ኢትዮጵያና ዓቢይ

መስፍን ወልደ ማርያም
ጥቅምት 2012

የገናና ጥንታዊ ታሪክ ባለቤት፣ ኩራትንና ክብርን የኑሮው መሠረትና መለያው አድርጎ የኖረ ሕዝብ፣ ቃር ቃር በሚል የባዕድ የአገዛዝ ፍልስፍና ለሀምሳ ዓመታት ያህል በውርጋጦች ተገዛ፤ የታላላቅ ሰዎች አገር የድንክዬዎች አገር ሆነ፤ ችጋር፣ ውርደት፣ ውድቀት፣ የሕዝቡ መታወቂያ ሆነ፡፡
እግዚአብሔር የኢትዮጵያን ሕዝብ ጸሎት ሰማ፤ ዓቢይ አህመድንና ለማ መገርሳን ኮርኩሮ ቀሰቀሰ፤ ቀስቅሶ አሰማራ፤ አሰማርቶ ከውስጥም ከውጭም አቀጣጠለ፤ ትንሣኤ አቆጠቆጠ፤ አረንጓዴ ብቅ አለ፤ የተስፋ ጮራ ፈነጠቀ፤ እሾሁ ጠወለገ፤ ኢትዮጵያ ዓቢይን ይዛ ቦግ አለች፡፡
ጥያቄው፡– ዓለም-አቀፍ ሽልማቱ የኢትዮጵያን ሁለንተናዊ እድገት የሚያስከትል ይሆናል? ወይስ ለዓቢይ ዝና ምንጣፍ ይሆናል?
ለማናቸውም ከዓቢይ ጋር በክብር ቆመን ስናጅበው ደስታ ይሰማናል፤ የሚተክዙ የኢትዮጵያ ጠበኞች ናቸው፡፡
ዶር. ዓቢይ ያበርታህ!

Advertisements
Posted in አዲስ ጽሑፎች | Leave a comment

ሶደሬ–ዛሬና ትናንትና

 

መስፍን ወልደ ማርያም
መስከረም 2012

ከሶደሬ ጋር የተዋወቅሁት የዛሬ አርባ አምስት ዓመት ግድም ነው፤ አብሮ አደጌ ጌታቸው መድኅኔ የየረርና ከረዩ አውራጃ ገዢ ነበር፤ እሱ ቤት እያደርሁ ሶደሬ እሄድ ነበር፤ በዚያን ጊዜ ሶደሬ ባዶ ቦታ ነበር፤ የጠበል ሙቅ ውሀ መታጠቢያ ነበረ፤ ባለቤት አልነበረውም፤ የሕዝብ ነበር፤ በጭራሮ ታጥሮ ማንም ሰው ደሀ ሆነ ጌታ ያለምንም ክፍያ ገብቶ በአግዚአብሔር ጠበል እንደልቡ ይጠመቅ ነበር፤ የአውራጃ ገዢው ጌታቸው ሁኔታውን በቅርብ እየተከታተለ እንዲጠበቅ ያደርግ ነበረ፤ ሶደሬ ደሀና ጌታ የማይለይበት የእግዚአብሔርና የሕዝብ ሃይማኖታዊ ከመሬት የሚፈልቅ ፍል ውሀ ነበረ፡፡
ሁሉንም ነገር የመሸጥና የመለወጥ አባዜ ሲጀመር፣ እግዚአብሔርም፣ ሕዝብም ከሶደሬ ወጡ፤ መንግሥት የሚባል ድርጅት ተንሰራፍቶ ያዘው፤ ሥልጣንና ጉልበትን አደባልቆ በመጨበጥ ደሀውን ሕዝብን እግዚአብሔር ከሰጠው ፈውስ ለዩት፤ በመንግሥትና በሕዝብ ስም ሶደሬን ጉልበተኞች በሉት፤ ጋጡት ማለት ይሻላል፤ ቤተ ክርስቲያንም ጉልበት አጥታ ይሁን ሸሪክ በላተኛ ሆና ይሁን ባይታወቀም፣ የደሀው አጋር ስትሆን አትታይም፤ ዛሬ ደሀ ሶደሬ ለመግባት ከሰማንያ አስከመቶ ብር ይከፍላል፤ ውሀ በጠርሙስ ይዞ ከመጣ ስምንት ብር ይከፍላል፤ ርካሹ ክፍል 860.00 ብር ነው፡፡
አግዚአብሔር ያያል፤ አይቶም ይቆጣል፤ ተቆጥቶም አዋሽን ያስቆጣል፡፡
ሰውረነ ከመዓቱ!

 

