ሦስት:- ደፋርና ጭስ መውጫ አያጣም! የኢትዮጵያ ሳታላይት ቴሌቪዢንና ራድዮ

እስካሁን ድረስ ያሳየነው ችሎታ የማጥፋት ወይም የማክሸፍ እንጂ አዲስ ነገርን ወይም አዲስ ሥርዓትን የመፍጠር አይደለም፤ በአለፉት ሃምሳ ዓመታት ውስጥ ቢያንስ ሦስት የአስተዳደር ሀሳቦች መቅረባቸውን አውቃለሁ፤ አንዱ በአቶ ሀዲስ አለማየሁ፤ ሁለተኛው በኤንጂኒር-የሕግ ባለሙያ ደመቀ መታፈሪያ፣ ሦስተኛው የኔ ናቸው፤ አእምሮአቸውና ልባቸው በማርክሳዊ-ሌኒናዊ ጦር ተቀስፎ የተያዘባቸው ወጣቶች ሌላ ሀሳብን የማይሰሙበት ጊዜ ነበር፤ ማርክሳዊ-ሌኒናዊ ጥራዝ-ነጠቅነት ብቻ የሁሉም ዓይነት የእውቀት ምንጭ ነው ብለው በጭፍን የሚያምኑ ወጣቶች በተለይም ከኢትዮጵያዊ የፈለቀ ሀሳብን ለማጥላላት ጉልበታቸውንና ጊዜያቸውን አይቆጥቡም ነበር፤ የሌኒን የጡት ልጆች እርስበርሳቸው ተፋጁና ያሸነፉት ዛሬም ከፋፍለው ይገዙናል፤ የት እንደሚያደርሱን ገና አላወቅንም።

ለኢትዮጵያ ለዘለቄታው ይበጃል የምንለውን የፖሊቲካ እምነትና ሥርዓት እኛው ራሳችን አምጠን ብንወልደው መልካም መሆኑ አይጠረጠርም፤ ግን ከላይ እንደገለጽሁት የኛ ችሎታ ማጨናገፍ ነው እንጂ ወላድና አዋላጅ መሆን አይደለም፤ እሰከዛሬ ለሁሉም የሚሆን መድረክ አልነበረምና መተባበሩ ችግር ሊሆን ይችል ነበር ይሆናል፤ አሁን ግን ኢሳት ሁሉንም ዓይነትና እምነት በእኩልነት ያስተናግዳል፤ ወይም ለማስተናገድ የሚችል ይመስለኛል፤ አሁን በኢሳት የሚሰማው የከሸፈ ቀረርቶና የተስፋ ቀረርቶ ነው፤ የከሸፋን ቀረርቶ እንደታሪክ ትምህርት እንዳንወስደው ጠያቂና ተጠያቂ ሆነው የሚቀርቡት ተጠያቂው አዋቂ ጠያቂው የማያውቅ ሆነው ነው፤ ለዚህም ነው የከሸፈ ቀረርቶ የሚሆነው፤ የተስፋው ቀረርቶም እንዲሁ ነው፤ በኢሳት መድረክ ላይ የሚናገሩት ሰዎች ከአወያዩ ወይም ከጠያቂው ሌላ ሁለት ወይም ሦስት ቢሆኑ አንዱ ሌላውን እያፋጠጠ እውነቱ ሊነጥርና ሀሳብ ሊበጠር ይችል ነበር፤ በውይይት ወይም በክርክር ስላለፈው ለመማር ስለወደፊቱ ለማቀድ ምቹ ይሆን ነበር፤  ለየብቻ ሜዳ እየሰጡ የፉከራ ወይም የማቅራሪያ መድረክ ማድረጉ ግን ብዙ አያራምድም፤ ሁሉም እንደታማኝ ተጨባጭ የምስል ማስረጃዎቹን ይዞ መቅረብ የሚችል ቢሆን እንኳን አንዱን የቀረርቶ ዓይነት ያስቀረዋል ለማለት ይቻላል፤ በተረፈ ግን በቀረርቶ አንማርም፤ በቀረርቶ አናቅድም።

