ዶር. ዓቢይና አቶ ለማ

አንዳንዶች ሰዎች የዶር. ዓቢይንና የአቶ ለማን የለውጥ መሪነትና የለውጥ አራማጅነት ወደዜሮ ደረጃ ያወርዱታል፤ ክብሩን ለራሳቸው ማድረግ አምሮአቸው አይመስለኝም፤ እኛ በዜሮ ደረጃ ላይ ቆመን አንድ ሰው ቀድሞን አምስተኛው ሰማይ ላይ ሲቆም ያቁነጠንጠናል፤ በዚህም የተነሣ ኢትዮጵያ መሪ የማይበቅልባት ምድረ በዳ ሆናለች፤ ሁሉም በመጠላለፍ የተካነ ሆኖ ‹‹በርታ! አለሁልህ!›› የሚል አይገኝም፤ ዛሬ ለማና ዓቢይ ያለውን ኃይል ተጋፍጠው የከፈቱት የለውጥ ጎዳና ወያኔን አስደንግጦ በእነዚህ የለውጥ አራማጆች ላይ አደጋ ባንዣበበት ጊዜ የዓቢይንና የለማን ጎራ በማጠናከር ፋንታ ማዳከሙ ማንን እንደሚጠቅምና ማንን እንደሚጎዳ ትንሽ ብናስብበትና ሀሳባችንን ብናቃና አገሪቱን ከጥፋት ለማዳን እንችል ይሆናል፤ አስተሳሰባችንን በማቃናት ሁለቱን የእግዚአብሔር ስጦታዎች እንደግፋቸው፡፡

Advertisements
Posted in አዲስ ጽሑፎች

ሕዝብ የት ነው?

መስፍን ወልደ ማርያም
ግንቦት 2010
የሰሞኑ ወሬ የኢትዮጵያን አገዛዝ አመራር አደናጋሪ አድርጎታል፤ አንደኛ ከእስር ሊፈቱ የማይገባቸው ሰዎች ተፈቱ፤ ሁለተኛ ሹመት የማይገባቸው ሰዎች ተሸሙ፤ ሁለቱም አብዛኛውን ሰው ያበሳጫሉ፤ ከዚያም አልፎ የለውጡን ተስፋ ያደበዝዛል፤ በሁለቱም ላይ አብዛኛው ሕዝብ ላይ ያደረበት ስሜት አያስደንቅም፡፡
ነገር ግን አዋቂዎችና ምሁራን፣ ጉዳዩን በብዙ መልኩ እያገላበጡ የማየት ችሎታ ያላቸው ሰዎች ናቸው፤ እነዚህ ሰዎች የማይፈቱ ሰዎች በመፈታታቸውና የማይሾሙ ሰዎች በመሾማቸው ሊደነቁ አይገባም፤ እነዚህ ሰዎች በእውቀታቸውና በልምዳቸው ከጉዳዩ በስተጀርባ ያሉትን ተፎካካሪ ኃይሎች የሚያውቋቸውና የትግሉንም ልክ ከሞላ›ጎደል መረዳት የሚችሉ ናቸው፤ ስለዚህም የተጠቀሱትን ሁለት ጉዳዮች በተመለከተ በአዲሱ ጠቅላይ ሚኒስትር ላይ ሊደርስ የሚችለውን ከባድ ጫና የፖሊቲካ ተንታኞች ነን የሚሉት ሁሉ ሊስቱት አይገባም፤ ለውጥ በመካሄድ ላይ ነው፤ አላለቀም፤ ማለትም የደረጁና ሃያ ሰባት ዓመታት ሙሉ ሀብት ያካበቱ ቡድኖችና ግለሰቦች አሉ፤ የዓቢይና የለማ ወገኖች ገና ዳዴ እያሉ ነው፤ በተጨማሪም ነባሮቹ የደኅንነትና የጦር ኃይሎች አሏቸው ይባላል፤ አዲሶቹ ያላቸው በሕዝብ ላይ ያላቸው እምነት ብቻ ነው፡፡
ሕዝብ እንደልማዱ አድፍጧል፤ አሸናፊው ሲታወቅ እልል ለማለትና ለማጨብጨብ ተዘጋጅቶ ይጠብቃል፡፡
Posted in አዲስ ጽሑፎች

ጠቅላይ ሚኒስትሩና የኢትዮጵያ ፖሊቲካ

 

