ትንሽ ምላጭ አገር ትላጭ! መጠላለፍ ወደየትኛው ገደል እየመራን ነው?

መስፍን ወልደ ማርያም
መጋቢት 2006

የአዲስ አበባን መኪናዎች በተለይም በጫት የሚሽከረከሩት ታክሲዎችን በማንኛውም መስቀልኛ መንገድ ላይ ለአምስት ደቂቃ ቆሞ የተመለከተ ሰው በቀላሉ እንደሚረዳው ‹እኔ ካላለፍሁ ማንም አያልፍም!› በሚል መመሪያ መኪናዎቹ ተቆላልፈው እንዲቆሙ ማድረግ ነው፤ እንደሚመስለኝ የአባቶቻችንን ዕዳ እየከፈልን ነው፤ ዱሮ በደጉ ዘመን ሁለት ኢትዮጵያውያን መስቀልኛ መንገድ ላይ ሲገናኙ አንተ-እለፍ አንተ-እለፍ እየተባባሉ የሰማዕታቱንና የቅዱሳኑን ስም እየጠሩ ይገባበዙ ነበር! ይህ ባህል በጠንካራ የሥልጣኔ ላጲስ ተደምስሶ ጠፍቶ በምትኩ እኔ ካላለፍሁ ማንም አያልፍም መንገዱን ሁሉ መቆላለፍ አዲስ የመጠላለፍ ባህል እየተተከለ ነው፤ የመጠላለፍ ባህል የሚታየው በባቡር መንገዶች ላይ ብቻ አይደለም፤ በብዙ ነገር መጠላለፍ ባህል እየሆነ ነው! የዚህ ዝንባሌ መጨረሻው አሸናፊ የሌለበት ሙሉ ጥፋት ነው።
በመንገዶች ላይ ጥቂት በጫት የሚነዱ መኪናዎች በመቶ የሚቆጠሩ መኪናዎች እንዳይንቀሳቀሱ ለማድረግ ይችላሉ፤ ሲያደርጉም በየቀኑ እየታየ ነው፤ በማኅበረሰባዊና በፖሊቲካ ግንኙነትም አንድ ሰው የሚዘራው መርዝ የጊዜው ሁኔታ በሚፈቅድለት ፍጥነት የማኅበረሰቡን አባላት ያዳርሳል፤ እንቆቅልሹ እንደሚለው ትንሽ ምላጭ አገር ትላጭ! ማለት መርዝ፣ እሳት፣ ተላላፊ በሽታ በሕዝቡ ላይ ማሰራጨት ከአምስትና ከአሥር ዓመታት በኋላ ውጤቱ ምን እንደሚሆን መገመት አያቅትም።
ድብብቆሽ አይጠቅምም፤ሁለት ነገሮችን በግልጽ ማውጣት አለብን፤አንደኛ በአሜሪካና በአውሮፓ መሽጎ ፍርሃቱንና ሽቁጥቁጥነቱን ለመሸሸግ መርዙን በኢትዮጵያውያን ላይ የሚረጨው ለምንድን ነው? አገዛዙ ይህንን የሚያደርግበት ምክንያት ግልጽ ነው፤ ከፋፍሎ የመግዛት ዘዴ ነው፤ ከአገዛዙ ጋር በሚደረግ ትግል ከታች ሆነው ከሥልጣን ውጭ የሆኑ ዜጎች በሥልጣን ላይ ከተቀመጡት ጋር እየተቆራቆዙና እየተጋጩ ናቸው፤ ይህንን እኔ የላይና-የታች ግጭት (vertical conflict) የምለው ነው፤ ከወያኔ/ኢሕአዴግ ጋር የሚደረገው ትግል ይህ ነው፤ ይህንን ለማክሸፍ ወያኔ/ኢሕአዴግ ትግሉን ከላይና-ታች አውጥቶ ወደጎን-ለጎን ግጭት (horizontal conflict) ሊለውጠው ይፈልጋል፤ ከወያኔ/ኢሕአዴግም ውጭ በጎሠኛነትና በሃይማኖት አክራሪነት የደነዘዙ ሰዎችም ትግሉን ጎን-ለጎን ሊያደርጉት እየሞከሩ ናቸው።