መድረኩን ለየብቻቸው የሚፈልጉት ሰዎች ያለጥርጥር በውስጣቸው አምባ-ገነንት ለመኖሩ ምልክት እያሳዩ ነው፤ የሚሞግታቸው ወይም በጥያቄ የሚወጥራቸው ሰውን የማይፈልጉ ከሆነ ለምን ይጠቅሙናል? እንደዚህ ያሉ ሰዎችንስ መቼ አጣን? በቴሌቪዥኑ ጸዳል ለመሞቅ ብቻ የሚፈልገውን ማስተናገድ ለሌላው አይጠቅምም፤ ከባህላችን የወረስነውን ድካም እያስተነገድን ነው፤ ይህ ለአጠቃላይ ለውጥ እንደማይበጅ የተረጋገጠ ይመስለኛል፤ ይህ ካልተረጋገጠ የኢሳት ልፋት ለምንድን ነው? በኢሳት ላይ የሚቀርበው ሁሉ ስለዴሞክራሲ ይሰብካል፤ ነገር ግን በተግባር ዴሞክራሲ የሚገለጥበትን መንገድ ውይይትና ክርክር አያሳዩም፤ ለምሳሌ ሁለቱ ኦነጎች፣ ሁለቱ ኢሕአፓዎች፣ የጎሣ ድርጅትን እንደፖሊቲካ ፓርቲ የሚቀበሉና የማይቀበሉ፤ ለኢትዮጵያ የሚበጀው ምን ዓይነት የኢኮኖሚ ሥርዓት እንደሆነ የተለያየ አቅዋም ያላቸው ሁሉ ፊት-ለፊት እየገጠሙ ሲከራከሩ አናይም፤ መድረኩን ለየብቻ ካልያዙት በቀር አንደበታቸው አይፈታም፤ በአጭሩ እየተሰበከ ያለው ዴሞክራሲ በኢሳት መድረክ ላይ አይታይም፤ መቼ ሊጀምር ታስቦ ነው?

እኛው ራሳችን በፈጠርነው መሠረት ላይ አብዛኞቻችንን ኢትዮጵያውያን የማይጎረብጥ ሥርዓት ለመገንባት ፍላጎት ያደረብን ይመስላል፤ ኢሳት ከአንድ ባህላዊ ችግር ሰብሮ የወጣ አስተሳሰብ ላይ የቆመ ነው ለማለትም ሳይቻል አይቀርም፤ የጉልበተኛነትን ባህል በነገረኛነት ባህል እንተካው የሚል ይመስላል፤ ከላይ ስጀምር ኢሳት የባህል ይዘት አለበት ያልሁት ነገረኛነትን ነው፤ ኢሳት የጠምንጃ-ያዥነትንና የጉልበተኛነትን ትምክህት ‹‹አከርካሪውን ሰብሮ›› የነገረኛነትን ባህል ስር ለማጠናከር የሚጥር ይመስላል፤ ይመስላል ከምል ነው ብል ደስ ይለኝ ነበር፤ ነገር ግን ብዙ ወሬዎች ይሰማሉ።

ኢሳት አንድ ልዩ ተልእኮ ያለው ቡድን የሚጋልበው ፈረስ ነው ይባላል፤ ኢሳት እንደተለመደው የጥቂት ሰዎችን ኑሮ ለማመቻቸት ገንዘብ መሰብሰቢያ ነው ይባላል፤ ጨረቃንና ጸሐይን ምሥጢር ማድረግ ባህላችን ነው፤ ለማናቸውም ዓይነት ሙከራ የተለየ ዓላማ መስጠት ባህላችን ነው፤ ኢሳትን የፈጠረውን ዓይነት ጉልህ የመተባበር ውጤት ለማስተጓጎል ባህላዊ መሰናክሎች እንደሚፈጠሩ ሳይታለም የተፈታ ነው፤ እነዚህን መሰናክሎች ማስወገድ የምንችለው ሌሎች የዴሞክራሲ ባሕርዮችን፣ ማለትም  ግልጽነትንና ተጠያቂነትን የአሠራር ልምድ በማድረግ ብቻ ነው፤ የማሞኘትና  የብልጣብልጥ መንገዶች ሁሉ ተሞክረው ወደገደል አፋፍ የሚያመሩ ኮረኮንች መሆናቸውን ሁሉም አውቆታል፤ ጥርጣሬዎች የሚነሡትም በሁለት ምክንያቶች ነው፤ አንዱ ግልጽነትና ተአማኒነት ሲጎድል ነው፤ ሁለተኛው ቀደም ሲል በተለያዩ ቡድኖች የተተለሙትንና የከሸፉትን ሙከራዎች በማስታወስ ነው፤ በዚያ ላይ ጥርጣሬን የሚሰብከው ባህላችን አለ።