Posted in አዲስ ጽሑፎች

ማንነት

መስፍን ወልደ ማርያም
ኅዳር 21/2006
በ1996 ዓ.ም. የክህደት ቁልቁለት በሚል ጽሑፌ ውስጥ ‹‹ማንነት ምንድን ነው፤ በሚል ንዑስ ርእስ ስር ከገጽ 98 ጀምሮ በተቻለኝ መጠን አፍታትቻለሁ፤ የሪፖርተር ጋዜጠኛ ይህንን ለማንበብ ጊዜ አላገኘም፤ ወይም የተገለጠለት ዱሽ ቅንጫቢ በቅቶት ይሆናል፤ የምጠቅሰውም ለሱ ሳይሆን ለሌሎች ነው፡፡
በቅርቡ በፌስቡክ ላይ አንድ አውቀቱ ይሁን ጤንነቱ፣ ወይም ኪሱ የተቃወሰበት ሰው በትግርኛ ስለማንነት ጽፎ ነበር፤ ከዚህ በፊትም ጽፎ አስተሳሰቡ ሁሌም የተወላገደ በመሆኑ አልፌው ነበር፤ አሁን ደግሞ ሲጽፍና በአንዳንድ የሱ ቢጤዎች አበጀህ! አበጀህ! ሲባል ሳይ አደገኛነቱን ተገነዘብሁ፤ አንዱን ጎባጣ ሀሳብ ቶሎ ካላስተካከሉት ብዙ ጎባጦችን ያፈራል፤ የተጣራና ቀና የሆነ ሀሳብን ለመግለጽ በጣም ያስቸግራል፤ ማሰብ መጨነቅን፣ ማበጠርን፣ ማጣራትን ይጠይቃል፤ አፍ እንዳመጣ መልቀቅ ቀላል ነው፤ በተለይ የሚዳኝ ከሌለ!
በመጀመሪያ ሀሳብን ለመግለጽ የተመረጠው ቋንቋ ጠበብ ያለና የተፈለጉ አድናቂዎች ዘንድ ለመድረስ ብቻ ከተፈለገ ሀሳቡም እንደቋንቋው ለተወሰኑ ሰዎች የተመጠነ ይሆናል፤ በዚህ ዓይነት የቀረበው ቅንጣቢ ሀሳብ በሌላ ቋንቋ ሊተረጎም አይቻልም፤ ደንቆሮነትን ማጋለጥ ይሆናል፤ ለምሳሌ በትግርኛ ‹‹ኢትዮጵያዊ ዝበሃል መንነት የለን፤›› የሚለውን ‹‹ኢትዮጵያዊ የሚባል ማንነት የለም፤›› በማለት፣ በእንግሊዝኛ ደግሞ ‹‹There is no identity called Ethiopian.›› ተብሎ ሊተረጎም ነው፤ እንግዲህ ይህ አወቀች፤ አወቀች ሲሏት መጽሐፉን አጠበች እንደተባለችው ሴትዮ፣ ወይም ደግሞ አላዋቂ ሳሚ እንትን ይለቀልቃል! የሚባል ነው፤ ‹‹ኢትዮጵያዊ ዝበሃል መንነት የለን፤›› ብሎ በትግርኛ የጻፈው ሰው የአለማወቁ አዘቅት ዓለምን በሙሉ የሚያናጋ መሆኑን አልተገነዘበም፤ (አሜሪካን፣ እንግሊዝ፣ ፈረንሳይ፣ ኢጣልያን … የሚባል ማንነት የለም ሊለን ነው፤) የመንደር ማንነትን በሁለት እጆቹ ይዞ፣ አእምሮውን በመንደር ማንነት ጨቅጭቆ በየፓስፖርቱ ላይ የማንነት መግለጫ ተብሎ የተሰየመውንና በዓለም አቀፍ ደረጃ የታወቀውን ማንነት ካደው፡፡
በፍጹም ያልገባውን የፈረንሳዩን ፈላስፋ፣ የሩሶን ሀሳብ አበለሻሽቶ ከቆሻሻ መጣያ ውስጥ ያገኘው ቡትቶ ሊያደርገው ይከጅላል! ከጥራዝ-ነጠቅም አጉል ጥራዝ-ነጠቅ! ትግራይን የመገንጠል ዓላማ ያለው ሰው በእውነትና በግልጽ ዓላማውን ቢያራምድ በበኩሌ አልደግፈውም እንጂ አልቃወምም፤ መብቱ ነው፤ ነገር ግን በሰንካላ አስተሳሰብና በተንኮል ወጣቶችን ለመመረዝ የሚፈልገውን ሰው አጥብቄ እቃወማለሁ፤ ትግራይን እንደኤርትራ ካስገነጠለ በኋላ እንደኤርትራ ለትግራይም የኢትዮጵያዊነት ማንነትንን ማገድ ይቻላል፤ ከዚያ በፊት ግን ተንኮል ይቅር፡፡
ኢትዮጵያዊነትን ለማጥፋት የሚደረገው ሙከራ አዲስ ኤደለም፤ ኢጣልያኖች በሰፊው ዘርተውት የሄዱት ጉዳይ ስለሆነ የአባቶቻቸውን ውርስ የሚከተሉ ዛሬም ይኖራሉ፤ ኢትዮጵያዊነትን ለማጥፋት ብዙ ገንዘብና ሌላም የሚከፍሉ ብዙ የተለያዩ ድርጅቶች መኖራቸው የታወቀ ነው፤ ዱሮ የኢጣልያ ወኪሎች ተጠቅመውበታል፤ ዛሬ ደግሞ ሌሎችም ተጨምረው ያንኑ ተልእኮ የሚያራምዱ አሉ፤ በየዋህነት እንደበፊቱ እንዳናስተናግዳቸው እንጠንቀቅ!
 
