መንገዳችን በፍጥነት ይቃና

መስፍን ወልደ ማርያም

መስከረም 2011

በብዙ ዓይነት ወንጀሎች የሚታሙት የወያኔ አዛዦች ሥልጣናቸውን እንደያዙ ከሥልጣን ወረዱ ቢባል ግራ ይሆናል፤ ነገር ግን ሆነ! በሕጋዊ ምርመራ ሳይጣራና ከሳሾቹን በፍርድ ቤት ሳይሞግት የሰው ልጅ እንደከብት ከመንገድ በጉልበተኞች እየተያዘ መታሰር የቀረ መስሎን ነበር፤ አልቀረም አሉ! ጉልበተኞች በወንጀላቸው ክብደት ከሕግ ይከለላሉ ይባል ነበር፤ አሁንም ያው ይመስላል! ያነበብሁትን በትክክል ካስታወስሁት በጥንታውያን ግሪኮች ሰርቀው መያዝ እንጂ መስረቅ ወንጀል አልነበረም (የምታስታውሱ አርሙት)፤ የምንመሳሰለው በጥንታዊነት ብቻ መስሎኝ ነበር!

ከዚህ ቀደም ጸጋዬ ገብረ መድኅን (ይመስለኛል) ተረግመናል ብሎ፤ ነበር፤ እኔንም መሰለኝ! ኢትዮጵያውያን መልካቸውን፣ ነብሮች ቆዳቸውን እንዴት ይለውጣሉ ያለው መልካችንን ነበር፣ ወይስ ጠባያችንን ማለቱ ነበር!

ነገሬ ሁሉ የጥንቶቹን አባትና እናት ይህንን የተሸከምነውን ጉድና ነውር ጫኑብን ለማለት እንዳመስላችሁ፤ እነሱ ሊጭኑብን የፈለጉት ክብርንና ኩራትን ነበር፤ ነገር ግን አህያ ወላጆቻችንን እያገለገለች ዱላን የመቻል ትእግስትዋና በዘመናት ለከፈለችው መስዋዕትነት ክብርንና ኩራትን ስትወርስ አበሻ ‹‹አባባ እግርዎትን!›› (ከቃሊቲ የደረጀ ሀብተ ወልድ ትምህርት ቤት የተገኘ እውቀት!) እያለ መለቃቀሙን መረጠ!

የወደቀ ከማንሣት የጣሉትን ማንሣት የሚያኮራና የሚያስከብር ይመስለኛል፤ የጣሉትን ማንሣት ራስን የማረም እርምጃም ነው፤ ራስን ማረም ራስን ማቃናት ነው፡፡

ላለፉት ሦስት ወራት የኢትዮጵያ ሕዝብ በፍቅር፣ በምሕረትና በይቅርታ፣ በመረዳዳትና በተስፋ ንግግሮችና በማይናቁ ድርጊቶች አንገቱን ቀና፣ ደረቱን ነፋ ማድረግ ጀምሮ ነበር፤ ለአዲስ ሥራና ለአዲስ እድገት በአዲስ መንፈስና ደበአዲስ ኃይል ታጥቆ እየተሰናዳ ነበር፤ ለማ መገርሳና ዓቢይ አህመድ የእግዚአብሔር መልእክተኞች መስለው የታዩበት ጊዜ ነበር፤ ነገር ግን በአጭር ጊዜ ውስጥ ላባቸው እየረገፈ ለብዙው ሰው ከመሬት መነሣት እያቃታቸው እየመሰለ ነው፡፡

የአገሩ ችግር ውስብስብ መሆኑ እየታወቀ ብዙ ቡድኖች የበለጠ ውስብስብ እያደረጉት ነው፤ ምክንያቱ የተሰወረ አይደለም፤ የሥልጣን ሰይፍና የጠገራ ብር ቀልቀሎ ነው፤ ሁለቱንም እየተስገበገቡ በመሻማት እርስበርሳቸው ለመጠፋፋት የሚተራመሱት ከራሳቸው በላይ ነፋስ ነው!