የፖሊቲካ ትግልን የሚመሩ ሰዎች በጎሠኛነትና በሃይማኖት አክራሪነት ስሜት እየተሳቡ ትግሉን የላይና-የታችነቱን ጠብቀው በተደራቢነት የጎን-ለጎን ትግሉን ይጨምሩበታል፤ ይህ ሲሆን ሀሳብ፣ ጉልበትና ሀብት ይከፋፈላል፤ ይበታተናል፤ ወደዓላማ ለመድረስም ያስቸግራል፤ ወያኔ ወደመጨረሻው ላይ ኢሕአዴግ ብሎ የሰየመውን ቀፎ አስቲፈጥር ድረስ በስሙ ውስጥ ኢትዮጵያን የሚያነሣ ነገር አልነበረውም፤ ወያኔን ለድል ያበቃው የማታለያ ስሙ እንደሆነ በበኩሌ አልጠራጠርም፤ ከሃያ ሁለት ዓመታት የጎሣ ሥርዓት በኋላ ኢትዮጵያ ቆስላለች እንጂ አልሞተችም፤ የአሐዝ ማስረጃ ለማቅረብ ባልችልም በብዙ ጎሣዎች መሀከል ጋብቻ እንደዱሮው እየቀጠለ ነው፤ ይህንን የቆየ የዝምድና ሰንሰለት ለመበጠስ የሚጥሩም አሉ።
ኒው ዮርክ ተቀምጦ ትኩስ ውሻ (ሆት ዶግ!) እየበላ ለእስላም ኦሮሞዎች የመገዳደያ መመሪያ የሚሰጥ ሰው የመንፈስ ጤንነቱን እጠራጠራለሁ፤ ይህንን የኒው ዮርክ ቀረርቶ ተከትሎ ሌላ የመጠላለፍ አዋጅ ሰማን፤ ቴዎድሮስ ካሣሁን ለአጼ ምኒልክ ስለዘፈነ ከበዴሌ ቢራ ፋብሪካ ጋር ለማስታወቂያ የገባው ውል ሥራ ላይ ከዋለ የበዴሌን ቢራ አንጠጣም ተባለና ማስታወቂያው ተሰረዘ ይመስለኛል፤ ማን እንዳሸነፈ ወደፊት ጊዜ ይነግረናል፤ አሁን ደግሞ ሌላ ማዘዣ ሰማሁ፤ ‹‹የስ›› በሚለው ውሀ ጠርሙስ ላይ እንስራ የተሸከመችው ኮረዳ መስቀል አድርጋ ነበር፤ ልጅቱ ከነመስቀልዋ የምትታይበትን ውሀ እስላሞች አንገዛም ስላሉ ነጋዴዎቹ መስቀሉን አወለቁባት! ይህንን ማዘዣ ላወጣው አክራሪ እስላም ወረባቦ ቅዳሜ ገበያ ሄዶ እንዲጎበኝ አሳስበዋለሁ፤ ዛሬ ተለውጦ እንደሆነ አላውቅም እንጂ እኔ ብዙ ጊዜ ተመላልሼ እንዳየሁት የወረባቦ ኮረዶች ሁሉ ትልልቅ መስቀል በአንገታቸው ላይ ይታይ ነበር፤ መስቀል የእምነት መግለጫ ይሆናል፤ አያጠራጥርም፤ ግን መስቀል ጌጥም ይሆናል! መስቀል የናዚ ምልክትም ሆኖ ነበር! ለማናቸውም የዚህ ዓይነቱን መጠላለፊያ ለኢትዮጵያ ሕዝብ የሚገምዱ ሰዎች ዓላማቸው ማንንም ለመጥቀም ሳይሆን ፍቅርንና ሰላምን ለማደፍረስ ነው፤ የኢየሱስ ክርስቶስ መሠረታዊ ትምህርት ክፉን በክፉ አትመልሱ ነውና ለተበጠሰው መስቀል አጸፋውን ለመመለስ ማሰብ አይገባም።
ከኒው ዮርክ የተሰማው ቀረርቶም ሆነ የመስቀል ማስወለቁ ጉዳይ የተከሰተበትን ጊዜ ልብ ልንለው ይገባል፤ እስላሞች ስለነጻነት የሚያደርጉት ንቅናቄ በጣም እየጋለ በመሄድ ላይ እያለ ክርስቲያኖችም የዜግነት ግዳጃቸው አድርገውት ድጋፋቸውን በሚሰጡበት ጊዜ ነበር፤ ይህ መሆኑ ጥርጣሬን ይጋብዛል፤ የገጠመውን የእስላሞችና የክርስቲያኖች ሰልፍ በማደፍረስ ወይም በመክፈል የሚጠቀም ማን ነው? የሚጎዳውስ ማን ነው? ሁሉም የትግል አጋፋሪዎች ለዚህ ጉዳይ የሚያስፈልገውን ክብደት ቢሰጡት ትግሉ በጎን-ለጎን እንዳይሄድና እንዳይዳከም ይረዳል፤ ከዚያም በላይ አክራሪነት የሚባለውና የሚያስከትለውም ሽብርተኛነት የሚመጣው እንዲህ እያለ ነው፤ እግዚአብሔር ከዚያ ያውጣን!