Posted in አዲስ ጽሑፎች

አማራ ዜጋ፣ ኦሮሞ ጎሣ

መስፍን ወልደ ማርያም
መስከረም 2012

የኢትዮጵያ ችግር ምንጩ ብዙ ነው፤ አንዱን የተረሳና መሠረታዊ ምንጭ አእምሮው በጎሠኛነት ከመንሸዋረሩ በፊት መጀመሪያ አንሥቶት የነበረው ተኮላ ሀጎስ ነው፤ ተኮላ ከወያኔ የተለየበት ዋና ምክንያት የወያኔ ስብስብ የመሳፍንትና የመኳንንት ልጆች በመሆናቸው የዴሞክራሲ መሥራቾች ሊሆኑ አይችሉም በማለት ይመስላል፤ የነገሥታቱ፣ የመሳፍንቱና የመኳንንቱ ልጆች ተራማጆች ነን ቢሉም፣ የማርክስ ተከታዮች ኮሚዩኒስቶች ነን ቢሉም የአባቶቻቸውን ምርቃትም ይሁን እርግማን የተሸክሙ ናቸው፤ ይህንን ሸክም የሚያወርዱበት አእምሮም ሆነ የማሰብ ጊዜው አልነበራቸውም፤ በነገሥታቱ፣ በመሳፍንቱና በመኳንንቱ ዘመን ሕዝብ በጥሩ ቤት ውስጥ እንዳይኖር፣ ያመረተውን እንዳይበላና የጠመቀውን እንዳይጠጣ፣ የፈተለውን እንዳይለብስ፣ በትእዛዝ ደሀ ሆኖ ይኖር ነበር፤ የዘመናችን ነገሥታት፣ መሳፍንትና መኳንንት የሕዝብን ደሀነት በሕገ መንግሥት ጸደቀ፤ ‹‹መሬት የሕዝብና የመንግሥት›› ነው ተባለ፤ ሕዝብም የለ! መንግሥትም የለ! ስለዚህ መሬት የጉልበተኛ ባለሥልጣኖች ሆነ! በለሥልጣኖች የሰማይ ጠቀስ ሕንጻዎችና የመሬት ባለቤቶች ሆኑ፤ የሚገበያዩትም በሚልዮን እየቆጠሩ ሆነ፤ እንደዱሮው ግብር የሚያበላ ባለመኖሩ ያልጾሙት ባለሥልጣኖች በሦስት መቶ ብር ዶሮ ሲፈስኩ ደሀዎቹ በሹሮ ይፈስካሉ፤ እግዚአብሔር ይህንን የማይመለከትና የማያስተካክል ይመስላቸዋል፡፡
ዱሮ ከሕዝቡ የዘረፉትን በዓመት አንዴና ሁለቴ ይደግሱና ለተወሰኑ በዓላት ግብር እያገቡ ደሀውን ያበሉት ነበር፤ በዚህ ግብር ላይ አይቶ የማያውቀውን ጮማ እየቆረጠና በአንነኮላ ጠላውንና ጠጁን እየጠጣ እገሌ ይሙት እያለ ሲምል ይኖራል፤
እኔ ያንተ አሽከር ያንተ ቡችላ፣
ኩፍ ኩፍ ይላል እንደጉሽ ጠላ!
እያለ ይፎክራል፤ እየፎከረ እርስበርሱ ይተላለቃል፤ ግን በኅብረቱ የአገሪቱን ነጻነት ጠብቆ ለእኛ ክብርንና ኩራትን አደረሰልን፤ ዛሬ ያጣነው ይህንን ውርስ ነው፡፡
በማይሆን መንገድ በማርክሳዊ-ሌኒናዊ ጎዳና መጥተን የጎሣ ተረተር ውስጥ ወድቀናል፤ የነገሥታቱ፣ የመሳፍንቱና የመኳንንቱ ሥርዓት በዓላማው ይለይ ይሆናል እንጂ በይዘት አንድ ናቸው፤ ሁለቱም አፋኞች፣ ሁለቱም ዘራፊዎች ናቸው፤ በነገሥታቱ፣ በመሳፍንቱና በመኳንንቱ ዘመን የኢትዮጵያ ሕዝብ ቁጥር በጣም ተንሽ ነበረ፤ በዚህም ምክንያት ችግር እንደዛሬው አስጨናቂ አልነበረም፤ ዛሬም ቢሆን የኢትዮጵያ ሕዝብ ቁጥር የተረጋገጠ ሆኖ አይደለም፤ ስለኢትዮጵያ ሕዝብ ቁጥር ስጽፍ ወደሀምሳ ዐመት ሆኖኛል፤ ዛሬ ደግሞ የጎሠኛነት ፉክክር ገብቶበት እውነት የራቀው ሆኗል፤ ሁለት ሚልዮን አማራ ጠፋ ተብሎ ያገኘው የለም፤ ስለዚህም በእርሻ ላይ የተመሠረተና የረጋ ኑሮ የሚኖሩት በከብት ርቢና በዘላንነት ከሚኖሩት ያነሰ ቁጥር አላቸው ይባላል፤ መረን መልቀቁ እዚህ ደርሷል፤
ለብዙ ምዕተ-ዓመታት ቋንቋ የፉክክር ምክንያት ሳይሆን ቆይቶ ነበር በተፈሪ መኮንን ትምህርት ቤት ጉሮሮዬ እስቲነቃ ሸረሬ በሎ ቶሌዳ እያልሁ የዘፈንሁት ዘፈኑም፣ ቋንቋውም የኔው የራሴ መስለውኝ ነበር፤ የኬኛ ቋንቋ ሳይመጣ! ዛሬ ዕድሜ ለሚስዮናውያን፣ ለተወናበደ የነጻነት ግንዛቤና በክህደት ላይ ለተመሠረተ የፈጠራ ታሪክ አማርኛና ኦሮምኛ ተናጋሪዎች የማይተዋወቁ ሆነዋል፤ ካለመተዋወቅም ይሻገራል፤ ወደጠላትነት ይጠጋል፤ ለመረዳት አስቸጋሪ ቢሆንም ኦሮምኛ ተናጋሪው በአማርኛ ተናጋሪው ውስጥ፣ አማርኛ ተናጋሪው በኦሮምኛ ተናጋሪው ውስጥ አለ፤ አንዱ ሌላውን አዝሎ እየኖረ ፉክክር! የአንዱ ደም በአንዱ ውስጥ አለ ቢባል ማንም አይከራከር፤ የቱ ያመዝናል? ደም ወይስ ቋንቋ? እሰከዚህ ድረስ ግራ ገብቶናል!
ለመሆኑ አብዲሳ አጋ በባዕድ አገርና በባዕድ ሰዎችና ባህል ውስጥ ሆኖ በአርበኝነት የተዋጋው ማን ሆኖ ምን ሆኖ ነው? ጄኔራል ጃገማ ኬሎስ? በነዚህ የሥልጣን ጥምና የእንጀራ አባቶቻቸው ሹክታ ባሰከራቸው ደንባሮች ምክንያት ለኢትዮጵያና ለኢትዮጵያ ሕዝብ ነጻነት የተሰውትን ኦሮሞዎች አንክዳቸውም፤ ልጆቻቸው ቢክዷቸውም ለእኛ አባቶቻችን መሆናቸውንና በለዕዳነታችንን አንክድም፤ የልጆቻቸው ክህደት ሌሎቻችን ያለንን ፍቅር ያጠነክርላቸዋል፤ ለኢትዮጵያ የሞቱት አሮሞዎች መንፈስና እውነተኛ ልጆቻቸው ተባብረው መሾጦዎቹን እንደሚያሸንፉ አልጠራጠርም፤ መሸጦ ወያኔዎችም ተሸንፈዋል፡፡
አማራ ነን ብለው የሚያጓሩት መሸጦችም ታሪክን የካዱና ለሀብትና ለሥልጣን ኢትየጵያን ለማመሰቃቀል የተነሡ ናቸው፤ ግፍንና ጭቆናን በሌላ ግፍና ጭቀና ለማስወገድ መጣር እስካሁን ድረስ ባለው ታሪካችን እንዳቃተን ያየነው ነው፤ ያንን ለመድገም መሞከር ድፍን ድንቁርና ነው፤ እሰካሁን ድረስ ያለው የኢትዮጵያ ታሪክ የግፍና የጭቆና ነው፤ በዚህ የግፍና የጭቆና ታሪክ ሌላው የኢትዮጵያ ሕዝብ ባያመልጥም አብዛኛው የኦሮሞ ባላገር ከሌላው የበለጠ ግፍና ብዝበዛ የደረሰበት መሆኑን መካድ አይቻልም፤ ግን ፖሊቲከኞች መረጃዎቻቸውን ለወሎም፣ ለትግራይም፣ ለጎጃምም ቢያዳርሱት የግፍና የጭቆና መሠረት ጎሣ ሳይሆን የተዛባ ሥርዓት መሆኑን ይረዱት ነበር፡፡
በአንዳንድ አውራጃዎችና ወረዳዎች እንዳጋጣሚ ሆኖ በሥልጣን ላይ የነበሩት ሰዎች የሚያስመሰግን ሥራ ሠርተዋል፤ በትግራይ ልዑል ራስ መንገሻ፣ በባሕር ዳር ፊታውራሪ ሀብተ ማርያም (ፊታውራሪነቱን እርግጠኛ አይደለሁም፤) በወላይታ ደጃዝማች ወልደ ሰማዕት፣ በመርሐቤቴ ዶር፣ ኃይለ ጊዮርጊስና አቶ ገብረ ሕይወትና ሌሎችም የማላስታውሳቸው ይኖራሉ፤ እኔም በጊምቢ ውሀ አስገብቻለሁ፣ ሀኪም እንዲኖራቸው አድርጌአለሁ፡፡
ከላይ ከገለጽኋቸው ውጭ በየትም አውራጃ ሆነ ወረዳ የአካባቢው ተወላጅ የሆኑ ሹማምንት ለሕዝቡና ለአገሩ የሚጠቅም ሥራ የሠሩ መኖራቸውን አላውቅም፤ የየአካባቢው ሰዎች ወሬኞቹንና ለነሱ እያሰቡ የሚሠሩላቸውን እየለዩ ማወቅ አለባቸው በጎሣና በሃይማኖት ሳቢያ መታለል አያስፈልግም፤ አንዱ አዲሰ ዘፋኝ ‹‹ታመናል›› እያለ ይዘፍናል፡፡
ከሁሉም በላይ ልዑል እግዚአብሔር ምስጋና ይድረሰውና ይቺን አገር ሲፈጥራትና ይህንን ሕዝብ ሲሠራው ከዳር እሰከዳር ጭቃ ወይም ድንጋይ አላደረገውም፤ መሬቱንም ይሁን ሰውን ሙሉ በሙሉ መሸጦ አላደረገውም፤እንደታየ ቦጋለ ያሉ የማይሸጡና የማይለወጡ የወላጆቻቸው ልጆች አሉ፤ ነበሩ፤ ይኖራሉም፡፡

