ጊዜ ትግራይ አገሬ ነበር፤ የሰብአ ትግራይ ስቃይ የኔም ስቃይ ነበር፤ በሰብአ ትግራይ ላይ የደረሰው ችጋር የኢትዮጵያ ነበር፤ ስለዚህ የኔም ችጋር ሆኖ ተሰማኝ፤ በሕይወቴ ለመጀመሪያና ለመጨረሻ ጊዜ በመሳፍንትና መኳንንት ቤት እየዞርሁ ደጅ ጠናሁ፤ በዚያን ጊዜ የአዲስ አበባ ከንቲባ የነበሩት ደጃዝማች ዘውዴ ገብረ ሥላሴ ‹‹እኔን ትግሬ ስለሆነ ነው ይሉኛልና ተወኝ፤›› ብለውኛል፡፡

3. ከሀያ አምስትና ከሠላሳ ዓመታት በኋላ በጉዳዩ ላይ ሁለት መጽሐፎችን (Rural Vulnerability to Famine in Ethiopia: 1958—1977. Suffering Under God s Environment: A Vertical Study of the Predicament of Peasants in North-Central Ethiopia) እስክጽፍ ድረስ ችግሩ ከአእምሮዬም ከልቤም አልወጣም ነበር፤ ትግራይን ከአክሱም ጽዮንና ከያሬድ ለይቼ አላይም፤ ኤርትራን ከደብረ ቢዘንና ከዘርአይ ደረስ ለይቼ አላይም፤ የኔ ኢትዮጵያዊነት የሚፈልቀው ከነዚህ ምንጮች ነው፤አውቀውም ይሁን ሳያውቁ ወያኔና ሻቢያ እነዚህን ምንጮች ለማደፍረስ ሞክረዋል፤ በተለይ በአለፉት አርባ ዓመታት ኢትዮጵያ በገዛ ልጆችዋ በጣም ደምታለች፤ ጥቂት ልጆችዋ በባዐድ ፍልስፍና ተመርዘው ኢትዮጵያውያንን ሁሉ ለመመረዝ ተደራጅተው ፍቅርን በጦር መሣሪያ፣ ኢትዮጵያዊነትን በዘር ለውጠው የታሪክ ቅርሳችንን ሊያሳጡን ሞክረው ነበር፡፡

4. የምንጮቹን ጥራት ለመጠበቅ አዲስ ትግል ተጀምሯል፤ በፍቅርና ይቅር ለእግዚአብሄር በመባባል በሰላማዊ መንገድ ኢትዮጵያን ለማደስ አዲስ ትውልድ ተነሥቷል፤ ይህ ትውልድ ድምጽና የፖሊቲካ ኃይል ያገኘው ወያኔ ከሥልጣን ከመገለሉ በኋላ ነው፤ ከሥልጣን (ከአድራጊ-ፈጣሪነት) የወረዱት የወያኔ ባለሥልጣኖች የትግራይ ተወላጆች መሆናቸው በአለፉት ሀያ ሰባት ዓመታት በኢትዮጵያውያን (ሰብአ ትግራይን ጨምሮ) ላይ የደረሰውን ግፍ ሰብአ ትግራይ ሰርዘውታል ማለት ነው ወይስ የተፈጸመው ግፍ በጎሣ ሚዛን ታይቶ ተናቀ የሚሰረዝም የሚናቅም አይደለም፤ በዚያው በትግራይ ውስጥ ብዙ ግፍ እንደተፈጸመ የሚመሰክሩ የትግራይ ተወላጆች ሞልተዋል፡፡