Advertisements
This entry was posted in አዲስ ጽሑፎች. Bookmark the permalink.

2 Responses to ትንሽ ምላጭ አገር ትላጭ! መጠላለፍ ወደየትኛው ገደል እየመራን ነው?

  1. በለው! says:

    >>> ታላቅ የምሥራች ለትውልዱ ሁሉ..”አዲስ የመጠላለፍ ባህል እየተተከለ ነው” ምን ያልተተከለብን አለ? ታሪክ፣ ሃይማኖት፣ ቋንቋ፣ አዲስ ሊተከል ግን ብዙ ነባር ነገሮች ተነቅለው ጠፍተው ነው። ያው እንግዲህ የማፍረስ አባዜ መሆኑ ነው።

    >>ከወያኔ/ኢሕአዴግም ውጭ በጎሠኛነትና በሃይማኖት አክራሪነት የደነዘዙ የፖሊቲካ ትግልን የሚመሩ እየተሳቡ ትግሉን የላይና-የታችነቱን ጠብቀው በተደራቢነት የጎን-ለጎን ትግሉን ይጨምሩበታል፤(የአራት ማዕዘን ታጋዮች) አዲስ ባሕል!
    ህወአት/ወያኔ ወደመጨረሻው ላይ ኢሕአዴግ ብሎ የሰየመውን ቀፎ አስኪፈጥር ድረስ በስሙ ውስጥ ኢትዮጵያን የሚያነሣ ነገር አልነበረውም!አሁንም የብሄር ብሄረሰብ ሕዝቦች ሆኑ የኢትዮጵያ ህዝቦች ይልና ለነጻነት በበረሃ በገባባት ክፍለ ሀገርና ህዝብ መካከል ከልሎና ከፍሎ የጎሳና የብሔር ተዋረድ በመፍጠር “የአፓርታይድ መንደርን” ሲፈጥር ለየት ለማለትም ያንኑ ነጻ ያወጣውን ሞትንለት የሚሉትን ድሃ የትግራይ ህዝብ ብሄራዊ ቋንቋህ አንግሊዘኛ ካልሆነ ብለው ሲያደናቁሩት ይታያሉ…ትግሬ እንግሊዛዊ ሊሆን ደደቢት በረሃ ገባ? ለመሆኑ እራሱን መሆን ያስጠላው ህወአት ታላቋንና ሰፊዋን ኢትዮጵያ እንዴት ሊሆን ይችላል!? ይልቁንም በድሮ አለቆቻቸው ሻቢያ የደነቆሩ ህወአት ኦነግና ኦብነግን ይዞ ዙሪያውን ያጯጩሃል። ግን ሁሉም ዳር ይዘው አንዱ ሌላውን እየወነጀለ የውስጥ በጋራ የማፍረስ የቤት ሥራቸውን እየሰሩና እየሰረሰሩ ፶ዓመት ተልመው፣ ፳ዓመት መሽገው፣ ፳፪ ዓመት የቁራ ጩኽት የአዞ እንባ ያነባሉ። የሚተዳደሩበትና የሚሰሩበት ግን በአንድ ማኒፌስቶ ነው።ሆኖም ከሃያ ሁለት ዓመታት የጎሣ ሥርዓት በኋላ ኢትዮጵያ ቆስላለች እንጂ አልሞተችም፤