Posted in አዲስ ጽሑፎች

ለውጡና … ሕዝብ

መስፍን ወልደ ማርያም

ሚያዝያ 2011

አንዳንድ ሰዎች ለውጥ የለም ሲሉ አንዳንዶቹ ደግሞ ስር-ነቀል ለውጥ ተደርጓል ይላሉ፤ ለእኔ ግን ከደርግ የመጀመሪያ ዓመት የሚመሳሰል እንዲያውም ከፍ ያለ ለውጥ አይቼበታለሁ፤ ሆኖም እዚህ አጉል ክርክር ውስጥ አልገባም፤ነገር ግን የተከታተልሁትን ያህል እንደገባኝ እኔ ለውጥ የምለውን ልናገር፤ በዘር ፖሊቲካ የተለያዩ ወንጀሎች እየተለጠፉባቸው ከዕድሜ ልክ እሰከሞት በአሻንጉሊት ዳኞች እያስፈረዱ እስርቤቶቹን ሞልተው እንደነበረ እናውቃለን፤ ዛሬ እነዚህ ሰዎች ሁሉ በነጻ በየቤታቸው ናቸው፤ ይህ ለብዙ ቤተሰቦች ለውጥ ነው፤ ከሁሉም በላይ ሀሳብን የመግለጽ ነጻነት ጋዜጦች፣ ራዲዮኖችና፣ ቴሌቪዥኖች እንደልባቸው እንዲጨፍሩ አድርገዋል፤ ይህም በሚልዮን ለሚቆጠሩ ሰዎች ለውጥ ነው፤ የፖሊቲካ ቡድኖች ሁሉ እንደልባቸው በነጻነት እየተሰበሰቡ ፐሮግራማቸውን መግለጽና መዘዋወር ችለዋል፤ እንዲውም አንዳንድ የፖሊቲካ ቡድኖች ለውጡ ያመጣውን ነጻነት ወደስድነት ለውጠውት ብዙ ጥፋትን ሠርተዋል፤ ስለዚህ የአገዛዙ ኃይል በለውጡ ምክንያት ሲላላ እኩይ ኃይሎች ይበረታሉ፤ እስከዛሬም ቢሆን እኩይ ኃይሎች እንደተጠናከሩ በመሆናቸው ብዙ ሰዎች መንግሥት መኖሩን ይጠራጠራሉ፡፡