ለማና ዓቢይ አዲሱ የፖለቲካ ፍልስፍነናቸው ከሁለት ሺህ ዓመታት በላይ ዕድሜ እንዳለው ያውቃሉ፤ ሁላችንም እናውቃለን፤ ለማና ዓቢይ በስንት ወራት የሁለት ሺህ ዓመታቱን ትምህርት ሊያገባድዱ እንዳቀዱ የሚያውቁት እነሱና የላካቸው አምላክ ብቻ ነው፤ እንደጅምራቸው ከሆነ ግን ለማና ዓቢይም እንደክርስቶስ ከሁለት ሺህ ዓመታት በላይ ሳያስፈልጋቸው አይቀርም! እግዚአብሔር አቋራጩን መንገድ ይግለጽላቸው፡፡

ሕግና ሰይፍ የባሕርይ ዝምድና አላቸው፤ ዝምድናቸውም በጣም የጠነከረ ከመሆኑ የተነሣ አንዱ በሌለበት ሌላኛውም የለም፡፡

Advertisements
Posted in አዲስ ጽሑፎች

ተአምረ ኦሮሞ ወአማራ

መስፍን ወልደ ማርያም

ፍቅሬ ቶሎሳ ራሱን ከማናቸውም የጎሣ ቆዳ ገሽልጦ ወጥቶ፤ መጨረሻውን በቅጡ ሳያውቅ ከሀረር ተነሥቶ በአሜሪካ ዞሮ ኢትዮጵያ ገባ፤ በሁለት እጆቹ ኦሮሞንና አማራን በጋማቸው ይዞ አዛመዳቸው፤ የፍቅሬ ቶሎሳ ሀሳብ፣ እምነት፣ ሕልም (አንዳንዶች ቅዠት ይሉታል፤) ገና ባልታወቀ መለኮታዊ መንገድ ዞሮ ዞሮ ለማና ዓቢይ የሚባሉ ሰዎችን ያፈራ የኢትዮጵያ መሬት ላይ አረፈ፤ የኢትዮጵያን መሬት ከሰሜን እስከደቡብ፣ ከምሥራቅ እስከምዕራብ ነዘረው፤ ለማና ዓቢይ የሚባሉትን ሁለት ኢትዮጵያውያን ከአንድ መቶ ሚልዮን ሕዝብ መሀል ነቅሶ አውጥቶ አንቀረቀባቸው፤ ለማንና ዓቢይን አንቀርቅቦ አወጣና አንድ አደረጋቸው!

ዘር፣ ፖሊቲካ፣ ጥቅም፣ ሥልጣን፣ ጉልበት ወይም ሀብት አይደለም፤ እግዚአብሔር በረቂቅ ጥበቡ ፍቅሬን ከአሜሪካ ለማንና ዓቢይን እነሱ በማያውቁት መንገድ አገናኝቶ፣ እነሱ ባልገባቸው መንገድ አስማምቶ ሀሳባቸውን ከእውቀታቸው ጋር አዋኅዶ፣ እምነታቸውን ከተግባር ጋር ፈትሎ የኢተዮጵያን ሕዝብ በአዲስ ድርና ማግ እየሸመኑ ኢትዮጵያን የተስፋ አገር እያደረጉ ነው፡፡

የኢትዮጵያ ሕዝብ ሙሉ ትኩረቱንና ሀሳቡን ከጊዜያዊ ማሸነፍና እልልታ አሳልፎ ከፊቱ በተደነቀሩት ሁለት አቅጣጫዎች አነጻጽሮ መመልከት ያለበት ይመስለኛል፤ አንደኛው፣ በእልልታና በፉከራ እየሰከሩ መጨፈር ሲሆን፣ ሁለተኛው የወደፊቱን ችግርና መከራ፣ ምናልባት ከዚያም አልፎ የጎሣ እልቂትና የማይበርድ የዘር ጥላቻ የፈረካከሰው ማኅበረሰብ ከመፍጠር መታደግ ይሆናል፡፡

በማናቸውም ደረጃ ላይ አሁን ያሉ አመራሮች ትኩረታቸውን ከፈንጠዝያው ወደቀጣዩ መራራ ትግል ቢያዞሩት የኢትዮጵያን ሕዝብ ከአደጋ ከማዳንም አልፈው ኢትዮጵያውያን ሁሉ ሰው የመሆን ነጻነቶችና መብቶች የተከበሩባት አገርን ለመገንባት፣ በሰው ሳይሆን በሕግ ለሕግ የሚገዙባት አገር፣ ለሁሉም በእኩልነት ከተስተካከለ የኑሮ መተዳደሪያ ሥርዓት ጋር ሊገነቡ የሚችሉ ይመስላል፡፡

እንደገና ኢትዮጵያ የኮሩና የተከበሩ ሰዎች አገር እንድትሆን ከለማና ከዓቢይ ጋር ለትግል መሰለፍ ግዴታ ነው!!!