    **እርግጥ ይህ የሆት ዶግ በል(የሞቀ ውሻ መር!) የዲያስፖራ ቡልጠቃ…የሙስሊም ኦሮሞ የሜንጫ አብዮት የኢትዮጵያውያንን ደካማ ጎን ሁሉ እያጠኑ በየዋህ ዜጎች ትከሻ ላይ ተንጠላጥሎም ይሁን ተሸጉጦ የሀገር ሉዓላዊነትን ታሪክ እያጠፉ…ወጣቱን በተሳሳተ አመለካካት እያተራመሱ.. የህዝብ ሰላምና አብሮ መኖርን የሚያደፈረሱ ..ትውልድ አምካኝና አባካኝ የጠላት መልዕክተኖች…የሀገር ፖለቲካል ኢኮኖሚና መከላከያ ይገባለናል…ሰፊ መሬት ተሰጥቶናል ቋንቋችንን ተናግረናል መሄድ ይገባናል ይላሉ። ያው ልዩ በደል ደርሶበታል ተጨቆነ የሚሉት ድሃ የኦሮሞ ሕዝብ ድሮም ዛሬም አላለፈለትም ሰላሙን አጥቶ ሲያዋጉት ብዙ ዘመን አለፈበት። እነሱ በባዕዳን ገንዘብ አልፎላቸው በድሃ ልጅ ደም ኖረዋል፣ ወደፊትም የዋህና ሞኝ እርሃብ ያንገላታውን በዘር በቋንቋ አቧድነው እርስ በእርስ አጫርሰው በሰላም ለመኖር አቅደዋል።ግን እስልምና እጅ፣ እግርና አንገት በሜንጫ ቁረጥና ፅደቅ ይላልን!?

    ***ፖለቲካ ቁማርተኞች የተለያዩ የሽብር ካርታን ይስባሉ…በግብፅ ኢትዮጵያዊ አደለንም የአባይን ግድብ አንደግፍም! በሳውዲ ኣረቢያ እኛ ኦሮሞዎች ኢትዮጵያዊም ክርስቲያንም አደለንም!የቀድሞው ኦፒዲዮ የኢህአዴግ ፕሬዘዳንት በኋላም የአድነት ፓርቲ መሪ የሆኑት የአጼ የምኒልክ ሀውልት እንዲፈርስ ፊርማ አሰባስበዋል ሰላማዊ ሰልፍ ወጥተው ነበር አሁን ከፓለቲካም ከቤታቸውም ወጥተው መንገድ ላይ ናቸው፡፡ ቴዎድሮስ ካሣሁን ለአጼ ምኒልክ ስለዘፈነ የበዴሌ ቢራ እዳትጠጡ ተባለ ህወአት አብሮ አዳመቀ…አይ የድሃ ነገር ይህ ጠግበው በሚደፉ ሀገር እንጂ ተርበው በሚደፉ ያፍሪካን ፳፭ ከመቶ ድራጎት ለሚቦጭቁ ሀገር አይሰራም እኮ! ፲፩ከመቶ የደነቆረ ቦልጥቀኛ…ወግ ወጉ እንደ አህዮቹ አሉ። ለግራዚያኒ ሀውልት መቆምና በሳውዲ ዓረቢያ ኤምባሲ በወገናችን ለደረሰ ግፍ ተቃውሞን የሚያስከለክሉትም የኢህአዴግ ክንፍ አባላት የዚሁ የሆት ዶግ መር ቡልጠቃ አቀንቃኝ ተንታኝና በታኝ ኅይሎች ናቸው። በቤተ መንግስት አጥር ላይ መሰቀል አየን! የባንዲራው አንበሳ ላይ መስቀል አለው!…‹‹የስ›› በሚለው ውሀ ጠርሙስ ላይ እንስራ የተሸከመችው ኮረዳ መስቀል አድርጋ ነበር፤ ልጅቱ ከነመስቀልዋ የምትታይበትን ውሀ እስላሞች አንገዛም ስላሉ ነጋዴዎቹ መስቀሉን አወለቁባት!የዚህ ዓይነቱን መጠላለፊያ ለኢትዮጵያ ሕዝብ የሚገምዱ ሰዎች ዓላማቸው ማንንም ለመጥቀም ሳይሆን ፍቅርንና ሰላምን ለማደፍረስ ነው፤ይህን የሚያስብ ኢትዮጵያዊ እስላም አልነበረም! አይኖርም! ለረጅም ግዜ ተካሔደው የተቃውሞ ሰልፋቸው እንኳን በሜንጫ አብዮተኞች ከመጠለፉ በፊት..ድንቅ ግሩም እንኳንም እኛን ዓለምን አስደምሟል…የጥንታዊ አብሮ መኖርን ትሩፋትን አስቀጥሏል ግን “በጥበጭ ካለ ማን ጥሩ ይጠጣል?”

