ኤርትራ በኢጣልያ አገዛዝ

መስፍን ወልደ ማርያም
ሰኔ/2008

በኢጣልያን የአገዛዝ ዘመን፣ ወይም ከዚያ በኋላ ከፌዴሬሽን በፊት አስመራን ያየ እንደሚያስታውሰው የነጮችና አበሾች ኑሮ የተለያየ ነበር፤ አበሾች የሚኖሩት ገዛ አባ ሻውል በሚባለው ችምችም ያለ መንደር ነበር፤ በነጮቹ ከተማ የሚሠሩ አበሾች ሁሉ፣ ወንድም ሴትም የፈረንጅ ልብስ እንዳይለብሱ ክልክል ነበር፤ ጠዋት ሊነጋጋ ሲል ቢስክሌት ያለው በበስክሌቱ፣ የቻለ በጋሪ፣ አለዚያ በእግር ወደነጮቹ ከተማ (በአስመራ) ይጎርፋል፤ በዚያ ሲሠራ ውሎ ማታ ጠዋት በመጣበት ሁኔታ ወደጭንቅንቅ መንደሩ ይጎርፋል፤ በገዛ አባ ሻውል ጠላውን በምኒልክ ብርጭቆ እየጠጣ አዝማሪ ሲሰማ ያመሻል፤ በኢጣልያ አገዛዝ ስር በነበረችው ኤርትራ የአበሻ ኑሮ ይኸው ነው፡፡
ቤቶችን ማፍረስ የአገዛዙ ዋና ሥራ ሆኖ ከቀጠለ ዛሬ በአዲስ አበባ አካባቢ ለአበሾች መኖሪያ በርከት ያሉ የተጨናነቁ ገዛ አባ ሻውሎች የሚያስፈልጉ ይመስለኛል፡፡
አለዚያ — …
አለዚያ ….
ቤቱ የፈረሰበት ቤተሰብ ቁጥር እየበዛ ሲሄድ ወይ በቀይ ባሕር ውስጥ መስመጥ፣ ወይ በሜዲቴራንያን ባሕር ውስጥ መስመጥ፣ ወይ በኮንቴይነር ውስጥ ታፍኖ መሞት፣ ወይ ዕድለኛ ከሆኑ በየሰው አገር አስር ቤት መማቀቅ የአበሻ ዕድል እየሆነ ነው፡፡
ቤቶች ሁሉ ፈርሰው ሲያልቁ ዛሬ የራሳቸውን ቤት ለማፍረስ የሚገዙት ወጣቶች ሁሉ ምን ሥራ ይፈጠርላቸዋል?
አገዛዙ አለሕዝቡ እንዴት ሊኖር ነው? በኢትዮጵያ ዙሪያ የሚሰማው ሁሉ ጥሩ አይደለም፤ መማረር ሳይመጣ አገሩን የሁላችንም ማድረጉ ሳይሻል አይቀርም!

Advertisements
This entry was posted in አዲስ ጽሑፎች. Bookmark the permalink.