ሁሉም በአሸናፊነት እንዲኮራ የሚከፍለው ግዴታ ዛሬም ሆነ ነገ፣ በውድም ይሁን በግድ አይቀርም!!!!

ፈንጠዝያን ለኢትዮጵያ ሕዝብ በሙሉ ለሚመጣው የተሟላ ነጻነት እናቆየው!!!

Posted in አዲስ ጽሑፎች

የባድመ ጉዳይ

መስፍን ወልደ ማርያም
ሰኔ 2010

የባድመ ጉዳይ ምንጩ የኤርትራ መገንጠል ነው፤ ኤርትራ ከኢትዮጵያ ስትገነጠል ጎደሎ ሆነች፤ ኢትዮጵያም ጎዶሎ ሆነች፤ የኢትዮጵያና የኤርትራ ጎዶሎነት አንዱ ሌላውን የመፈለግ የተፈጥሮ ግዴታን አመጣ፤ ለሁለት የተከፈለ አንድ ባሕርይ ዘለዓለም ሲፈላለግ ይኖራል፤ ችግሩ ከሰዎቹ ነው፤ የባድመ ጉዳይ የሁለት ጎዶሎ አገሮች አንዱ ሕመም ነው፤መቼ ተጀመረ?


አንዳንድ ሰዎች ስለአልጄርስ ስምምነት ሲገልጹ የመንደር ስምምነት ያስመስሉታል፤ አንደኛ ስምምነቱ የተደረገው በተባበሩት መንግሥታት ጥላ ስር በተባበሩት መንግሥታት የመቋቋሚያ ሰነድ አንቀጽ 102 መሠረት ነው፤ ዋናው አደራጅ የተባበሩት መንግሥታት ዋና ጸሐፊ ሆኖ የተከናወነው በተባበሩት መንግሥታት ጽሕፈት ቤት ውስጥ ነበር፡፡


ሁለተኛ ለስብሰባው በእማኝነት የተገኙትና የፈረሙት የተባበሩት መንግሥት ድርጅት ዋና ጸሐፊ፣ የአውሮፓ ኅብረትና የአፍሪካ ኅብረት ዋና ጸሐፊዎች፣ የአልጂርያ ፕሬዚደንት፤ የአሜሪካ የውጭ ጉዳይ ሚኒስትር ናቸው፤ እንግዲህ እንደዚህ ያሉ ከባድ ከባድ እማኖች ተሰልፈውበት በዓለምአቀፍ መድረክ ላይ የተፈጸመን ስምምነት አሌ ማለት እንዴት ይቻላል? ከተቻለም ሙሶሊንን ወይም ሂትለርን መሆን ነው፡፡ 


ወያኔ/ኢሕአዴግ ኤርትራን ለማስገንጠል በሚዘጋጅበት ጊዜ የቀዳማዊ ኃይለ ሥላሴ ዩኒቨርሲቲ ተማሪዎች ለተቃውሞ ሰልፍ ወጥተው ነበር፤ በ,ያኔ ኢሰብአዊ የጭካኔ ጭፍጨፋ ሰልፉ ተቋረጠ፤ እንግዲህ በኤርትራና በባድመ ጉዳይ ውሳኔዎች በሚሰጡበት ዘመን ትንፋሹን ውጦ እስከዛሬ የቆየ ሕዝብ ዛሬ ከየት ፈልቶ ነው ተቃውሞ የሚያሰማው? ለነገሩ ከአለመኖር ወደመኖር መምጣት ሁሌም የሚያስደስት ነው፤ ትናንት የፈራ ዛሬ ቢደፍርም አያስከፋም፤ ታዝቦ ማለፍ ነው፡፡