የማስታወስ ችሎታችን ያነሰ በመሆኑና አዲስ ትውልድ በመፍላቱ አናስታውስ ይሆናል እንጂ ደርግ ሥልጣን ሲይዝ ከአንድ ዓመት ያህል በላይ መንግሥት አልነበረም ይባል ነበር፤ ጸሐፌ ትእዛዝ አከሊሉ በኢትዮጵያ ታሪክ ለመጀመሪያ ጊዜ ከጠቅላይ ሚኒስትርነት በፈቃዳቸው ሲሰናበቱ ወንበሩ ለብዙ ወራት ብዙዎችን እያጓጓ ባዶውን ተቀምጦ ነበር፤ ለጥቂት ወራት በጭንቀት የጠቅላይ ሚኒስትሩን ቢሮ በተከታታይ የያዙት ልጅ እንዳልካቸው መኮንንና ልጅ ሚካኤል እምሩ ነበሩ፤ጃንሆይ ከዙፋናቸው የወረዱት ጸሐፌ ትእዛዝ አከሊሉ ከጠቅላይ ሚኒስትርነት ከተሰናበቱ ከዘጠኝ ወራት በኋላ ነው፤ በመሀከሉ የልጅ እንዳልካቸውና የልጅ ሚካኤል ጠቅላይ ሚኒስትርነት እንደነበረ አልረሳሁም፤ ነገር ግን በልጅነት የተቀጩ በመሆናቸውና ፋይዳም ስላልነበራቸው ችላ ብያቸው ነው፡፡

ደርግ ሥልጣን ሲይዝ መንግሥት አልነበረም ቢባልም ሥርዓት አልባነትን የመቆጣጠሪያ ጉልበትና ቁርጠኛነት ነበረው፤ አሁን ግን የተፈለገው ከጉልበት ይልቅ ሕጋዊነት. ከዚያም አልፎ ፍቅር፣ ይቅር ባይነትና ሰላም በመሆኑ ለማኅበረ እኩያን ሁኔታዎችን ያመቻቸ ይመስላል፤ ስለዚህም በኢትዮጵያ ያለው ሥርዓት አልባነት ቢያንስ ለጥቂት ወራት የሚቀጥል ይመስለኛል፤ ይህንን የሥርዓት አልባነት ዘመን ለማሳጠር በሥልጣን ላይ ያሉት ከያዙት የክርስቲያን መንገድ የማይቃረን ዘዴ በቶሎ ቢፈልጉ ከብዙ ጥፋት እንድናለን፡፡     

    1. ባለሥልጠኖችና ለውጡ

ዛሬ በሥልጣን ላይ ያሉት ሰዎች የኢሕአዴግ አባላት ናቸው፤ ሁለቱም ዓቢይና ለማ የኦሕዴድ አባላት ናቸው፤ እንግዲህ ለውጥ አድራጊዎቹ ሁለቱም የኦሕዴድ አባሎች ናቸው፤ የብአዴን ሰዎች ጎልተው አልታዩም፤ እነዚህ ሁለት የኦሕዴድ ባለሥልጣኖች በአንድ በኩል ራሳቸውን ከአደጋ ለመከላከል በጣም ከባድ ጥረት ያደርጋሉ፤ በሌላ በኩል ለውጡን ወደፊት ለመምራት ይለፋሉ፤

የለውጡ ባለሥልጣኖች በሦስት ኃይሎች ተወጥረዋል።  በአንድ በኩል ሥልጣኑን የተቀማውና ያኮረፈው ቡድን ምቹ አጋጣሚ እየጠበቀ ሰላምን ያደፈርሳል፤ በየደረጃው በሥልጣን ላይ ያሉት ደግሞ እንዳይነጠቁ በየፊናቸው እንቅፋቶችን ይፈጥራሉ፤ በተጨማሪ ደግሞ ለውጡ ቀሰስተኛ ሆነብን እያሉ የሚጮሁ አሉ፤ ቆም ብሎ በማሰብ ፖሊሶችን፣ ዓቃብያነ ሕጎችን፣ ዳኞችን በሙሉ አስወጥቶ እንደሀገር መቀጠል እንደማይቻል መገንዘብ አያስቸግርም፤ በሌሎች የተለያዩ ሥራዎችም በወደቁት ባለሥልጠኖች የተሾሙት ሁሉ ስርስሩን መርዝ እየነሰነሱ የሚያደናቅፉ ናቸው፤  ትልቁ የለውጡ መሪዎች ፈተና በጎሠኞች መሀከል የተፈጠረው ፉክክርና ግጭት ነው፡፡

የለውጡ መሪዎች በአላቸው ችሎታ ሁሉ በሰላማዊ መንገድ ሕዝቡን መምራት ይፈልጋሉ፡፡

2. ምሁራንና-ለዉጡ

ምሁራን ማለትን በትክክል ያሳወቀን የለም፤ ስለዚህ እኔ ሆዱ ሰፊ የሆነና ስምንተኛ ክፍል ጨርሶ በፌስቡክ ላይ የሚጽፍ ሁሉ ምሁር ነው ብዬ እነሣለሁ፤ ከዚያ በላይ በአሥራ ሁለተኛ ክፍል በኩልም ይሁን በሌላ በአቋራጭ መንገድ የሚገኙትን የትምህርት መጠሪያ ጌጦች ሁሉ ከነዝባዝንኬያቸው የታቀፉ ሁሉ ምሁራን ናቸው፤ ቄንጠኛ ባርሜጣ ያደረጉና ጥቁር መነጽር የሚያደርጉትንም እጨምራቸዋለሁ፤ የሚሽሎከሎኩም ይኖሩ ይሆናል፡፡