መስፍን ወልደ ማርያም

ሚያዝያ 2010

 

ዶር. ዓቢይና አቶ ለማ መገርሳ በኢትዮጵያ መድረክ ላይ መታየት ሲጀምሩ ኢትዮጵያ የተአምር አገር መሆንዋን አስታወስሁና እግዚአብሔር ፊቱን ወደኢትዮጵያ መመለሱን ተረዳሁ፤ ከዚያም በላይ ያለፈው ጠቅላይ ሚኒስትር እናቱን በመውቀስና በመመጻደቅ ጀመረ፤ አዲሱ ደግሞ እናቱን በማወደስ መጀመሩ ብቻ ሳይሆን በእግዚአብሔር ላይ ያለውን እምነት በአደባባይ ደጋግሞ በመግለጹ አከበርሁት፤ አከብረዋለሁ፡፡

ከዚህ በፊት ሦስት ጊዜ በፌስቡክ የጻፍሁትን ልድገመው፤››

 

አንድ፤ በ1965 በወሎ ችጋር ዘመን በቀዳማዊ ኃይለ ሥላሴ ዩኒቨርሲቲ መምህራንና ተማሪዎች እርዳታ ለማድረግ በምንሯሯጥበት ጊዜ አንዳንድ የኢሕአፓ አባሎች ለተራቡት እርዳታ መሰብሰብ አብዮቱ እንዳይመጣ ማድረግ ነው እያሉ ይቃወሙን ነበር፤ ነፍሱን ይማረውና አብርሃም ደሞዝና እኔ ተቆጥተንና አስፈራርተን አደብ እንዲገዙ አድርገናቸው ነበር፤ ዛሬ ደግሞ በዓቢይ ሹመት መደሰቴን በመግለጼ የሚሳደቡ አሉ፤ ስለዓቢይ የጻፍሁት ጠቅላይ ሚኒስትር ከመሆኑ በፊት ነበር፤ አሁን ግን ጠቅላይ ሚኒስትር ሲሆን ያደረገውን ንግግር አዳምጫለሁ፤ ስለዚህም ቀድሜ በተናገርሁት እጸናለሁ፤ የእግዚአብሔር ሰው ነው፤ አረመኔ አይደለም፡፡

ሁለት፤ በአሁኑ ጊዜ በዶር. ዓቢይ ላይ ብዙ ቅሬታዎች ይሰማሉ፤ ለእኔ እንደሚታየኝ ሁለት መነሻዎች ያሉ ይመስለኛል፤ አንዱ መነሻ ዓቢይ የተመረጠበት ሁኔታ ከወያኔ (ኢሕአዴግ) መመሪያ የወጣና ወደአልተሸበበ ነጻነት የሚያመራ መስሎ መታየቱ በወያኔ መንደር ሽብር እንደሚያስነሣ ሳይታለም የተፈታ ነው፤ ሁለተኛው የተለመደው የኢትዮጵያውያን የፖሊቲካ ባሕርይ ነው፤ የተፈለገው ለውጥ እስኪመጣ ድረስ ከመጠለያ ስር አሾልከው እያዩ ከደመናው በላይ ወጥተው የጠራ ሰማይ ለማየት የሚሞክሩ ናቸው፤ የደመናው ግርግርና ሽብር አይመለከተንም የሚሉ ይመስላሉ፤ ዓቢይ አንድ ሰው ነው፤ ዓቢይ ከነቡድኑ ትንሽና ደካማ ነው፤ ይህንን እውነት መገንዘብ ከተመልካችነት ወደቆራጥ ተሳታፊነት መሸጋገርን ይጠይቃል፤ የሚያስፈራውና የዳር አጨብጫቢነትን የሚጋብዘው ይህ ነው፤ የዳር አጨብጫቢነት ውስጥ ያሉት ሁሉ ወደተግባር ተሳታፊነት ቢሸጋገሩ የዓቢይ ዓላማ የማይሳካበት ምክንያት የለም፤ ካልሆነም ለድጋፍ የተገኘው ኃይል የታወጀውን ለመጠበቅም ይረዳል፡፡

 