Posted in አዲስ ጽሑፎች

የሰኔው ሰላማዊ ሰልፍ

መስፍን ወልደ ማርያም
ሰኔ 2010

እግዚአብሔር የኢትዮጵያን ሕዝብ ስቃይና መከራ አይቶ ዓቢይ አህመድን ፈጠረውና ወደኢትዮጵያ ላከው፤ ስለዚህም እንደአንድ ጠቅላይ ሚኒስትር ኑሮውን አደላድሎ በመኖር ፋንታ ከተሰየመበት ቀን ጀምሮ ሳያርፍ በየቦታው እየዞረ ፍቅርን ሲሰብክና እስረኞችን ሲያስፈታ ቆየ፤ ከዚያም በላይ ከጎረቤት አገሮች ጋርም በመወዳጀት እስረኞች ሁሉ እንዲፈቱ አደረገ፤ በቴሌቪዥንና በራድዮ ሕዘብ ነጻ አስተያየቱን እንዲገልጽ አደረገ፤ ከኤርትራ ጋር የእርቅ በር ከፈተ፤ ለግንቦት 7 እንዲሁ የእርቅ በር ከፈተ፤ የሕዝብን ኑሮ ለማሻሻል ውጥኖችን ነግሮናል፤ በየቀበሌውና በየፖሊስ ጣቢያው ንጹሓን የኢትዮጵያን ሕዝብ እያሰሩ ማሳቃየቱ እንዲቆም አድርጓል፤ በሦስት ወር ያህል ጊዜ ከዚህ በላይ እንዲሠራ ለመጠበቅ አንችልም፡፡
የፊታችን ቅዳሜ ጠቅላይ ሚኒስትርን ለመደገፍ ሰላማዊ ሰልፍ ይደረጋል፤በሰልፉ የሚሳተፍ እያንዳንዱ ሰው በጎኑ ያለው የሚያደርገውን ማየትና መቆጣጠር የሰልፉን ጤንነት ይሆናል፤ በሚያዝያው 30 !997 ቅንጅት የተጠቀመበት ዘዴ ነው፡፡

Posted in አዲስ ጽሑፎች

ዶር. ዓቢይና አቶ ለማ

አንዳንዶች ሰዎች የዶር. ዓቢይንና የአቶ ለማን የለውጥ መሪነትና የለውጥ አራማጅነት ወደዜሮ ደረጃ ያወርዱታል፤ ክብሩን ለራሳቸው ማድረግ አምሮአቸው አይመስለኝም፤ እኛ በዜሮ ደረጃ ላይ ቆመን አንድ ሰው ቀድሞን አምስተኛው ሰማይ ላይ ሲቆም ያቁነጠንጠናል፤ በዚህም የተነሣ ኢትዮጵያ መሪ የማይበቅልባት ምድረ በዳ ሆናለች፤ ሁሉም በመጠላለፍ የተካነ ሆኖ ‹‹በርታ! አለሁልህ!›› የሚል አይገኝም፤ ዛሬ ለማና ዓቢይ ያለውን ኃይል ተጋፍጠው የከፈቱት የለውጥ ጎዳና ወያኔን አስደንግጦ በእነዚህ የለውጥ አራማጆች ላይ አደጋ ባንዣበበት ጊዜ የዓቢይንና የለማን ጎራ በማጠናከር ፋንታ ማዳከሙ ማንን እንደሚጠቅምና ማንን እንደሚጎዳ ትንሽ ብናስብበትና ሀሳባችንን ብናቃና አገሪቱን ከጥፋት ለማዳን እንችል ይሆናል፤ አስተሳሰባችንን በማቃናት ሁለቱን የእግዚአብሔር ስጦታዎች እንደግፋቸው፡፡

Posted in አዲስ ጽሑፎች

ሕዝብ የት ነው?