አብዛኛዎቹ ምሁራን ለለውጡ ገለልተኞች አይደሉም፤ እንዲያውም አብዛኛዎቹ ምሁራን ለውጡ የመጣባቸው ናቸው፤ እነዚህ የአንጀራ ምሁራን በእንጀራቸው ለሚመጣ ነገር ዕድሜያቸውም ሆነ ምኞታቸው ለገለልተኛነት አያበቃቸውም፤ በአጠቃላይ ነባር ምሁራን ነባር ሁኔታው የተኙበት ነውና ለውጥን አይደግፉም፤ የእነሱን እንጀራ ለማያወፍር ለውጥ  ተቃዋሚ እንጂ ደጋፊ ሊሆኑ አይችሉም፤ በመሠረቱም የእንጀራ ምሁራን ከለውጥ ጋር የሚሰለፉት የተሻለ ወፍራም እንጀራ የሚያቀርብላቸው ሲሆን ብቻ ነው፡፡

አንዳንዶቹ በአማካሪነት፣ በሎሌነት፣ ወይም በአጨብጫቢነት ከመሪዎቹ አጠገብ ለመጠጋት ይፈልጉ ይሆናል፤ አንዳንዶቹ ሥራቸውን፣ ችሎታቸውን በደህና ዋጋ ለመሸጥ ይጥራሉ፤ አንዳንዶቹ ደግሞ መንጠላጠያ ጨብጠው ወደሌላ ዓለም ተምዠግዥጎ ለመብረር ይመኛሉ፤ በአገራቸው ተተክለው የሚቀሩ በጣም ጥቂቶች ናቸው፡፡

ለምሁራን ራሳቸውን ከፍ ለማድረግ የለውጡን መሪዎች ዝቅ አድርጎ መገመት መነሻቸው ይመስለኛል፤ ጥንት በአጼ ዘመን ካሣ ወልደ ማርያም የኃይለ ሥላሴ ዩኒቨርሲቲ ፕሬዚደንት እንዲሆን ሲሾም እኔ የኢትዮጵያ ዩኒቨርሲቲ መምህራን ማኅበር ፕሬዚደንት ነበርሁ፤ በዚህም የተነሣ ለካሣ የምሥራች ደብዳቤ እንጻፍለት ብዬ ሀሳብ አቀረብሁ፤ በዚያን ጊዜ የሰማሁት ተቃውሞ ዛሬ በነዓቢይ ላይ ከሚሰነዘሩት የተለየ አልነበረም፤ ‹‹እኛ የምናውቀውን እነሱ አያውቁም፤ እኛ የምናየውን እነሱ አያዩም፤ እኛ የምንሰማውን እነሱ  አይሰሙም፤›› ለድንገተኛ አዲስ ነገር በደመ ነፍስ እንዲህ ዓይነቱን አስተያየት ስንሰጥ እጅግም አያስደንቅም ይሆናል፤ ነገር ግን ሲውል ሲያድር አስተያየታችን ካልተሻሻለ ለውጡን ወደፊት ከመግፋት ይልቅ ወደኋላና ወደጠብ አጫሪነት የሚወስድ ይሆናል፤ የለውጡ መሪዎች ምሁራን ከሚባሉት ያላነሰ እውቀት እንዳላቸው ለመቀበል ትንሽ መመራመርና እውነቱን ማወቅ አስተያየታችንን ያቃናልን ነበር፤ እንዲያውም እንደዓቢይ አህመድ ያለ በብዙ መስኮች በቃሉ የማውረድ ችሎታ ያለው አላውቅም፤ ሊቅ የሚባሉት እንትና እንዲህ አለ፤ እንትና እንዲህ አለ በማለት የሠለጠኑ ናቸው፡፡

3. ሕዝብ

በአጠቃላይ በሕዝቡ በኩል ስለለውጡ ያለው ስሜት እኔ እንደምገምተው በቀል ነው፤ በተለያዩ ሁኔታዎች በድለውናል የሚሏቸውን ባለሥልጣኖች ከሥልጣን ማውረድ ዋናው ፍላጎት ይመስለኛል፤ ይህ ስሜት ወደወጣቶቹ ዘንድ ሲደርስ ኃይልና እልህ ጨምሮ ለግጭት ሊያደርስ ይችላል፤ የማይፈለጉት ባለሥልጣኖች ሁሉ በአንድ ጊዜ ከሥልጣናቸው ቢነሡ የሚከተለውን ትርምስ መገመት አያስቸግርም፡፡

ሕዝቡ እየተረገጠና እየተጠቃ ለዘመናት ይኖራል፤ በደሉንና ቂሙን ድብቅ አርጎ ይዞ ኖሮ የአገዛዝ ለውጥ ሲመጣ የትእግስት ቋቱ ከጫፍ ጫፍ ይተረተራል፤ ፍቅር፣ ውለታና ጉርብትና መቃብር ተቆፍሮላቸው ይገባሉ፤ የኢትዮጵያ ሕዝብ ቂሙን አይረሳም፤ ቂሙን ደብቆ በምሥጢር ይይዝና ለዘመናት ቆይቶ አጥቂ የነበረው ኃይል ጥቃት ሲደርስበት የኢትዮጵያ ሕዝብ እየፎከረና እልል እያለ በቀሉን ለመወጣት ይጥራል፤ በሰዎች ላይም ሆነ በንብረት ላይ የሚያደርሰው ጥፋት ከፍተኛ ነው፤ በእንደዚህ ያለው ጊዜ የኢትዮጵያ ሕዝብ ለበቀልና ለዘረፋ እየፎከረ ይወጣል፤ የሕዝቡ አትኩሮት ባለፈው በደሉና በበቀል ናፍቆቱ ላይ ነው፤ ወደኋላው እንጂ ወደፊት አያይም፤ የወደቀውን አገዛዝ በተሻለ ለውጦ የወደፊት ኑሮውን ለማሻሻል እንዲያስብ መወያየት ያልተለመደ ነው፡፡