    **የእስላሞችና የክርስቲያኖች ሰልፍ በማደፍረስ ወይም በመክፈል የሚጠቀም ማን ነው? የሀገርን ሉዓላዊነት ለባዕድ አሳልፎ በመስጠት ተጠቃሚው ማነው? የሃይማኖት አክራሪነት ስንል በዐላማ ጸንቶ፣ ሕገመፅሀፍ-ቅዱሱንም ይሁን ሕገ-ቁራዓንን ለማስከበር ተግቶ መሥራትና መልካም ትሩፋትን ለትውልድ ማውረስ እንጂ በሰው ሀገር ተቀምጦ በቀን አሥር ግዜ እየበሉ፣ እየጨፈሩና፣ እያስጨበጨቡ፣በአመፅና ሽብር ሽቀላ መተዳዳር የሃይማኖት አክራሪ ሳይሆን ሃይማኖትን እራሱን ማሸበር፣ማርከስም፣ማክሰርም ነው። ፪፻ሺህ የዓይን (ክላኮማና ትራኮማ) በበሽታ በሚሰቃዩ የኦሮሞ ሕዝቦች መንደር ፳ሚሊየን ብር የሚያወጣ ድንጋይ መካብ!?ለመሆኑ ይህንን ማውጣት የቻለ ክልል ሁልግዜ ለምን ያለቅሳል?ለነገሩ ሳይሞቱ ሐውልት የቀረፁ ታጋይ ፓትሪያክና የጦር ሀይል ባለሥልጣናት አሉን አደለምን!?እንግዲህ የፉክክር ቤት ሳይዘጋ ያድራል…ውሻ በቀደደው ጅብ ይገባል…ትውልድ ነቅቶ እራሱን ካልጠበቀ ከሄደው እየሄደ ሰፊውም ጎዳና አጣብቂኝ አለው።የላጭን ልጅ ቅማል በላው! ሠራዊታችን ሀገር የመታደግ ኀላፊነት እንዳለበት መዘንጋት የለበትም! እግዝሐብሄር ሀገራችን ኢትዮጵያንና ሕዝቧን በቸርነቱና በቃል ኪዳኑ መሠረት ይጠብቃት ይህንንም የዋህ ሕዝብ ከብልጦች፣ ከአስመሳይ፣ ምንደኞች፣ አመፅ ሽብርና ውንብድና ይጠብቀው።አሜን!
    ሰላም ለሁሉም ይሁን በቸር ይግጠመን>>>

  2. Feyissa says:

    Dear Proff.
    You did your part very well without any hypocrisy but I don’t think that you can change a lot of people who deliberately flame superfluous fire to destabilize the future ETHIOPIA. We are now observing the outcome of what we sow. However, continue your contribution up until you die. Thank you

    ስሸነፍ ተሟጦ ኃይል፣
    ሰው መሆኔ ቀርቶ፣- አስከሬን ስባል፣
    እወቁልኝ ይህን ብቻ፣- የገባኝን ያህል
    ሞክሬ ነበር ሰው ለመሆን፤
    ሰውነት በከፋበት ዘመን።

    mesfin weldemariam

Comments are closed.