ሦስት፤ ዶር. ሰማኸኝ፣ ያለህ ስጋትና ጥርጣሬ ይገባኛል፤ ነገር ግን ያለነው 27 ዓመታት ሙሉ ውል በሌለው በዘፈቀደ የተገመደ የመሀይሞች የፖሊቲካ ውስብስብ ውስጥ ነው፤ አንድ በልልኝ፤ ዓቢይ የኦህዴድ ሙሉም ባይሆን ሰፊ ድጋፍ አለው፤ የኦህዴድን ቅርጽም ልብ ብለህ ግንዛቤህ ውስጥ አስገባው፤ ሁለት በልልኝ፤ ከዚህ በተረፈ በሌሎች የኢትዮጵያ ክፍሎች (በስም የማላነሣቸው አውቄ ነው፤) ሊኖር የሚችለውን ድጋፍ ሙሉ በሙሉ ለመረዳት ዓቢይ 27 ዓመት ሙሉ በወያኔ የተፈተለውን የመንደር ፖሊቲካ መጋረጃዎች ሁሉ ቀዳዶ ሰው መሆንን ከኢትዮጵያዊነት ጋር ማዛመዱን ግምት ውስጥ ማስገባት ያስፈለልጋል፤ ይህ የብዙ ኢትዮጵያውያንን ቀልብ በኃይል ስቧል፤ ሦስት በልልኝ፤ የዓቢይን ልምዱንና ትምህርቱን ስናይ ለየዋህነት ቦታ ያለ አይመስለኝም፤ ከጎኑ ለማና ጓደኞቹም አሉ፤ አራት በልልኝ፤ አሜሪካም ደግፎታል፤ አምስት በልልኝ!

 

“““““““““““““““““““““““““““

ዶር. ዓቢይ በተለያዩ ስፍራዎች ያደረጋቸውን ንግግሮች በጥሞና አዳምጫለሁ፤ በተለይም ከሀብታሞች ጋር፤ አንድም ቦታ ሀሳቡ ሲደናገር ወይም ሲዛነፍ አልሰማሁም፤ በዚህም የእውቀቱን ስፋት፣ የአእምሮውን ምጥቀት፣ የኅሊናውን ጽዳት፣ የወኔውን ብርታት፣ የዓላማውን ጥራት፣ የዘዴውን ሥልጡንነት በጣም እጅጉን አደንቃለሁ፡፡

ለእኔ ኢትዮጵያ የሰውም ሆነ የአእምሮ ችግር ኖሯት አያውቅም የሚለውን እምነቴን አረጋግጦልኛል፤ የአገዛዝ ጫማ የኢትዮጵያውያንን ራስ ጨፍልቆ ረግጦ አመከነው እንጂ አለን፤ ደርግ ከአገዛዝ አወጣችኋለን ብሎ አሥራ ሰባት ዓመት ረግጦ ገዛን፤ ወያኔ ከደርግ አገዛዝ አወጣችኋለን ብሎ ይኸው እየረገጠ ሲገዛን ሠላሳ ዓመታት ሊሞላው ነው፤ አሁን ዶር. ዓቢይ አህመድና አቶ ለማ መገርሳ ወደአዲስ አቅጣጫ ሊመሩን የተዘጋጁ ይመስላሉ፡፡

ዶር. ዓቢይና አቶ ለማ በየትኛው መንገድ እንደሚመሩን ገና በትክክል ባናውቅም መድረሻቸው አሁን ካለንበት የተለየ እንደሚሆን ግልጽ አድርገዋል፤ ይህ አስተያየታቸው ተቃራኒ የሰላም ጥያቄዎችን አስነሥቷል፤ ሰላም ምን ማለት ነው@ በቀላል ምሳሌ ለማስረዳት፡… የዓየር አለመኖርና አደገኛነቱ የሚታወቀው ዓየር ሲታጣ ነው፤ ዓየር ሳይኖር ሞት፣ ሰላም ሳይኖር ሞት ነው፤ ጸረ ሰላም የሚሆነው ሬሳን ማንቃት ነው@ ወይስ ሞትን ማወጅ@ ሬሳን ማንቃቱን አብዮተኛነት የሚሉት አሉ፤ ሞትን ማወጅን የአስቸኳይ ጊዜ አዋጅ የሚሉት አሉ፤ በሁለቱም በኩል ለሰላም የሚደረገው ጩኸት ሰላምን የሚነሳ ነው፤ የሰላም ጠንቅ ሆነው ሰላምን መሻት የአገዛዝ ማዘናጊያ ዘዴ ነው፡፡