ሦስቱም ሃይማኖቶች በነገሡባት አገር፣ ኢትዮጵያ፣   በታሪክ ጸሐፊዎች ሁሉ የክርሰቲያን ደሴት ትባል ነበር፤ ታሪኩን የጠቀስኩት ዓቢይን ለማስገባት ነው፤ ዓቢይ አህመድ በዓቢይ ስሙ ላይ አህመድን ጨምሮ ብቅ ሲል ያልተደነቁት ወሎዬዎች ብቻ ይመስሉኛል፤ ኢትዮጵያ የተደነቀችው ዓቢይ አህመድ ፍቅር፣ ይቅር ባይነት፣ ሰላም … እያለ ብርቅ የሆነበትን ክርስትና መስበክ ሲጀምር ነው! የእናቱ ወሎዬነት አደናቅፎበት አልፎት ይሆናል እንጂ ክርስትና በኢትዮጵያ ከተሰበከ ከሁለት ሺህ አምስት መቶ ዓመታት በላይ ሆኖታል፤ አበሻ ክርስትናን ያሸነፈው በሆዱ ነው፤ አበሻ ለሆዱ ያለውን ፍቅር ዓቢይ መማር ያስፈልገዋል፡፡           

ከተለያዩ የውጭ ኃይሎች ጋር የተቃቀፉ ኢትዮጵያውያን ስለኢትዮጵያ የወደፊት ሁኔታ እያጠቆሩና እያመረሩ ያወራሉ፤ ገና ካልደረሰችበት አፋፍ እያንከባለሉ ሊያወርዷትም ይዳክራሉ፤ ሲአይኤ ከሠላሳ ዓመታት በፊት የጠነሰሰውን የኢትዮጵያ ውድቀት ትንበያ ገና አሁን ያነበቡት ምሁሮች ያለማቋረጥ ዛሬ ያነበንቡታል፤ ኢትዮጵያን ትተው ሄደው አሁንም የዳቦ መብያቸው ኢትዮጵያ ነች፤ የፈረንጆችን ዓላማ ለማሳካት ኢትዮጵያን መደፍጠጥ ዳቦ የሚያበላ ሥራ አድርገውታል፤ ለውጡን ለመምራት፣ አቅጣጫውን ለማስለውጥ፣ ፍጥነቱን ለመቀነስ፣ አካሄዱን ለማደናቀፍ የሚጥሩ ክፍሎች በውጭ እርዳታ እንደልባቸው ይንቀሳቀሳሉ፤ ልናውቃቸው ይገባል፡፡

ኢትዮጵያ አጆቿን ወደእግዚአብሔር ትዘረጋለች፤ ይዞ ይደግፋታል!