መስፍን ወልደ ማርያም
ግንቦት 2010
የሰሞኑ ወሬ የኢትዮጵያን አገዛዝ አመራር አደናጋሪ አድርጎታል፤ አንደኛ ከእስር ሊፈቱ የማይገባቸው ሰዎች ተፈቱ፤ ሁለተኛ ሹመት የማይገባቸው ሰዎች ተሸሙ፤ ሁለቱም አብዛኛውን ሰው ያበሳጫሉ፤ ከዚያም አልፎ የለውጡን ተስፋ ያደበዝዛል፤ በሁለቱም ላይ አብዛኛው ሕዝብ ላይ ያደረበት ስሜት አያስደንቅም፡፡
ነገር ግን አዋቂዎችና ምሁራን፣ ጉዳዩን በብዙ መልኩ እያገላበጡ የማየት ችሎታ ያላቸው ሰዎች ናቸው፤ እነዚህ ሰዎች የማይፈቱ ሰዎች በመፈታታቸውና የማይሾሙ ሰዎች በመሾማቸው ሊደነቁ አይገባም፤ እነዚህ ሰዎች በእውቀታቸውና በልምዳቸው ከጉዳዩ በስተጀርባ ያሉትን ተፎካካሪ ኃይሎች የሚያውቋቸውና የትግሉንም ልክ ከሞላ›ጎደል መረዳት የሚችሉ ናቸው፤ ስለዚህም የተጠቀሱትን ሁለት ጉዳዮች በተመለከተ በአዲሱ ጠቅላይ ሚኒስትር ላይ ሊደርስ የሚችለውን ከባድ ጫና የፖሊቲካ ተንታኞች ነን የሚሉት ሁሉ ሊስቱት አይገባም፤ ለውጥ በመካሄድ ላይ ነው፤ አላለቀም፤ ማለትም የደረጁና ሃያ ሰባት ዓመታት ሙሉ ሀብት ያካበቱ ቡድኖችና ግለሰቦች አሉ፤ የዓቢይና የለማ ወገኖች ገና ዳዴ እያሉ ነው፤ በተጨማሪም ነባሮቹ የደኅንነትና የጦር ኃይሎች አሏቸው ይባላል፤ አዲሶቹ ያላቸው በሕዝብ ላይ ያላቸው እምነት ብቻ ነው፡፡
ሕዝብ እንደልማዱ አድፍጧል፤ አሸናፊው ሲታወቅ እልል ለማለትና ለማጨብጨብ ተዘጋጅቶ ይጠብቃል፡፡
Posted in አዲስ ጽሑፎች

ጠቅላይ ሚኒስትሩና የኢትዮጵያ ፖሊቲካ

 

መስፍን ወልደ ማርያም

ሚያዝያ 2010

 

ዶር. ዓቢይና አቶ ለማ መገርሳ በኢትዮጵያ መድረክ ላይ መታየት ሲጀምሩ ኢትዮጵያ የተአምር አገር መሆንዋን አስታወስሁና እግዚአብሔር ፊቱን ወደኢትዮጵያ መመለሱን ተረዳሁ፤ ከዚያም በላይ ያለፈው ጠቅላይ ሚኒስትር እናቱን በመውቀስና በመመጻደቅ ጀመረ፤ አዲሱ ደግሞ እናቱን በማወደስ መጀመሩ ብቻ ሳይሆን በእግዚአብሔር ላይ ያለውን እምነት በአደባባይ ደጋግሞ በመግለጹ አከበርሁት፤ አከብረዋለሁ፡፡

ከዚህ በፊት ሦስት ጊዜ በፌስቡክ የጻፍሁትን ልድገመው፤››

 

አንድ፤ በ1965 በወሎ ችጋር ዘመን በቀዳማዊ ኃይለ ሥላሴ ዩኒቨርሲቲ መምህራንና ተማሪዎች እርዳታ ለማድረግ በምንሯሯጥበት ጊዜ አንዳንድ የኢሕአፓ አባሎች ለተራቡት እርዳታ መሰብሰብ አብዮቱ እንዳይመጣ ማድረግ ነው እያሉ ይቃወሙን ነበር፤ ነፍሱን ይማረውና አብርሃም ደሞዝና እኔ ተቆጥተንና አስፈራርተን አደብ እንዲገዙ አድርገናቸው ነበር፤ ዛሬ ደግሞ በዓቢይ ሹመት መደሰቴን በመግለጼ የሚሳደቡ አሉ፤ ስለዓቢይ የጻፍሁት ጠቅላይ ሚኒስትር ከመሆኑ በፊት ነበር፤ አሁን ግን ጠቅላይ ሚኒስትር ሲሆን ያደረገውን ንግግር አዳምጫለሁ፤ ስለዚህም ቀድሜ በተናገርሁት እጸናለሁ፤ የእግዚአብሔር ሰው ነው፤ አረመኔ አይደለም፡፡