የአስቸኳይ ጊዜ አዋጁ እንዳለ ነው፤ ሆኖም አዲሱ ጠቅላይ ሚኒስትር ሹም-ሽር አድርጓል፤ በዚህ ሹም፣ሽር የወያኔ ቀኝ እጅ የሚታይ አይመስልም፤ ሆኖም ሹም-ሽሩ የዓቢይ የመጀመሪያ ደረጃ እርምጃ መሆኑ ነው፤ ለእኔ ቅር ያለኝ የሴቶች ቁጥር ማነስ ነው፤ በመጀመሪያው የወያኔ ስብሰባ ላይ ወያኔ አንድም ሴት አልነበረውም፤ ይህንን ጉዳይ ለመለስ ዜናዊ አንሥቼበት ነበር፤ በግዮን ሆቴል አንዲት (እንደነገረችኝ) የአሥራ አራት ዓመት ልጅ ቁመትዋን የሚያህል ጠመንጃ ተሸክማ አየሁ፤ አነጋገርኋት፤ ብዙ እንደእስዋ ያሉ ሴቶች ልጆች ነበሩ፤ በሐምሌው ጉባኤ ላይ አልተወከሉም ነበር፤ መለስ ዜናዊ ስሕተት መሆኑን አምኖ እንደሚታረም ነግሮኝ ነበር፤ በዚህ በኩል የዓቢይም ሹመት ከመለስ ዜናዊ እምብዛም አልተሻለም፡፡

አሁን በዓቢይ ላይ ከየአቅጣጫው የሚወርደው የነቀፌታ ናዳ ‹‹የአብዮታዊነት ውጥረት›› ከስድሳዎቹ እየተወራረሰ የመጣ የኩርፊያ ውጤት ይመስላል፤ የአጼ ኃይለ ሥላሴ አገዛዝ ሲወድቅ ስንት ወራት እንደፈጀ የማያስታውሱ ወይም የማያውቁ ሰዎች ዛሬ በሃያ አራት ሰዓት ለውጥ ማየት ይፈልጋሉ፤ ያውም እንደወያኔ ያለውን መዥገር ለማላቀቅ! በየካቲት 1966 ጸሐፌ ትእዛዝ አከሊሉ ስንብት አቀረቡ፤ ለጠቅላይ ሚኒስትርነት ጀኔራል ዓቢይ ታጩ፤ ልጅ እንዳልካቸው ተሾመ፤ አልቆየም፤ በልጅ እንዳልካቸው ተተካ፤ ከዚያ በኋላ ጀኔራል ተፈሪ በንቴ፣ ጀኔራል አማን ሚካኤል አንዶም ወንበሩ ላይ ለአጫጭር ጊዜዎች ወጥተው ወረዱና ኮሎኔል መንግሥቱ እስቲኮበልል ድረስ ተቀመጠበት፡፡

ዓቢይ ገና መጀመሩ ነው፤ ራሱ እንደተናገረው ‹‹የመጀመሪያ›› ሥራውን እየሠራ ነው፤ ገና አንድ እግሩን ብድግ በማድረግ ላይ ነው፤ መሮጥ ቀርቶ መራመድ አልጀመረም፤ ሊጠልፉት ያደፈጡ ብዙዎች ሳይሆኑ አይቀሩም፤ በያለበት እየዞረ ንግግር የሚያደርገውም ከአደገኛ ጥልፊያ ለመዳን ወገኖችን በመፈለግ ይመስለኛል፤ እኔ እንደምገምተው በዶር. ዓቢይ ላይ የከረረ ነቀፌታ የሚሰነዝሩት የቅርብ ደጋፊዎች ሊሆኑ የሚችሉት ይመስሉኛል፤ እንደተገነዘብሁት እስካሁን ዶር. ዓቢይ የነካው ቁስል በአጠቃላይ የወያኔን ሥልጣን፣ በተለይ ደግሞ የአማራን የወልቃይት አካል ነው፤ (በነገራችን ላይ የወልቃይት-ጠገዴ ጉዳይ ከአንደኛው የዓለም ጦርነት በኋላ በቱርክና በግሪኮች መሀከል በቱርክ የተሠራው ሸርና እስከዛሬ ሙሉ በሙሉ ያልተፈታው ችግር ግልባጭ ነው፤) ከጎሠኛ አመለካከት ከተወጣ ሁለቱም ሕመሞች የሚከስሙ ናቸው፡፡