5. ግፍንና ግፈኛን ለማውገዝ የግፍ ተቀባዩ ወገን መሆን አስፈላጊ አይደለም፤ አእምሮና ኅሊና ያለው ሰው መሆን ብቻ በቂ ነው፤ ዛሬ የሰው ልጅ እንኳን ለሰውና ለእንስሳም በጣም የሚቀረቆርበትና ዘብ የሚያቆምበት ጊዜ ደርሰናል፤ ሰብአ ትግራይ እንዴት ከዚህ ውጭ ይሆናሉ በአለፉት ሀያ ሰባት ዓመታት ውስጥ በአጠቃላይ በኢትዮጵያ ውስጥ ግፍ እንደሚካሄድ ሰብአ ትግራይ አላዩም አልሰሙም ለማለት ይቸግራል፤ በሌላ በኩል በወያኔ ዘረኛ አገዛዝ ሰብአ ትግራይ በሙሉ ተጠቃሚዎች ነበሩ የሚል ሐሜት አለ፤ ስለዚህም የግፍ አሳላፊዎች እንጂ የግፍ ተቀባዮች አልነበሩም የሚባለው ልክ ነው ልንል ነው፤ በበኩሌ ይህንን የመጨረሻውን አስተያየት ለመቀበል በጣም ያዳግተኛል፤ ለማንኛውም ሰብአ ትግራይ በቅርቡ እውነተኛ መልሱን እንደሚሰጡን እተማመናለሁ፡፤
6. የቀዳማዊ ኃይለ ሥላሴ ባለሥልጣኖች ፍርድ ቤት የመቅረብ መብታቸው ሳይጠበቅላቸው በአስከፊ ሁኔታ እየተጨፈጨፉ አልቀዋል፤ የደርግ አባሎች በፈጸሙት ግፍ ተከስሰውና ተከራክረው ተፈረደባቸው፤ በምሕረት ወጡ፤ አሁን ደግሞ የወያኔ ባለሥልጣኖች ተራ ሆነ፤ የወያኔ ተራ ሲደረስ ትግሬነታቸው ተነሣ፤ ሁሉም የትግራይ ተወላጆች መሆናቸው ከተከሰሱበት ወንጀል አንዱ ይመስለኛል፤ ወያኔ የሥልጣን መሰላሉን ለመውጣት ትግሬነትን መሣሪያ አድርጎ እንደተጠቀመበት እውነት ነው፤ አሁን መውረድ ግዴታ ሲሆን የወጡበትን መሰላል መካድ አይቻልም፤ የወያኔ ባለሥልጣኖች ከአለፉት ሁለት አገዛዞች የሚለዩት በወያኔ ዘረኛነት ብቻ ይመስለኛል፤ ስለዚህም ዛሬ ለፍርድ የሚፈለጉት ትግሬዎች በመሆናቸው አይደለም፤ የሚፈለጉት ትግሬነትን የዘረኛነት ሥልጣን መሠረት አድርገው ፈጽመዋል በተባሉት ወንጀሎች ነው፤ ትግሬነት ከወያኔ ወንጀል ውጭ ነው፤ ፍርዱ በሥርዓት ከተካሄደ ከወያኔ ባለሥልጣኖች ጋር በወንጀል ተያይዘው የሚቆሙ የሌሎች ጎሣዎች አባሎች ይኖራሉ፤ የነሱ ድርሻ በፍርድ ካልታየ የዘር አድልዎ ተፈጸመ ለማለት እንችላለን፤ ይህ አድልዎ ሐቅ ቢሆንም የወያኔን ባለሥልኖች ወንጀል ወደትግሬነት አይለውጠውም፤ ስለማይለውጠውም አይሰርዘውም፤ ወንጀለኛነነት ከትግሬነት ተለይቶ ብቻውን ይቆማል፤

7. ሰብአ ትግራይ አክሱም ጽዮንን አቅፎ የወንጀል ምሽግ መሆን አይችልም፤ ሰብአ ትግራይ አክሱም ጽዮን የዕርቅና ይቅር የመባባል መንፈሳዊ ኃይል እንጂ የወንጀለኞች ምሽግ እንደማትሆን ያውቃሉ፤ በኢትዮጵያውያን መሀከል አለመግባባት ሲከሰት በሰላማዊ መንገድ በንግግርና በክርክር፣ በውይይትና በምክክር መፍትሔ ማግኘት ከከፍተኛ ጥፋትና ደም መፋሰስ እንደሚያድን ይታመናል፤ ስለዚህም የሰብአ ትግራይ ምርጫ ከወንጀል ተነጥሎ ከአክሱም ጽዮን ጋር መቆም ነው፡፡

Posted in አዲስ ጽሑፎች

የፖሊቲካ ጉዳዮችና የፖሊቲካ ፓርቲዎች

መስፍን ወልደ ማርያም

ኅዳር 2011 (ቦስተን)

 