ሁለት፤ በአሁኑ ጊዜ በዶር. ዓቢይ ላይ ብዙ ቅሬታዎች ይሰማሉ፤ ለእኔ እንደሚታየኝ ሁለት መነሻዎች ያሉ ይመስለኛል፤ አንዱ መነሻ ዓቢይ የተመረጠበት ሁኔታ ከወያኔ (ኢሕአዴግ) መመሪያ የወጣና ወደአልተሸበበ ነጻነት የሚያመራ መስሎ መታየቱ በወያኔ መንደር ሽብር እንደሚያስነሣ ሳይታለም የተፈታ ነው፤ ሁለተኛው የተለመደው የኢትዮጵያውያን የፖሊቲካ ባሕርይ ነው፤ የተፈለገው ለውጥ እስኪመጣ ድረስ ከመጠለያ ስር አሾልከው እያዩ ከደመናው በላይ ወጥተው የጠራ ሰማይ ለማየት የሚሞክሩ ናቸው፤ የደመናው ግርግርና ሽብር አይመለከተንም የሚሉ ይመስላሉ፤ ዓቢይ አንድ ሰው ነው፤ ዓቢይ ከነቡድኑ ትንሽና ደካማ ነው፤ ይህንን እውነት መገንዘብ ከተመልካችነት ወደቆራጥ ተሳታፊነት መሸጋገርን ይጠይቃል፤ የሚያስፈራውና የዳር አጨብጫቢነትን የሚጋብዘው ይህ ነው፤ የዳር አጨብጫቢነት ውስጥ ያሉት ሁሉ ወደተግባር ተሳታፊነት ቢሸጋገሩ የዓቢይ ዓላማ የማይሳካበት ምክንያት የለም፤ ካልሆነም ለድጋፍ የተገኘው ኃይል የታወጀውን ለመጠበቅም ይረዳል፡፡

 

ሦስት፤ ዶር. ሰማኸኝ፣ ያለህ ስጋትና ጥርጣሬ ይገባኛል፤ ነገር ግን ያለነው 27 ዓመታት ሙሉ ውል በሌለው በዘፈቀደ የተገመደ የመሀይሞች የፖሊቲካ ውስብስብ ውስጥ ነው፤ አንድ በልልኝ፤ ዓቢይ የኦህዴድ ሙሉም ባይሆን ሰፊ ድጋፍ አለው፤ የኦህዴድን ቅርጽም ልብ ብለህ ግንዛቤህ ውስጥ አስገባው፤ ሁለት በልልኝ፤ ከዚህ በተረፈ በሌሎች የኢትዮጵያ ክፍሎች (በስም የማላነሣቸው አውቄ ነው፤) ሊኖር የሚችለውን ድጋፍ ሙሉ በሙሉ ለመረዳት ዓቢይ 27 ዓመት ሙሉ በወያኔ የተፈተለውን የመንደር ፖሊቲካ መጋረጃዎች ሁሉ ቀዳዶ ሰው መሆንን ከኢትዮጵያዊነት ጋር ማዛመዱን ግምት ውስጥ ማስገባት ያስፈለልጋል፤ ይህ የብዙ ኢትዮጵያውያንን ቀልብ በኃይል ስቧል፤ ሦስት በልልኝ፤ የዓቢይን ልምዱንና ትምህርቱን ስናይ ለየዋህነት ቦታ ያለ አይመስለኝም፤ ከጎኑ ለማና ጓደኞቹም አሉ፤ አራት በልልኝ፤ አሜሪካም ደግፎታል፤ አምስት በልልኝ!

 

“““““““““““““““““““““““““““

ዶር. ዓቢይ በተለያዩ ስፍራዎች ያደረጋቸውን ንግግሮች በጥሞና አዳምጫለሁ፤ በተለይም ከሀብታሞች ጋር፤ አንድም ቦታ ሀሳቡ ሲደናገር ወይም ሲዛነፍ አልሰማሁም፤ በዚህም የእውቀቱን ስፋት፣ የአእምሮውን ምጥቀት፣ የኅሊናውን ጽዳት፣ የወኔውን ብርታት፣ የዓላማውን ጥራት፣ የዘዴውን ሥልጡንነት በጣም እጅጉን አደንቃለሁ፡፡