የዜግነት ጉዳይ ያልገባቸው ፖሊቲከኞች ዛሬም ያሉ ይመስላል፤ የአንድ አገር ሕዝብን በዘር፣ በጎሣ፣ በሃይማኖት፣ በሥራ፣ ወይም በሌላ ማናቸውም ነገር ሳይሆን በሕግ ብቻ እንደዜጋ አንድ ሆነው የሚቆሙ ናቸው፤ዜግነት አንድን ሰው የአንድ አገር ሕጋዊ ባለቤት ያደርገዋል፤ አንድን ሰው ከሌሎች የዚያው አገር ዜጎች ጋር የአገር ሉዓላዊነትን እንዲጋራ ያደርገዋል፤ የአንድ አገርን ሕዝብ በሙሉ በአንድ የተደለደለ መድረክ ላይ ሊቆሙ ይገባል ብንል በዜግነት ነው፤ በሕግ ተሳስረዋልና በአንድ ዜግነት በቆሙ ሰዎች መሀከል የሕግ ልዩነት የለም፡፡

ገና ከአሁኑ በዓቢይ የቀናት አገዛዝ ጥሩ የለውጥ አዝማሚያዎች ይታያሉ፤ ዋናው በዜና ማሰራጫዎች ላይ የሚታየው ነው፤ በዚያው መጠን ሕዝቡም በነጻነት ሀሳቡን የመግለጽ ልምምድ የሚያደርግ ይመስላል፤ በዜና ማሰራጫዎቹ በኩልም የማታለሉ ዘዴ እየቀጠለ ይመስላል፤ በአንድ በኩል የነጻነት በር ሲከፍቱ በሌላ በኩል በር ይዘጋሉ፤ ለምሳሌ የሕዝብን ድምጽ ለማሰማት በሚል ሰበብ ከመንገድ የሚመርጧቸው ሰዎች እነሱ የሚፈልጉትን መልስ የሚሰጡትን ብቻ ይመሰላል፡፡

መጨረሻውን ለማየት ቢያንስ ስድስት ወራት እንጠብቅ፡፡

Posted in አዲስ ጽሑፎች | 1 Comment

የአማራ ጉዳይ

መስፍን ወልደ ማርያም
መጋቢት 2010

የአማራ ጉዳይ እንቆቅልሽ እየሆነ ነው፤ አማራ ነን እያሉ በስሜት የሚናጡት ሰዎች የሚጽፉትን ያነበበና አልፎ አልፎም አዳማጭ ሲያገኙ የሚናገሩትን የሰማ ከፕሮፌሰር ዓሥራት ጀምሮ የጎሣ ፖሊቲካ ፓርቲ ለማቋቋም የተደረገውን ሙከራ ሁሉ መክሸፉን አልሰሙም፤ አያውቁም፤ መለስ ዜናዊ ከጓደኞቹ ጋር የፈጠረውን ጭራቅ የኩራትና የዳቦ አባታቸው (ዓሥራት ሆዳም ያላቸውን) አድርገው ለመቀበል ዝግጁ ነበሩ፤ ሆኖም ፈልገው ፈልገው እስካሁን አላገኙትም፤ ሆዳሞች ሞልተዋልና የወያኔን ጭራቅ መፈለጉ አላቆመም፤ በወልቃይት ጸገዴ፣ በአርማጭሆ፣ በጎንደር፣ በደብረ ታቦር፣ በየጁ፣ በአምባሰል፣ በወሎ፣ በይፋት፣ በአንኮበር፣ በመንዝ፣ በመርሀቤቴ፣ በጅሩ፣ በምንጃር፣ … በጎጃም፣ በዳሞት፣ በባሕር ዳር፣ … እየፈለጉት ቢሆንም ገና አላገኙትም፤ የሚያስከብርና የሚያወፍር እንጀራ መብያ ያላገኙ ሁሉ የጎሣ ድርጅት ማቋቋሙ እንጀራና ክብር የሚያስገኝ እየመሰላቸው የሚደክሙ አሉ፤ ከደሀነትም አልፈው የመንፈስ ደሀዎች ናቸው፡፡
እስቲ ከሰሙና ከገባቸው ለመጨረሻ ጊዜ አማራ ምን ማለት አንደሆነ ከመምህራኑ ያገኘሁትን ላቀብላቸው፤
1. አማራ ማለት