በብዙ አገሮች የሠራተኞች ጉዳይ፣ ማለት የኢንዱስትሪ ሠራተኞች፣ ራሱን የቻለ የፖሊቲካ ፓርቲ የሚቋቋምበት ነው፤ በአንዳንድ አገሮችም የገበሬዎች፣ የቡና አምራቾችም ማኅበር ይታያል፤ ይህ በኢትዮጵያ የማይታየው ለምንድን ነው@ ለእኔ ግልጽ ነው፤ ፓርቲ የሚመሠርቱት ሁሉ ከሠራተኞች ጋር ምንም ግንኙነት የሌላቸው ናቸው፤ ከዚያም በላይ ሠራተኞቹ ገና ነጻ ያልወጡ ስለሆኑ ማኅበር የማቋቋም ዝንባሌ የላቸውም፡፡

ለነገሩ የሠራተኞች ማኅበር በኢትዮጵያ ታሪክ አለው፤ ቢያንስ የምድር ባቡርን ያህል ታሪክ አለው፤ ከኢጣልያ ወረራ በኋላ ላለው ታሪክ እኔም አለሁበትና ትንሽ ልናገር፤ በረከተ አብ ሀብተ ሥላሴ የቅርብ ጓደኛዬ ነበር፤ ነበርን አጥብቁልኝ! ሆነ ብዬ ያቀረብሁትና ጓደኛ ያደረግሁት እኔ ነኝ፤ በዩኒቨርሲቲም ሆነ በውጭ ስብሰባ ሲኖር ሁሌም ይገኛል ሁሌም ደፋር ጥያቄዎችን ይጠይቃል፤ አስተያየትም ይሰጣል፤ በዚህ ሳበኝ፤ የማንለያይ ጓደኞች ሀንን፤ ይህንን ያዙልኘ፡፡

በሌላ መስመር ደግሞ የትምህርት ቤት ጓደኛዬ፣ በተፈሪ መኮንንና በዩኒቨርሲቲ ኮሌጅ የኳስ ጨዋታ አለቃዬ በዚህ ጊዜ የየረርና ከረዩ አውራጃ ገዢ የነበረው ጌታቸው መድኃኔ ነበር፤ ወደሶደሬ ስሄድ ቢያንስ በሳምንት አንድ ጊዜ እንገናኝ ነበር፤ ስለወንጂ የስኳር ፋብሪካ ሠራተኞች እናወራለን፤ ሁለታችንም የሠራተኞቹ ወገን ነበርን፤ በዚያን ጊዜ በረከተ አብም ለሠራተኞች ወገንተኛነት አለው ብዬ አምን ነበር እንጂ በጎሠኛነት አልጠረጥረውም ነበር፤ ሁላችንንም አቄለን፤ ኤርትራም ገብቶ ኢሳይያስ አፈወርቂን ለማቄል ሞከረ፤ ከሸፈበት፤ እንደገና ፊቱን ወደቂሎቹ ያዞረ ይመስላል፡፡

ጌታቸው መድኅኔ በመጀመሪያ እኔን ከወንጂ ሠራተኞች ጋር በማስተዋወቅ ከመርዳት አላለፈም፤ በረከተ አብና እኔ ግን ከሠራተኞቹ መሪዎች ጋር በስልክና በድብቅ ስብሰባ እየተነጋገርን ሴራችንን ማካሄድ ጀመርን፤ ቢሮም አስፈለገና ተከራየን፤ ስልክና ወንበር የምንገዛበት ገንዘብ ስላልነበረ እኔ አንድ ሺህ ብር ተበድሬ ለስልክ፣ ለጠረጴዛና ለወንበር ሆነ፤ ግማሹ የተከፈለኝ ይመስለኛል፤ አብርሃም መኮንን የሚመሰክር ይመስለኛል፤ የማኅበሩን አርማ ሀሳቡን እኔ ሰጥቼው ስዕሉን የሠራልኝ ገብረ ክርስቶስ ደስታ ነው፤ ዋናው ስዕል አሁንም ከእኔ ጋር ያለ ይመስለኛል፡፡