የኢሳት ልዩ ዓላማ ምንም ይሁን ምን የኢትዮጵያንና የኢትዮጵያን ሕዝብ አጠቃላይ ዓላማ የሚያራምድ ከሆነና ለማናቸውም ኢትዮጵያዊ አመለካከት በሩን ክፍት አድርጎ ካስተናገደ ከዚህ በላይ የሚጠበቅበት ተግባር ያለ አይመስለኝም፤ ማናቸውም ዓይነት ሀሳብ፣ ማናቸውም ዓይነት አመለካከት፣ ማናቸውም ዓይነት የፖሊቲካ እምነት በነጻነት የሚነገርበት መድረክ ከሆነ፣ ማናቸውም ዓይነት ሀሳብ፣ አመለካከትና የፖሊቲካ እምነት ያላቸው ሰዎች በግልጽና በነጻነት የሚወያዩበት ወይም የሚከራከሩበት መድረክ ከሆነ ሌላ ምን ይፈለጋል? ወያኔ/ኢሕአዴግ የዘጋው ይህንን ነው፤ ኢሳት ይህንን በር ለሁሉም ከከፈተ ኢትዮጵያውያን ከመታፈን ዳኑ ማለት ነው፤ ስለዚህም የባለቤትነቱ ጉዳይ ችግር ሊፈጥርብን አያስፈልግም።

የኢሳት ዋና ጥቅሙ የኢትዮጵያን ሕዝብ ከወያኔ/ኢሕአዴግ አፈና ለማዳን ብቻ አይደለም፤ ከዚያ በጣም የበለጠና ለዘለቄታው ጠቃሚ የሆነ ነገር አለ፤ ይህም ለኢትዮጵያ ሕዝብ የዴሞክራሲን ባህል ማስተማር ነው፤ እኔ የዴሞክራሲ ባህል የምለው በነጻነት ላይ ቆሞ ነጻነትን እያራገበ በልበ-ሙሉነት የሌሎችን ነጻነት የሚያከብርና የሚያስከብር ቃልና ተግባር የተስማሙበትና በሕግ ልዕልና የሚዳኙበት ሁኔታ ውስጥ መሆንን ነው፤ ይህንን ባህል በኢትዮጵያ ሕዝብ ኅሊና ውስጥ ለመትከል ቀላል አይደለም፤ በመጀመሪያ በኢሳት ውስጥ የሚሠሩት ሰዎች ለዚህ ጥሩ አርአያ ሆነው መታየት አለባቸው (ጓደኛቸው የተለየ ሀሳብ ሲያቀርብ ግር የሚላቸው በኢሳት ውስጥ እንዳሉ ከአንዴም ሁለቴ ታዝቤአለሁ፤)፤ የተለየ ሀሳብን ለመስማት የማንፈራ ለመሆን መማር ያስፈልገናል፤ አቶ መለስ ዜናዊ የተለየ ሀሳብን የመስማት ችሎታ ቢያዳብር በአበበ ገላው ውርጅብኝ አንገቱን ለዘለዓለም አይደፋም ነበር፤ መቻቻልና መከባበር በዴሞክራሲ የሚመጣ ልዩ ችሎታ ነው፤ ይህ ችሎታ እንደሌለን አውቀንና አምነን ከተነሣን ኢሳት ድንቅ መሣሪያ ይሆንልናል፤ እኛም ኢሳት እንዲከበርና ድምጹ ዋጋ ያለው እንዲሆን ለማድረግ እንችላለን፤ ኢሳት የኢትዮጵያን ሕዝብ በዴሞክራሲ ሲያበለጽግና ሲያጎለብት፣ የኢትዮጵያ ሕዝብም ኢሳትን ማበልጸግና ማጎልበት የሚጠበቅበት ይመስለኛል።

Advertisements
This entry was posted in አዲስ ጽሑፎች, አፈናና ከአፈና መውጣት. Bookmark the permalink.

12 Responses to ሦስት:- ደፋርና ጭስ መውጫ አያጣም! የኢትዮጵያ ሳታላይት ቴሌቪዢንና ራድዮ

  1. Yared says:

    ፕሮፌሰር መስፍን አስከዛሬ ድረስ ሳይታክቱ በርካታ መጻህፍት እና ጽሁፎችን በማበርከት ያላቸውን ዕውቀት እስካሁን ድረስ እያካፈሉ ናቸው፡፡ የሚያቀርቧቸው መጻህፍት እና ጽሁፎች ሰፊ የመነጋገርያ እርዕስ ከመሆናቸውም በላይ የውይይት ባህል እንዲዳብር በማድረግ በርካታዎችን በጋራ በማያወያየት ተጨማሪ ዕውቀት የሚተላለፍበት መድረክ ፈጥረዋል፡፡የመጻፍ ዋንኛው ዓላማ ይህ ነውና በዚህ
    በኩል ከሚገባው በላይ ተሳክቶላቸዋል፡፡

    ይሁንና ወደ ፖለቲካው ተሳትፎአቸው ስንመጣ የዚህ ተቃራኒ ሆኖ እናገኘዋለን፡፡ ፕሮፌሰር መስፍን በፖለቲካው መስክ ከአጼ ኃ/ስላሴ ስርዓት ጀምሮ በተለያየ መንገድ የተሳተፉ ቢሆንም እስካሁን ድረስ የተሳካላቸው አይመስልም፡፡ ለምን ይሆን እንዲህ ያልተሳካላቸው??????