ለእኔ ኢትዮጵያ የሰውም ሆነ የአእምሮ ችግር ኖሯት አያውቅም የሚለውን እምነቴን አረጋግጦልኛል፤ የአገዛዝ ጫማ የኢትዮጵያውያንን ራስ ጨፍልቆ ረግጦ አመከነው እንጂ አለን፤ ደርግ ከአገዛዝ አወጣችኋለን ብሎ አሥራ ሰባት ዓመት ረግጦ ገዛን፤ ወያኔ ከደርግ አገዛዝ አወጣችኋለን ብሎ ይኸው እየረገጠ ሲገዛን ሠላሳ ዓመታት ሊሞላው ነው፤ አሁን ዶር. ዓቢይ አህመድና አቶ ለማ መገርሳ ወደአዲስ አቅጣጫ ሊመሩን የተዘጋጁ ይመስላሉ፡፡

ዶር. ዓቢይና አቶ ለማ በየትኛው መንገድ እንደሚመሩን ገና በትክክል ባናውቅም መድረሻቸው አሁን ካለንበት የተለየ እንደሚሆን ግልጽ አድርገዋል፤ ይህ አስተያየታቸው ተቃራኒ የሰላም ጥያቄዎችን አስነሥቷል፤ ሰላም ምን ማለት ነው@ በቀላል ምሳሌ ለማስረዳት፡… የዓየር አለመኖርና አደገኛነቱ የሚታወቀው ዓየር ሲታጣ ነው፤ ዓየር ሳይኖር ሞት፣ ሰላም ሳይኖር ሞት ነው፤ ጸረ ሰላም የሚሆነው ሬሳን ማንቃት ነው@ ወይስ ሞትን ማወጅ@ ሬሳን ማንቃቱን አብዮተኛነት የሚሉት አሉ፤ ሞትን ማወጅን የአስቸኳይ ጊዜ አዋጅ የሚሉት አሉ፤ በሁለቱም በኩል ለሰላም የሚደረገው ጩኸት ሰላምን የሚነሳ ነው፤ የሰላም ጠንቅ ሆነው ሰላምን መሻት የአገዛዝ ማዘናጊያ ዘዴ ነው፡፡

የአስቸኳይ ጊዜ አዋጁ እንዳለ ነው፤ ሆኖም አዲሱ ጠቅላይ ሚኒስትር ሹም-ሽር አድርጓል፤ በዚህ ሹም፣ሽር የወያኔ ቀኝ እጅ የሚታይ አይመስልም፤ ሆኖም ሹም-ሽሩ የዓቢይ የመጀመሪያ ደረጃ እርምጃ መሆኑ ነው፤ ለእኔ ቅር ያለኝ የሴቶች ቁጥር ማነስ ነው፤ በመጀመሪያው የወያኔ ስብሰባ ላይ ወያኔ አንድም ሴት አልነበረውም፤ ይህንን ጉዳይ ለመለስ ዜናዊ አንሥቼበት ነበር፤ በግዮን ሆቴል አንዲት (እንደነገረችኝ) የአሥራ አራት ዓመት ልጅ ቁመትዋን የሚያህል ጠመንጃ ተሸክማ አየሁ፤ አነጋገርኋት፤ ብዙ እንደእስዋ ያሉ ሴቶች ልጆች ነበሩ፤ በሐምሌው ጉባኤ ላይ አልተወከሉም ነበር፤ መለስ ዜናዊ ስሕተት መሆኑን አምኖ እንደሚታረም ነግሮኝ ነበር፤ በዚህ በኩል የዓቢይም ሹመት ከመለስ ዜናዊ እምብዛም አልተሻለም፡፡

አሁን በዓቢይ ላይ ከየአቅጣጫው የሚወርደው የነቀፌታ ናዳ ‹‹የአብዮታዊነት ውጥረት›› ከስድሳዎቹ እየተወራረሰ የመጣ የኩርፊያ ውጤት ይመስላል፤ የአጼ ኃይለ ሥላሴ አገዛዝ ሲወድቅ ስንት ወራት እንደፈጀ የማያስታውሱ ወይም የማያውቁ ሰዎች ዛሬ በሃያ አራት ሰዓት ለውጥ ማየት ይፈልጋሉ፤ ያውም እንደወያኔ ያለውን መዥገር ለማላቀቅ! በየካቲት 1966 ጸሐፌ ትእዛዝ አከሊሉ ስንብት አቀረቡ፤ ለጠቅላይ ሚኒስትርነት ጀኔራል ዓቢይ ታጩ፤ ልጅ እንዳልካቸው ተሾመ፤ አልቆየም፤ በልጅ እንዳልካቸው ተተካ፤ ከዚያ በኋላ ጀኔራል ተፈሪ በንቴ፣ ጀኔራል አማን ሚካኤል አንዶም ወንበሩ ላይ ለአጫጭር ጊዜዎች ወጥተው ወረዱና ኮሎኔል መንግሥቱ እስቲኮበልል ድረስ ተቀመጠበት፡፡