1.2. ከሣቴ ብርሃን ተሰማ
‹‹የተመረጠ፣ ነጻነት ያለው ተውልድ፣ … ዐም ሕዝብ፣ ሓራ ሔር የወጣ ጨዋ፣ ነጻነት ያለው ወገን ወይም አሸናፊ፣ ድል ነሺ ዋና አለቃ ማለት ነው፤
1.3. አለቃ ደስታ ተክለ ወልድ ‹‹ዐም ሕዝብ፣ ሐራ ነጻ በተገናኝ ነጻ ሕዝብ ገዢነት እንጂ ተገዢነት የማይስማርው ማለት ነው፤ ዐማራነት ዐማራ መሆን ተገርዞ፣ ተጠምቆ፣ ማተብ አስሮ የሚኖር ነው፤
1.4. አለቃ ዓጽሜ አማራ ከወዴትም አልመጣም ጥሩ የላስቶች ወታደር፣ከየዓይነቱ የተጠራቀመ፣ ኃይለኛ፣ ግፈኛ፣ አድመኛ እውቀት ያለው ያልተማረ ጨካኝ ጭፍራ ነው፤
1.5. የአባ ዮሐንስ ትግርኛ/አምሐርኛ መዝገበ ቃላት ውስጥ አምሐራ ‹‹የኢትዮጵያ ሕዝብ ስም ነው፤›. የሚል ነው፤
1.6. ንቡረ እድ ኤርምያስ ዐማራ ማለት ‹‹በነጻነት የመኖርን ጸጋ ከእግዚአብሔር በቃል ኪዳን ላገኘው ከየነገዱና ከየጎሣው በጋብቻ፣ በልደትና በኅብረተሰባዊነት ተዋህዶ አንድ ፍጹም ሙሉ ዘር ለሆነው የኢትዮጵያ ሕዝብ የተሰጠ የኅብረ ነገድ ወይም የኅብረ ብሔር አጠቃላይ የባሕርይ መታወቂያ ስያሜ እንጂ የአንድ ጎሣ ስም አይደለም፡፡

ሰለጎሣ ማወቅና መረዳት የፈለጉ በጎሣነት የታወቁ ማኅበረሰቦች እያንዳንዳቸው አባሎቹን ሁሉ የሚያያይዛቸው የጋራ መሪ እንዳላቸው መገንዘብ፣ በዘፈናቸው፣ በስክስታቸው፣ በምግባቸውና በመጠጣቸው፣ በልብሳቸው … መመሳሰል እንዳሉባቸው ማወቅ ይጠቅማል፡፡ መረጃንና ማስረጃን ለመቀበል ለሚችል አእምሮ በተዘረዘሩት ላይ ጠለቅ እያሉ በማሰብ የአስተሳሰብ ጉድፍን ለማጥራት ይቻላል፡፡
አንድ ሌላ አማራ ነን ባዮቹ የሚያመልጣቸው ግንዛቤ አለ፤ ጎሠኛነት በወያኔና በሌሎች ላይ ሲታይ በጣም ያንገሸግሻቸዋል፤ እነሱ ግን ጎሠኛነትን በሌላቸው ጉልበትና በስድብ ለማስፋፋት ሲሞክሩ ምንም የአስተሳሰብ ቅራኔ አይታያቸውም፤ በአንድ በኩል ወያኔ ጎሠኛነትን አምጥቶ አንድነታችንን አደጋ ላይ ጣለው እያሉ እየጮሁ፣ በሌላ በኩል ደግሞ ጎሣን ለመፍጠርና የጎሣ ጦርነትን ለማፋፋም እሳት እያቀጣጠሉ ጨርቅ ሳይጥሉ ማበድ ይመስላል፡፡
ከዚህ በላይ የተጠቀሱት ሦስት ሊቃውንት እንደሚያስረዱት አማራ የአንድ ጎሣ ስም አይደለም አማርኛ ቋንቋ የአማራ የሚባል ጎሣ ነው በሌላ ጊዜ ይህንን ጥያቄ ለመመለስ እንሞክራለን፡፡