አንድ ሌላ ሰው በግድ ማንሣት አለብኝ፤ ፊታውራሪ ዓምዴ አበራ፣ የራስ ካሣ የልጅ ልጅ፤ ከመሳፍንት ልጆች መሀከል ለእኔ እንደጓደኛ የነበሩ ጃራ መስፍንና (የራስ መስፍን ልጅና) ዓምዴ አበራ፤ በኤርትራ  ፤ የዓምዴ አጎት ልዑል ራስ ዓሥራተ ካሣ የኤርትራ እንደራሴ ነበሩ፤ ለእኔ ደግሞ የሠራተኞች ማኅበር ለቀረው ኢትዮጵያ ተቋቁሞ በኤርትራ ሳይቋቋም ቢቀር ችግር የሚያስከትል መሆኑ ስለገባኝ ከዓምዴ ጋር ዘወትር በራስ ሆቴል ምሳ ስንበላ እንገናኝ ስለነበረ ስጋቴን አነሣበት ነበር፤ የኔን ስጋት ለልዑል እንደሚያስተላልፍ እርግጠኛ ነበርሁ፤ እንዳሰብሁትም ሆነልኝ፤ በኤርትራ ሠራተኞች በኩል ያለውን ለማስተካከል ደግሞ አንድ ጊዜ አስመራ ሄጄ በድብቅ የሠራተኞች መሪዎችን በሆቴሌ አንድ በአንድ አነጋገርሁ ምክሬ ቀላል ነበር፤ ለጊዜው የፖሊቲካ ምኞታቸውን ያዝ አድርገው በእንጀራቸው ላይ እንዲያተኩሩ ነበር፤ ይህም ተሳካና የኢትዮጵያ ሠራተኞች ማኅበር ተመሠረተ፡፡

ለጥቂት ወራት ሆያ ሆዬ ተባለ! መሪዎቹ እነአብርሃምና በየነ እየተጋበዙ ውጭ መሄድና አለቆቻቸውን የሚያስንቅ ሱፍ ልብስ መልበስ ጀመሩ፤ አብርሃም መኮንንን ኮሚዩኒስት ነው በማለት ከፕሬዚደንትነቱ ሻሩትና በየነን ሾሙት፤ የሲ አይ ኤ ቁጥጥር ሙሉ ሆነ፡፡

ችግሩ እየበዛ ሲሄድ ቀስ እያለ ሲ አይ ኤም ተደባለቀ፤ ለመቋቋሚያ ሲ አይ ኤ የላከውን ትንሽ ገንዘብ በረከተ አብ መሬት ገዛበት፤ በኋላ ቤት ሠራበት፤ መርማሪ ኮሚስዮንን አቂሎ ብዙ ሺህ ብር ተቀብሏል፤ ካላጠፉት ይህ በመርማሪ ኮሚስዮን ተመዝግቦ ያለ ነው፤ ግራም ነፈሰ ቀኝ ማኅበሩ እየተጠናከረ ሲሄድ ሲ አይ ኤ ከሜክሲኮ አደባባይ ከፍ ብሎ የሚገኘውን ሕንጻ አስሠራልን፤ ይህ በሚሆንበት ጊዜ በየነ የሚባል የከባድ መኪና ነጂ፣ መስፍን የሚባል ኤርትራዊት አግብቶ የኤርትራ ስሜት ያዳበረ የአድዋ ልጅ፣ ፍሥሐ ጽዮን የሚባልና አንድ ሌላ ስሙን የማላስታውሰው የኤርትራ ተወላጆች ተመልምለው የሠራተኛ ማኅበሩን ተረከቡት፤ ሲ አይ ኤ ከዚህ ቡድን ጋር ለመኖሩ ፍንጭ የሚሰጠን መስፍን፣ ፍሥሐ ጽዮንና ስሙን የማላስታውሰው ሌላው ሦስቱም የዓለም የሠራተኞች ማኅበር ባልደረቦች መሆናቸው ነው፤ በየነም በዚያው ዓለም-አቀፍ መሥሪያ ቤት አማካሪ ቢጤ ሆነ፤ የሚደንቀው ነገር እስከዛሬ ድረስ የኢትዮጵያ ሠራተኞች ማኅበር ታሪክ ተብሎ የሚነገረው በበየነ ብቻ ነው፤ ሌሎቹን ምን እንደነካቸው እግዚአብሔር ይወቅ፤ ብዙዎቹን በመንገድ ላይ በድናቸውን አያለሁ፤ አብርሃምም በባምቢስ ሲሠራ አየው ነበር፡፡

ደርግ የሠራተኞች ፓርቲ በሚል አስቂኝ ስም ሠራተኛውን ጨፍልቆ ተነሣ! የሠራተኛውን ማኅበር ጭራሹኑ አዳከመው፤ የወያኔም አገዛዝ ከሥራ ይልቅ ዘር ላይ በማተኮሩ የሠራተኛ ጉዳይ አበቃለት፡፡

ዛሬም አንድም የፖሊቲካ ቡድን ስለሠራተኞች የሚናገር አልሰማሁም፡፡

 

Posted in አዲስ ጽሑፎች