    በኔ እይታ ፕሮፌሰር መስፍን ጥሩ አስተማሪ ምሁር እንጂ ውጤታማ ፖለቲከኛ አይደሉም ፡፡ የእሳቸው የቅንነት ባህሪ ፡ አሁን በሀገሪቱ ባለው ሁኔታ ያለባቸው ከፍተኛ ቁጭት እንዲሁም በህይወት ዘመናቸው የሚፈልጓትን ኢትዮጵያ ለማየት ካላቸው ከፍተኛ ፍቅር እና በጎ ምኞት በፖለቲካ መስክ ውጤታማ ለውጥ ለማምጣት የሚጠይቀውን ትዕግስትና ብልጠት እንዲጎድላቸው አድርጎባቸዋል፡፡
    ፕሮፌሰር መስፍን በትዕግስት ተባብሮ ለውጥ ከሚያመጣ የፖለቲካ እንቅስቃሴ ይልቅ ቶሎ ሆድ የሚብሳቸው ናቸው፡፡ እንዲያውም ታምራት ነገራ እንዳለው “ኢትዮጵያን እጅግ ከመውደዳቸው የተነሳ ለማቀፍ ሲንደረደሩ አንቀዋት” ይሆን?

  2. Melese says:

    professor is Great writer, analyst, logical…….but not Good Politician. As andinet said ” leave the politics to these good Ethiopians – Politicians”

  3. Girma Zeleke says:

    What prof. Mesfen said is, let us exercise democray among our selvesf before blaming weyaye saying that it is a fashist and undemocratic dictator, so what is the problem to say let us discus each and every isue of our country,s problem like political,social,etc with difrent personailties who have different views.that the only way to go forward and developing a democratic socaity. Democracy is not the property of the few if so that is not democracy that is dictatorship. please do not put those amharic saying alebotaw. Gracias professor.

  4. Andinet says:

    “……አሁን በኢሳት የሚሰማው የከሸፈ ቀረርቶና የተስፋ ቀረርቶ ነው፤ የከሸፋን ቀረርቶ እንደታሪክ ትምህርት እንዳንወስደው ጠያቂና ተጠያቂ ሆነው የሚቀርቡት ተጠያቂው አዋቂ ጠያቂው የማያውቅ ሆነው ነው፤ ለዚህም ነው የከሸፈ ቀረርቶ የሚሆነው፤…..” It seems z professor try to undermine the recent interview by Dr Birhanu on ESAT. I am always wondering why z professor try to undermine Dr Birhanu’s work while he ignores and continue in his work.

  5. Andinet says:

    As to my knowledge Professor Mesfin has contributed nothing to ESAT current status. But his comment seems as if he did. First of all ESAT established by some good Ethiopians who understand the current problem in Ethiopia and to be the voice of unheard Ethiopians. So the comment by the professor is as usual non constructive and to spoil the work of other good Ethiopians. Dear professor, if you couldn’t succeed to bring the required change in Ethiopia, please leave the task to these Good Ethiopians. There is a saying in Amharic ” Kebero besewu eje yamere seyezute yadenagere”.

    • Alazare Baylie says:

      I think you never read properly the Prof.’s argument. rather he provides a constructive idea in which ESAT has to do in the future.

  6. Yidne says:

    Tnx Prof! A posetiv challenge to ESAT!

  7. Goytom says:

    “አቶ መለስ ዜናዊ የተለየ ሀሳብን የመስማት ችሎታ ቢያዳብር በአበበ ገላው ውርጅብኝ አንገቱን ለዘለዓለም አይደፋም ነበር፤”
    This express a lot. I like it.

  8. Kolotemari says:

    Thank you Professor!!

  9. ግራዝማች ችሎማደር says:

    ድንቅ ብለዋል የኔታ ዋናው ግባችን የሁላችንም የምንለው ሁሉም ኢትዮጵያውያን ሃሳባቸውን የሚያቀርቡበት መድረክ ይኑር ሃሳብን በነጻነት የመግለጽ መብት ይዳብር የዲሞክራሲ እና ዲሞክራሲያዊነት መርሆዎች ማህበረሰባችን ውስጥ እንዲሰርጹ ሁላችንም የየራሳችን አስተዋጽኦ እናድርግ ኢሳት ጅምር ነው እንደሚበለጽግ እርግጠኛ ነኝ ግን የሁላችንም ገንቢ የሃሳብ ድጋፍ የገንዘብ ድጋፍ ያስፈልጋል
    አሁን የኔታ ገንቢውን ሃሳብ ጀምረዋል መልካም ነው በዚሁም ይቀጥሉበት
    እድሜውን ከጤና ያድልልኝ የኔታ

Comments are closed.