Posted in አዲስ ጽሑፎች
ከዚህ በታች የተጻፈውን ፕሬዚደንት ትራምፕ አለ ተብሎ  ፌስቡክ ላይ ያገኘሁት ነው፤-
 
  1. “ነፃነታችሁን ካገኛችሁ ከ50 ዓመታችሁ በኋላ ለሕዝቦቻችሁ አስፈላጊውን የመገናኛ ዘዴ ካልሠራችሁላቸው እናንተ ሰው ናችሁ? 
  2. እናንተ በወርቅ ላይ፣ በዕንቁ ላይ፣ በዘይት ላይ፣ በማንጋኒዝ ላይ፣ በዩራኒየም ላይ ተቀምጣችሁ ሕዝቦቻችሁ የሚበሉት ሳይኖራቸው ሲቀር እናንተ ሰው ናችሁ? 
  3. እናንተ በሥልጣን ላይ ሆናችሁ የጦር መሣሪያ ከባዕዳን ለመግዛትና ዜጎቻችሁን ለመግደል የማታመነቱ ከሆነ እናንተ ሰው ናችሁ? 
  4. የናንተ ማኅበረሰባዊ ዓላማ ሕይወታችሁን በሙሉ በሥልጣን መንበር ላይ መቆየት ከሆነ እናንተ ሰው ናችሁ? 
  5. እንደሚታደን አውሬ ዜጎቻችሁን የምትገድሏቸው ከሆነ ማን ያከብራቸዋል? ”                                    (ባለቤት ያቀለለውን አሞሌ ባለዕዳ አይቀበለውም!)
እነዚህ ሁሉ እውነቶች የሚያጠራጥሩ አይመስለኝም። ነገር ግን የሚያጠራጥሩ ነገሮች አሉ። የትራምፕ ዓላማ ምንድን ነው?
  • የአፍሪካ መሪዎችን ለማረምና ለማሻሻል ነው? 
  • የአፍሪካ መሪዎችን አዋርዶና አሸማቅቆ ታዛዥ ባሪያዎች ለማድረግ ነው? 
  • የአፍሪካን ሕዝቦች የነፃነትና የመብት ትግሎች ለማበረታታትና ለማጠናከር ነው? 
ትራምፕ ስለአፍሪካ መሪዎች የተናገረው እውነት የመሆኑን ያህል የትራምፕ ዓላማ የአፍሪካ ሕዝቦች ኑሮ እንዲሻሻል  አስተዋጽኦ ለማድረግ አይደለም። እንዲያውም አንድ መሠረታዊ እውነት ያለጥርጥር ሆን ተብሎ አለመነሳቱ የትራምፕን ዓላማ ከተደበቀበት ያወጣልናል። 
የአፍሪካ አገሮች በራሳቸው ገንዘብ መሣሪያ መግዛታቸው የማይካድ ቢሆንም አብዛኛውን መሣሪያ የሚያገኙት በርዳታ ነው። ዋናው የርዳታ ምንጭም አሜሪካ ነው። ከኮሪያ እስከ አፍጋኒስታን በሺዎች የሚቆጠሩ የብዙ አገሮች ሕዝቦች የሞቱበትና አካለ ጎዶሎ የሆኑበት የአሜሪካ መሣሪያ ነው። ዛሬም በኢራቅና በሶሪያ፣ በየመንና በአፍሪካ ቀንድ፣የሚካሄዱት ጦርነቶች ላይ የአሜሪካ መሣሪያዎች አሉ።
 
የትራምፕ ንግግር የአፍሪካ መሪዎችንn ለማሸማቀቅና ተከታዮቹ ለማድረግ የታቀደ ይመስላል። የአፍሪካ መሪዎች ነገሩን በትክክል ከተገነዘቡት ግዜ ሳይፈጁ ራሳቸውን ለማቃናትና አገሮቻቸውን ለማፅዳት ግዜው መድረሱን ማየት ይቻላል።  
Posted in አዲስ ጽሑፎች

እኔ ሰው ነኝ!

http://bit.ly/2DGN91P

 