Posted in አዲስ ጽሑፎች

የለማ መገርሳ ቁጣ

መስፍን ወልደ ማርያም
መጋቢት/2011

የለማ መገርሳን ቁጣ አንዳንድ ሰዎች እንደፖሊቲከኛ ትርኢት አይተውታል፤ ያለቀሱም አጋጥመውኛል፤ እኔ እንባዬ ጠብ አላለም አንጂ በዓይኔ ላይ አቅርሮ ነበር፤ ይህ ሁኔታ እጅግም አያስደንቅም፤ ኢትዮጵያውያን ስሜታውያን ነን፤ የኔም እንባ ተንጠልጥሎ የቀረበት ምክንያት አእምሮዬ ጥያቄዎችን አጎረፈልኝ፡፡
በተደጋጋሚ የሰማኋቸውን ልግለጽ፡
• ለማ መገርሳ ብዙ ሺህ ኦሮሞዎችን በአዲስ አበባ አስፍሯል፤
• በብዙ ሺህ የሚቆጠሩ ኦሮሞዎች የአዲስ አበባ መታወቂያ እየተሰቸጣው ነው፤
• ኦሮሞዎች እየተመረጡ ኮንዶሚኒየም (ቤት) ተሰጣቸው፤
እንድንግባባ በትክክል ሦስቱም ድርጊቶች መሆን ወይም አለመሆናቸው አንድ ነገር ነው፤ በኢትዮጵያ ዜጋዎች መሀከል በጎሣ ልዩነት የተነሣ አድልዎ መፈጸሙ ሌላ ነገር ነው፤ ሰዎችን ከቦታ ወደቦታ ማዘዋወሩ ብቻውን ወንጀል ሊሆን አይችልም፤ በተለያዩ ምክንያቶች በአጼ ኃይለ ሥላሴ ዘመንም፣ በደርግ ዘመንም ተደርጓል፤ አሁን ተደረገ ለተባለው ምክንያቱ ሌላ ሳይሆን በጎሠኛነት ላይ ለተመሠረተ ምርጫ መዘጋጀት ነው፤እንዲህ ከሆነ የኢትዮጵያን ፖሊቲካ ብቻ ሳይሆን ጨዋነታችንንም የሚያራቁት ድርጊት ነው፤ ግን ድርጊቱ መፈጸሙን ወይም አለመፈጸሙን በትክክል አናውቅም፤ ድርጊቱ ቢፈጸምም እውነተኛውን ምክንያት አናውቅም፤ በዚህ ምክንያት ነው ለማ መገርሳን ማስተባበል አስቸጋሪ የሚሆነው፤ ለማስተባበል የሞከሩ ብዙ ሰዎች አሉ፤ ነገር ግን በእኔ አስተያየት ከአሉባልታ የወጡ አይመስለኝም፡፡
አንድ ሰው በተለይ ዙሪያውን የተከበበበትን ጋሬጣ ሁሉ በጣጥሶ፣ የወያኔን ጭካኔ ተጋፍጦ፣ በአደባባይ በስብሰባ ላይ ለወያኔ ባለሥልጣኖች ልካቸውን የነገራቸውና የሀያ ሰባት ዓመቱን አፈና የደረመሰው ሰው እንደዚህ ምርር ብሎት ሲናገር ያሳዝናል፤ በጣም ያሳዝናል፤ የወያኔ ባለሥልጣኖችን ልብ አፍርሶ፣ ሐሞታቸውን አፍስሶ ፊታቸውን ጥቀርሻ ያለበሰው ሰው ሲያዝን ያሳዝናል፤ በስብሰባው ላይ ሲናገር ያስደሰተኝ በኢትዮጵያዊነቱ ነው እንጂ በኦሮሞነቱ አልነበረም፤ ሲያዝንም ያሳዘነኝ በኢትዮጵያዊነቱ ነው፤ በወያኔ ስብሰባ ላይ ሲናገርም ሆነ አሁን አዝኖ ሲናገር እሱንና እኔን ያያዘን ትልቁ የኢትዮጵያዊነት ገመድ ነው፤ ሁለቱንም ጊዜ የተሰማኝ ኢትዮጵያዊነቱ ነው፤ ከተሳሰርንበት ገመድ ወጥቼ ከምጠራጠረው ገመዱ ውስጥ ሆኜ አምኜው ብሳሳት ይሻለኛል፡፡
አጼ ኃይለ ሥላሴን ከዙፋናቸው ያወረዳቸው ማነው? የራሳቸው ሎሌዎች ናቸው፤ ሎሌዎቹ ራሳቸውን ነጻ አወጡና ጌቶች ሆኑ! ዓቢይና ለማም የወያኔ ሎሌዎች ነበሩ፤ ዛሬ ጌቶች ሆነዋል? አዝማሚያው የለም አልልም! የኢትዮጵያ ሕዝብ በሆነውና ባልሆነው እልል እያለና እያጨበጨበ ባለሥልጣኖችን ያባልጋል፤ ዓቢይ በእስክንድር ላይ የወረወረው ዛቻ ይህንን የሚያመለክት ነው፤ የእስክንድር ስሕተት እንዳለ ሆኖ፤ መሣሪያ የያዘ ሰው መሣሪያ በሌለው ላይ ጉልበተኛነቱን ሲያውጅ ዴሞክራሲ ዘሩ ይጠፋል፤ ዓቢይ ያየውን አደጋ እኔም አይቼዋለሁ፤ ጉልበት ያለው የተሻለ ዘዴ ለመፈለግ ጊዜውም ዝንባሌውም የለውም፤ ሕግ፣ ማንንም የማይምር ሕግና ልብ ብሎ የሚታዘብ ሕዝብ ሲኖር ጉልበት ዋጋ አይኖረውም::
ዓቢይና ለማ በአማርኛ ሲናገሩ የምንሰማው ጠንካራ ኢትዮጵያዊነት በኦሮምኛ ሲናገሩ በእኔው ድንቁርና ምክንያት አልሰማምና አስተያየት መስጠት አልችልም፤ ነገር ግን ስገምተው የሚወክሉትን ሰብአ ኦሮምያ ለማስደሰት ሲሞክሩ ኢትዮጵያዊነትና ኦሮሞነት ቢደባለቁ አያስገርምም፤

Posted in አዲስ ጽሑፎች

አንዲት የአሜሪካ ሴት ልጇን አንድ ሰካራም መኪና እየነዳ ሲሄድ ገጭቶ ገደለባት፤ እርር! ድብን! ብላ አዘነች፤ አልበቃትም፤ የአንድ ሰው ትግል ጀመረች፤ አሜሪካን አዳረሰችው፤ እናቶች ሁሉ ተሰባሰቡላት፤ ከዚያ ቀስ እያለ ሌሎችም ሁሉ እየገቡበት ትልቅ አገር-አቀፍ ንቅናቄ ሆኖ እየጠጡ መንዳት በሕግ እንዲከለከል አደረገች፤ በዚች በአንድ ሰው ብርታት አሜሪካ የተሻለ አገር ሆነ፤ በኢትዮጵያችን በየቀኑ ቤት እየፈረሰ ሰዎች እንደአበሻ አገር ቆሻሻ በየመንገዱ ላይ እየተጣሉ ሲያለቅሱ እናያለን፤ መንግሥት አለ? ማንም ምንም አያደርግም፤ መንግሥት አለ? ባለሥልጣኖቹም የማፍረስ ትእዛዛቸውን ያስተላልፋሉ፤ አፍራሾቹም ሥራቸው አድርገውት ያፈርሳሉ፤ መንግሥት አለ? እንዲያውም ለምዶባቸው ቅርስ የተባለውን የደጃዝማቹን ቤት አፈረሱት! መንግሥት ማለት አፍራሽ ግብረ ኃይሉን የሚቆጣጠረው ነው መሰለኝ!
ልፋ ያለው በሕልሙ ዳውላ ይሸከማል እንደሚባለው ሆኖ እስክንድር ነጋ የሚያለቅሱትን ሰዎች አስተባብራለሁ ብሎ ተነሣ፤ ጠጠር አንወረውርም እያለ! የፍቅር፣ የመደመር፣ የይቅር ባይነት ዲስኩር ትዝ ብሎት፣ የክርስቶስን ትምህርት አስታውሶ ለተገፉትና ተስፋ ለቆረጡት ተናገረ፤ በሕግ ተማመኑ ብሎ፤ ይለይልህ ብለው ራሱን አስፈራሩት! እኔ ሳውቅ እስክንድር ነጋ ሲታሰር ሲፈታ ሠላሳ ዓመታት የሆነው ይመስለኛል፤ አሳሪዎቹም ጉልበታቸውን ከጭንቅላታቸው አላወጡም! ታሳሪውም አልሰለቸውም! እኛም አልተለወጥንም!

Posted in አዲስ ጽሑፎች