ዓቢይ ገና መጀመሩ ነው፤ ራሱ እንደተናገረው ‹‹የመጀመሪያ›› ሥራውን እየሠራ ነው፤ ገና አንድ እግሩን ብድግ በማድረግ ላይ ነው፤ መሮጥ ቀርቶ መራመድ አልጀመረም፤ ሊጠልፉት ያደፈጡ ብዙዎች ሳይሆኑ አይቀሩም፤ በያለበት እየዞረ ንግግር የሚያደርገውም ከአደገኛ ጥልፊያ ለመዳን ወገኖችን በመፈለግ ይመስለኛል፤ እኔ እንደምገምተው በዶር. ዓቢይ ላይ የከረረ ነቀፌታ የሚሰነዝሩት የቅርብ ደጋፊዎች ሊሆኑ የሚችሉት ይመስሉኛል፤ እንደተገነዘብሁት እስካሁን ዶር. ዓቢይ የነካው ቁስል በአጠቃላይ የወያኔን ሥልጣን፣ በተለይ ደግሞ የአማራን የወልቃይት አካል ነው፤ (በነገራችን ላይ የወልቃይት-ጠገዴ ጉዳይ ከአንደኛው የዓለም ጦርነት በኋላ በቱርክና በግሪኮች መሀከል በቱርክ የተሠራው ሸርና እስከዛሬ ሙሉ በሙሉ ያልተፈታው ችግር ግልባጭ ነው፤) ከጎሠኛ አመለካከት ከተወጣ ሁለቱም ሕመሞች የሚከስሙ ናቸው፡፡

የዜግነት ጉዳይ ያልገባቸው ፖሊቲከኞች ዛሬም ያሉ ይመስላል፤ የአንድ አገር ሕዝብን በዘር፣ በጎሣ፣ በሃይማኖት፣ በሥራ፣ ወይም በሌላ ማናቸውም ነገር ሳይሆን በሕግ ብቻ እንደዜጋ አንድ ሆነው የሚቆሙ ናቸው፤ዜግነት አንድን ሰው የአንድ አገር ሕጋዊ ባለቤት ያደርገዋል፤ አንድን ሰው ከሌሎች የዚያው አገር ዜጎች ጋር የአገር ሉዓላዊነትን እንዲጋራ ያደርገዋል፤ የአንድ አገርን ሕዝብ በሙሉ በአንድ የተደለደለ መድረክ ላይ ሊቆሙ ይገባል ብንል በዜግነት ነው፤ በሕግ ተሳስረዋልና በአንድ ዜግነት በቆሙ ሰዎች መሀከል የሕግ ልዩነት የለም፡፡

ገና ከአሁኑ በዓቢይ የቀናት አገዛዝ ጥሩ የለውጥ አዝማሚያዎች ይታያሉ፤ ዋናው በዜና ማሰራጫዎች ላይ የሚታየው ነው፤ በዚያው መጠን ሕዝቡም በነጻነት ሀሳቡን የመግለጽ ልምምድ የሚያደርግ ይመስላል፤ በዜና ማሰራጫዎቹ በኩልም የማታለሉ ዘዴ እየቀጠለ ይመስላል፤ በአንድ በኩል የነጻነት በር ሲከፍቱ በሌላ በኩል በር ይዘጋሉ፤ ለምሳሌ የሕዝብን ድምጽ ለማሰማት በሚል ሰበብ ከመንገድ የሚመርጧቸው ሰዎች እነሱ የሚፈልጉትን መልስ የሚሰጡትን ብቻ ይመሰላል፡፡

መጨረሻውን ለማየት ቢያንስ ስድስት ወራት እንጠብቅ፡፡

Posted in አዲስ ጽሑፎች | 1 Comment