Posted in አዲስ ጽሑፎች

የእግዚአብሔር መልእክት በነቢዩ ኢሳይያስ በኩል

መስፍን ወልደ ማርያም
ግንቦት/2009

‹‹ኑና እንዋቀስ ይላል እግዚአብሔር፤ ኃጢአታችሁ እንደአለላ ብትሆን እንደአመዳይ ትጸዳለች እንደደምም ብትቀላ እንደባዘቶ ትጠራለች፤ እሺ ብትሉ ለእኔም ብትታዘዙ የምድርን በረከት ትበላላችሁ፤ እንቢ ብትሉ ግን ብታምጹም ሰይፍ ይበላችኋል፤ የእግዚአብሔር አፍ ይህን ተናገሮአልና፡፡›› ኢሳ. 1/18.
በእግዚአብሔር ለሚያምን ሰው፣ እግዚአብሔር ሁልጊዜም፣ ለዘለዓለም ሙሉና የማይወዳደሩት ኃይል እንዳለው ለሚያምን ሰው፣ ለእግዚአብሔር ትናንትም፣ ዛሬም፣ ነገም አሁን መሆኑን ለሚያምን ሰው ‹‹ኑና እንዋቀስ›› (በእንግሊዝኛው “come now let us reason together) ማለት ለእግዚአብሔር ምን ያህል መውረድ እንደሆነ መገንዘብ የሚዳግት አይመስለኝም፤ የእንግሊዝኛው ትንሽ ሻል ያለ መስሎ ‹‹ኑና እንከራከር›› የሚል ቢሆንም ከመጨረሻው የላይኛው ዳኛ ጋር መከራከር የሚችለው ማን ነው? እግዚአብሔር ነው፤ ትልቁ ነገር እሱ ፈቀደ፤ ‹‹እንዋቀስ›› አለ!
መዋቀስ ዓላማ አለው፤ ለመግባባት ነው፤ ለመስማማት ነው፤ ለፍቅር ነው፤ ለሰላም ነው፤ ለመረዳዳት ነው፤ እንደመለስ ዜናዊ መንገዱን ጨርቅ ያድርግላችሁ ማለት ሲቻለው፤ ኑና እንዋቀስ የሚል ኃያል አምላክ ለእኛ ምን ያስተምረናል?
የእግዚአብሔር ቃል ኑና እንማከር በማለት አልቆመም፤ እሺ ብትሉ፣ ለእኔም ብትታዘዙ፣ የምድርን በረከት ትበላላችሁ፤ እንቢ ብትሉ ግን ብታምጹም ሰይፍ ይበላችኋል፤ የእግዚአብሔር አፍ ይህን ተናግሮአልና፡፡
እግዚአብሔር ለሰው ልጆች ትሕትናንና መወያየትን፣ መወቃቀስና መስማማትን ለማስተማር በነቢዩ በኢሳይያስ በኩል መልእክቱን አስተላለፈ፤ ዛሬ ይህ መልእክት ለእኛ ለኢትዮጵያውያን ይመስለኛል፤ ዛሬ ይህ የእግዚአብሔር መልእክት ለወያኔ ይመስለኛል፤ ዛሬ ይህ መልእክት ለወያኔና ለአጋሮቻቸው ይመስለኛል፡፡
በኢሳይያስ በኩል የመጣው መልእክት ግልጽ ነው፤ ምርጫው ‹‹የምድርን በረከት መብላት›› ወይም በሰይፍ መበላት ነው፡፡
የምድር በረከትን በሙሉ ሁሉ በጄ ሁሉ በደጄ ላለ ጥጋብ ላይ ነውና ይበልጥ አይታየውም፤ በዕብሪት ላበጠም ስለሰይፍ ቢወራ አያስፈራውም፡፡
እግዚአብሔር ‹‹እንዋቀስ›› ካለ እኛ፣ ገዢዎቻችንም ለሰላም ሲሉ ለፍቅር ሲሉ፣ ለልጆቸው ሲሉ፣ ለአገር ሲሉ ‹‹እንዋቀስ›› ቢሉ ያስከብራቸዋል እንጂ አያዋርዳቸውም፤ ታሪካቸውን ያሳምርላቸዋል እንጂ አያጎድፍባቸውም፤ መንፈሳዊ ወኔ ያላቸው፣ ልበ-ሙሉ ጀግኖች ያደርጋቸዋል እንጂ ፈሪ አያደርጋቸውም፤ አርቀው የሚያስተውሉ ብልሆች ያደርጋቸዋል እንጂ ጊዜያዊ ጮሌነት አይሆንባቸውም፡፡

Posted in አዲስ ጽሑፎች